މިދިޔަ ބުރާސްފަތި ދުވަހު ހުޅުމާލޭ ދެވަނަ ފިޔަވަހީގެ ހިޔާ ފުލެޓެއްގައި މީހަކު ރަހީނުކުރި މައްސަލައިގައި ހައްޔަރުކުރި 12 މީހަކު ބަންދުކުރަން ކްރިމިނަލް ކޯޓުން އަމުރުކޮށްފިއެވެ.
ފުލުހުން "ސަން"އަށް ބުނީ، އެ މައްސަލައިގައި ހައްޔަރުކުރި މީހުންގެ ބަންދުގެ މުއްދަތު ޖަހަން ކްރިމިނަލް ކޯޓަށް ހާޒިރުކުރުމުން އޭގެ ތެރެއިން ހަތް މީހަކަށް ހަތް ދުވަސް އަދި ފަސް މީހަކަށް ފަސް ދުވަސް ޖަހައިފައިވާ ކަމަށެވެ.
އެ މީހުންނާއި އެ މައްސަލައާ ގުޅޭ އިތުރު ތަފުސީލެއް ފުލުހުން ހާމައެއް ނުކުރެއެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކާއި ވީޑިއޯތަކުގައިވާ ގޮތުން އެ ހާދިސާ ހިނގައިފައިވަނީ ނުވަ ވަނަ ޓަވަރުގެ 20 ވަނަ ފްލޯގެ 11 ވަނަ އެޕާޓްމެންޓުގައެވެ.
ރަހީނުކޮށްފައި ހުރި މީހާ ސަލާމަތް ކުރަން ދިޔައިރު އެ މީހާއަށް ބިރު ދައްކައި، އޭނާގެ ބޯ ބާލައިފައިވާ މަންޒަރު ވެސް ވީޑިއޯތަކުން ފެނެއެވެ.
މީގެ އިތުރުން އެ މީހާއަށް އަނިޔާކުރުމަށް ބަހައްޓައިފައިހުރި ކަމަށް ބެލެވޭ ބައެއް ތަކެތި ވެސް ވީޑިއޯތަކުން ފެނެއެވެ.
އެ މީހާ ސަލާމަތް ކުރުމަށް ކުރިއަށްގެންދިޔަ އޮޕަރޭޝަން ބައްލަވައިލެއްވުމަށް ހޯމް މިނިސްޓަރު އަލީ އިހުސާން ވެސް ވަޑައިގަތެވެ.
އެ މައްސަލައާ ގުޅޭ ގޮތުން އިހުސާން ވިދާޅުވީ ބައެއް ފުލެޓުތަކާއި އެ ނޫންވެސް ތަންތަން ތަކުރާރުކޮށް ކުށްކުރާ ތަންތަނުގެ ގޮތުގައި ބޭނުންކުރާކަން ފާހަގަވާ ކަމަށާއި، އެފަދަ ތަންތަން ގާނޫނަށް ބަދަލު ގެނެސްގެން ނަމަވެސް ދައުލަތަށް ނެގޭނެ ގޮތެއް ހަމަޖައްސަވާނެ ކަމަށެވެ.
ހިޔާ ފުލެޓުތަކަށް މީހުން އޮޅުވާލައިގެން ގެންގޮސް، ބިރުދައްކައި، ރަހީނުކޮށްގެން ފައިސާ ހޯދުމުގެ މައްސަލަތަކެއް މީގެ ކުރިން ވެސް ފެންމަތިވެފައިވެއެވެ.