މިދިޔަ އަންގާރަ ދުވަހު، ސްކޫލު ކުއްޖެއްގެ ދަބަހެއް ވަގަށް ނެގި މީހަކު ފުލުހުން ހައްޔަރުކޮށްފިއެވެ.
ފުލުހުންގެ މީޑިއާ ގްރޫޕުގައި ހިއްސާކުރި މައުލޫމާތެއްގައި ފުލުހުން ބުނީ އެ ވައްކަން ހިނގީ އަންގާރަ ދުވަހުގެ ހެނދުނު 08:48 ހާއިރު އަމީރު އަހުމަދުމަގާއި ކަސްތޫރި ގޯޅި ހިމެނޭ ކަންމަތީގައި ކަމަށެވެ.
އެ ދަބަސް އޮތީ ޕާކުކޮށްފައި ހުރި ސައިކަލެއްގައި ބަހައްޓާފައި ކަމަށް ވެސް ފުލުހުން ބުންޏެެވެ.
ފުލުހުން ބުނީ އެ ވައްކަމުގެ ތުހުމަތުގައި ހައްޔަރުކޮށްފައިވަނީ ނ. ވެލިދޫ، ހިފާޒް، އަޙްމަދު މާޖިދު (33އ) ކަމަށެވެ.
އަދި އޭނާ ވަގަށްނެގި ކަމަށް ތުހުމަތުކުރެވޭ ދަބަސް އޭގައި ހުރި ތަކެއްޗާއެކު ހޯދައި ވެރިފަރާތާ ހަވާލުކޮށްފައިވާކަމަށް ފުލުހުން ބުންޏެވެ.
އަދި އެ މައްސަލަ ފުލުހުން ދަނީ ތަހުގީގުކުރަމުން ކަމަށް ވެސް ބުންޏެވެ.
ވައްކަމާއި ފޭރުމުގެ މައްސަލަތައް އާންމު ގޮތެއްގައި ވެސް އަންނަނީ މާލޭގައި ފެންމަތިވަމުންނެވެ. މި ހަފުތާގައި، މޯބައިލް ފިހާރައެއްގެ ބިއްލޫރިގަނޑު ތަޅައި ފޭރުނު މައްސަލައެއް ވެސް ވަނީ ރިޕޯޓުކޮށްފައެވެ.