ޕިކަޕަކުން 48 ފުޅި ބަނގުރާ ފެނުނު މައްސަލައެއްގައި ތިން ބިދޭސީން ހައްޔަރުކޮށް، ކްރިމިނަލް ކޯޓުން 10 ދުވަހަށް ބަންދުކުރުމަށް އަމުރުކޮށްފިއެވެ.
ފުލުހުން ބުނީ ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން އިއްޔެ ހުޅުމާލޭގައި އޮޕަރޭޝަނެއް ހިންގި ކަމަށެވެ. ހުޅުމާލެ ޕޮލިހާ ގުޅިގެން ހިންގި އެ އޮޕަރޭޝަނުގައި ހުޅުމާލެ ފޭސް އެކެއްގެ މަގުމަތިން ޕިކަޕެއް ހުއްޓުވައި ބަލައިފާސްކުރިއިރު 48 ފުޅި ބަނގުރާ ފެނިފައިވާ ކަމަށް ފުލުހުން ބުންޏެވެ.
އަދި އެ މައްސަލައިގައި ބިދޭސީ ތިން މީހުން ހައްޔަރުކޮށްފައިވާ ކަމަށް ފުލުހުން ބުންޏެވެ.
އެ އޮޕަރޭޝަންގައި ހައްޔަރުކޮށްފައިވަނީ ބިކާރާ ކުމާރު، އިންޑިއާ (24އ)، އަކިލޭޝް ކުމާރު، އިންޑިއާ (27އ) އަދި އުމާކަންތު ޗޯދަރީ، ނޭޕާލް (35އ)އެވެ.
މި މައްސަލައާ ގުޅިގެން މި ތިން މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ތިން މީހުން ވެސް 10 ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ބުންޏެވެ.
އަދި މި މައްސަލަ ފުލުހުން ތަހުގީގު ކުރަމުންދާ ކަމަށް ވެސް ފުލުހުން މައުލޫމާތުދިނެވެ.