ގޭންގާއި މަސްތުވާތަކެތީގެ ކުށްތައް ކުރާ އައްޑާގެ ގޮތުގައި ބޭނުންކުރާ ތަންތަން ގާނޫނަށް ބަދަލު ގެނެސްގެން ވެސް ދައުލަތަށް ނަގާނެ ކަމުގެ އިންޒާރު ހޯމް މިނިސްޓަރު އަލީ އިހުސާން ރޭ ދެއްވައިފިއެވެ.
ހުޅުމާލެ ދެވަނަ ފިޔަވަހީގެ ހިޔާ ޓަވަރު ނުވައެއްގައި މީހަކު ރަހީނުކޮށްފައި ހުއްޓައި އޭނާ ރޭ ސަލަމާތްކޮށްފައިވެއެވެ. އަދި އެ މައްސަލައިގައި ފުލުހުންގެ ބެލުމުގެ ދަށަށް ބަޔަކު ގެންގޮސްފައިވެއެވެ.
އެ ހާދިސާއާ ގުޅިގެން މީޑިއާތަކަށް މައުލޫމާތުދެއްވައި މިނިސްޓަރު އިހުސާން ވިދާޅުވީ، ރޭ މީހަކު ރަހީނުކޮށްގެން އުޅޭ ކަމަށް އިންޓެލިޖެންސްއަށް މައުލޫމާތު ލިބުމާއެކު ގޮސް އެ މީހާ ސަލާމަތްކުރި ކަމަށާއި ބައެއް ފުލެޓުތަކާއި އެ ނޫންވެސް ތަންތަން ތަކުރާރުކޮށް ކުށްކުރާ ތަންތަނުގެ ގޮތުގައި ފާހަގަކުރެވޭ ކަމަށެވެ.
މިފަދަ ތަންތަނުގެ ވެރިންނާ އަޅުގަނޑުމެން ވާހަކަދައްކާނަން. އަދި ތަކުރާރުކޮށް މިފަދަ ކަންކަން ފެންނަކަމަށް ވެއްޖެއްޔާމުން ގާނޫނުގެ ތެރެއިން މިފަދަ ތަންތަން ދައުލަތަށް އަނބުރާ ނެގެން އޮތްނަމަ ހައްލެއް ލިބެން އޮތް ނަމަ އެގޮތަށް އަޅުގަނޑުމެން އަމަލުކުރާނަން، ހޯމް މިނިސްޓަރު އަލީ އިހުސާން
އިހުސާން ވިދާޅުވީ މިއަދުން ފެށީގެން ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އާއެކު އެ ފުލެޓުތަކުގެ ވެރިންނާ ވާހަކަދެއްކުމުގެ މަސައްކަތް ފަށާނެ ކަމަށެވެ. އަދި އެކަންތައް ހައްލުނުކޮށް، ކުށްކުރުމުގެ މާހައުލަށް އެތަންތަން ތަކުރާރުކޮށް ހުޅުވާލާފައި އޮންނަނަމަ އެ ތަންތަން އަނބުރާ ދައުލަތަށް ނެގޭނެ ގޮތެއް ހޯދާނެ ކަމަށެވެ. ވަކިން ޚާއްސަކޮށް ތަކުރާރުކޮށް މަސްތުވާތަކެތި ބޭނުންކޮށް އެ ތަނަކީ އައްޑާއެއްގެ ގޮތުގައި ބޭނުންކުރަމުން އަންނަ ތަނެއް ކަމުގައި ވާނަމަ ވެސް އެ ތަންތަން ދައުލަތަށް ނެގޭނެ ގޮތެއް ހޯދުން އެއީ މި ސަރުކާރުގެ އަމާޒެއް ކަމަށް އިހުސާން ވިދާޅުވިއެވެ.
އެގޮތުން އެއީ މިހާރު ގޭންގު ގާނޫނަށާއި، މަސްތުވާތަކެތީގެ ގާނޫނަށް ގެންނަން ހުށަހަޅާފައި އޮތް އިސްލާހުގެ ތެރެއިން އެއް އިސްލާހު ކަމަށް މިނިސްޓަރު ވިދާޅުވިއެވެ.
އިހުސާން ވިދާޅުވީ ދިވެހިންގެ ސަލާމަތާއި ރައްކާތެރިކަން މި ސަރުކާރަށް ވަރަށް މުހިންމު ކަމަށެވެ. އެހެންކަމުން ދިވެހިރާއްޖޭގައި ކުށްކުރާ ފަރާތްތަކާއި ވަކިން ޚާއްސަކޮށް ރަހީނުކުރުން ފަދަ ހާލަތަކަށް މީގެ ފަހުން ވެސް ދިވެހި ރައްޔިތަކު ގެންގޮސްފިނަމަ ދިވެހި ފުލުހުން ގާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށެވެ.
ގަވާއިދާ ގާނޫނުތަކާ ޚިލާފަށް ގޭންގުތައް ހަދައިގެން ކުށްކުރަމުންދާ ފަރާތްތަކަށް އަޅުގަނޑު ދަންނަވާލަން ބޭނުން މިކަންކަން ހުއްޓާލަން. ކުދިންގެ މުސްތަގުބަލް ހަލާކުނުކޮށް، މިފަދަ ކަންކަމުގެ ތެރެއަށް ނުވަދެ، ޖަލުތަކުގެ ތޭރިތަކުގެ ތެރެއަށް ވަނުމުގެ ބަދަލުގައި ގައުމަށް ފައިދާހުރި ޒުވާނުންގެ ގޮތުގައި މިކަމުން ނެއްޓިގެން އަވަހަށް ހެޔޮ މަގަށް އެޅުމަށް އަޅުގަނޑު ނަސޭހަތްތެރިވަން، ހޯމް މިނިސްޓަރު އަލީ އިހުސާން
އިހުސާން ދެއްވި ޔަގީންކަމަކީ ފުލުހުން 24 ގަޑިއިރު ޚިދުމަތުގައި ތިބޭނެ ކަމަށެވެ. ހަމައެއާއެކު ހިޔާ ފުލެޓު ސަރަހައްދަކީ ގިނަ ދިވެހި ރައްޔިތުން އުޅޭ ސަރަހައްދަކަށްވެ، އެ ސަރަހައްދު ބެލެހެއްޓުމަށް އިތުރު ފިޔަވަޅުތައް އަޅާނެ ކަމަށް އިހުސާން ވިދާޅުވިއެވެ. އެގޮތުން ކެމެރާ ހަރުކޮށް ފުލުހުންނަށް އެ ސަރަހައްދު މޮނިޓަކުރެވޭނެ ނިޒާމު ގާއިމްކުރަމުންދާ ކަމަށް ވެސް ވިދާޅުވިއެވެ.
ރޭ އެޗް-09 ޓަވަރުގެ އެޕާޓްމަންޓެއްގައި ހިނގައި ދިޔަ މި ހާދިސާގައި ބަންދުކުރީ ކިތައް މީހުން ކަމާއި، މި ހާދިސާގެ އިތުުރު މައުލޫމާތެއް ފުލުހުން ހިއްސާ ނުކުރެއެވެ.
ސޯޝަލް މީޑިއާގައި ދައުރުވަމުން އަންނަ ގޮތުގައި އެ ތަނުގައި ރަހީނުކޮށްފައިވާ މީހާގެ ބޯ ވެސް ވަނީ ބާލައިފައެވެ. އަދި ތައްޔާރުވަމުން ދިޔައީ އޭނާއަށް ބޮޑެތި އަނިޔާތަކެއް ދޭންކަމަށް ވެސް ސޯޝަލް މީޑިއާގައި ދައުރުވާ ވާހަކަތަކުގައިވެއެވެ.