ސަރުކާރުގެ ކަންކަން މިހާ ބޮޑަށް ގޯސްވެދާނެ ކަމަށް ހީފުޅުނުކުރައްވާ ކަމަށާއި ވެރިކަމަށް ރައީސް ޑރ. މުހައްމަދު މުއިއްޒު ގެންނަން މަސައްކަތް ކުރެއްވުނީތީ މިހާރު ވަރަށް ބޮޑަށް ހިތާމަކުރައްވާ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިއަދު ވިދާޅުވެއްޖެއެވެ.
މި ވެރިކަމަށް ހަފުތާއެއް ނުވަނީސް ޔާމީން ވަނީ ސަރުކާރު ހިންގާ ކޯލިޝަންގެ ލީޑަރުކަމުން ވަކިވެ، އިދިކޮޅު ޕާޓީއެއް އުފައްދަވައިގެން މަސައްކަތް ފައްޓަވައިފައެވެ.
ރާއްޖެ ޓީވީއަށް ދެއްވި ޚާއްސަ އިންޓަވިއުއެއްގައި ޔާމީން ވިދާޅުވީ، މި ވެރިކަން ގެންނަން މަސައްކަތް ކުރެއްވުނީތީ އަދި ޚާއްސަކޮށް ރައީސް މުއިއްޒަށް ތާއީދުކުރެއްވުނީތީ ހިތާމަކުރައްވާ ކަމަށެވެ. މި ސަރުކާރު މިހާ ބޮޑަށް ނުކަސިޔާރު ވެގެން ހިނގައިދާނެ ކަމަށް އޭރު އެއްވެސް ވަރަކަށް އުންމީދުނުކުރައްވާ ކަމަށް އެ މަނިކުފާނު ވިދާޅުވިއެވެ.
"ވަރަށް ރިގްރެޓްކުރަން އެނގޭތޯ. އެއީ، އަޅުގަނޑުމެންގެ މުޑުވަކުން އަޅުގަނޑުމެން ރައްޔިތުންނަށް ދެއްކި ބޭފުޅެއް މިއީ[ރައީސް މުއިއްޒު]،" އެ މަނިކުފާނު ވިދާޅުވިއެވެ.
ޔާމީން ވިދާޅުވީ، މި ސަރުކާރު އައި ފަހުން ރައްޔިތުން އިންތިހާއަށް ހިތާމަ ތަހަންމަލުކުރަންޖެހިފައިވާ ކަމަށެވެ.
މީގެ އިތުރުން، ގެއްލުނު ކަނޑުގެ ސަރަހައްދާއި ފޯޅަވަހި ހޯދަން މި ސަރުކާރުން މަސައްކަތްނުކުރާކަން ފާހަގަކުރައްވައި އެ މަނިކުފާނު ވަނީ ކަންބޮޑުވުން ފާޅުކުރައްވައިފައެވެ. އަދި، ސަރުކާރުން އިންޑިއާ ސިފައިން ފޮނުވާލި ކަމަށް ބުނި ނަމަވެސް އަދިވެސް އިންޑިއާ ސިފައިން ރާއްޖޭގައި އެކިއެކި ތަންތަނުގައި ގާއިމުވެ އެބަތިބި ކަމަށް އެ މަނިކުފާނު ތުހުމަތުކުރެއްވިއެވެ.
"ޚިޔާލަށް ގެންނަވާ، އެ ތަނުގައި [ފޯޅަވަހީގައި] ދިވެހިރާއްޖޭގައި އޮތް ކަހަލަ ޓޫރިޒަމެއް ފައްޓައިފިއްޔާ ދިޔައީ ދެއްތޯ ދިވެހިރާއްޖޭގެ ޓޫރިޒަމް. އަނެއްކާ، ދިވެހިރާއްޖޭގެ ޓޫރިޒަމަށް މި އަންނަ ޔަންގް ޓްރެވެލާސް ވަރަށް ގިނަ މީހުންނަކީ ސާފަރުން. އެ ތަނުގައި ހުންނަ ވޭވްސް މާ ބިޔަ ރާއްޖޭގައި ހުންނަ ވޭވްސްތަކަށްވުރެ،" ޔާމީން ވިދާޅުވިއެވެ.
"ޗާގޯސްގެ މައްސަލައިގައި އަޅުގަނޑުމެންނަށް ހަމައެކަނި ގެއްލިގެން މި އުޅެނީ ކަނޑުގެ ސަރަހައްދާއި އެ ތަނުގައި ހުރި ރިސޯސްތައް އެކަންޏެއް ނޫން.... އެކަމަކު، އަޅުގަނޑަށް ވިސްނޭ އެ ތަނުގައި ޓޫރިޒަމް ފެށިއްޖެއްޔާ ހަމަ ދިވެހިރާއްޖޭގެ ބީޗަސް އެ ތަނުގައި އެ ހުރީ،"
އެކަމަކު، ރައީސް މުއިއްޒަށް ތާއީދުކުރެއްވުނީތީ މިއަދު ހިތާމަކުރެއްވި ނަމަވެސް އެމްޑީޕީއާ ގުޅިގެން ސަރުކާރާ ދެކޮޅަށް މަސައްކަތްނުކުރައްވާނެ ކަމަށް ޔާމީން ވިދާޅުވިއެވެ.
ޔާމީން: އެ މަނިކުފާނު ވިދާޅުވީ އެމްޑީޕީއާ އެކުގައި މަސައްކަތްނުކުރެއްވޭނެ ކަމަށް -- ސަން ފޮޓޯ/ އަމަން ލަތީފް
"ނޫން. ތިއީކީ ވާނެ ކަމެއް ނޫން،" އެމްޑީޕީއާ ގުޅިގެން މަސައްކަތްނުކުރައްވާނެކަން ޔަގީންކޮށްދެއްވަމުން ޔާމީން ވިދާޅުވިއެވެ.
"އެއީ، ވާގޮތަކީ އަޅުގަނޑުމެންގެ އައިޑިއޮލޮޖީއާ އެމްޑީޕީގެ އައިޑިއޮލޮޖީއާ ތަފާތު. ވަރަށް ތަފާތު އެނގޭތޯ. އަޅުގަނޑަށް މި ކުރި ހުރިހާ ޖެއްސުމަކައި ގޯނާއެއް މި ކުރީ އެމްޑީޕީ ސަރުކާރުން. އެހެންވީމާ ދެން ކީއްކުރަންތޯ އެ މީހުންނާ އެކީ އަޅުގަނޑު ކުރިއަށް ދާންވީ. އަޅުގަނޑު ހަމަ އެއް ގޮތަކަށް ވެސް އެއްވެސް ވަރެއްގެ ޚިޔާލެއް ނެތް،"
އެ މަނިކުފާނު ވިދާޅުވީ، އެމްޑީޕީއާ ވާހަކަދެއްކިދާނެ ކަމަށެވެ. އެކަމަކު، އެކުގައި ސިޔާސީ މަސައްކަތް ނުކުރެއްވޭނެ ކަމަށް ވިދާޅުވިއެވެ.
ޔާމީން ވިދާޅުވީ، އެ މަނިކުފާނު އެމްޑީޕީއަށް އިތުބާރު ވެސް ނުކުރައްވާ ކަމަށެވެ. އެ ޕާޓީން މަސައްކަތް ކުރަނީ ރައްޔިތުންގެ ހައްގުގައި ކަމަށް ވެސް ގަބޫލުނުކުރައްވާ ކަމަށް އެ މަނިކުފާނު ވިދާޅުވިއެވެ. ޚާއްސަކޮށް، އިންޑިއާ ސިފައިންގެ މައްސަލަ ފަދަ ކަންކަމުގައި ޒިންމާ ނަގަންޖެހޭ ބަޔަކީ އެމްޑީޕީއަށް ވުމުން އެ ޕާޓީއާ ގުޅެވެން ނެތް ކަމަށް އެ މަނިކުފާނު ވިދާޅުވިއެވެ.
ފާހަގަކޮށްލެވޭ ގޮތުގައި ޔާމީން ވަނީ އިގުތިސާދީ ކަންކަން ހަމައަކަށް އެޅުވުމަށާއި އިންޑިއާ ސިފައިން ބޭރުކުރުމުގެ އިތުރުން ފޯޅަވަހި މައްސަލަ ހައްލުކުރަން ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބުގައި ވާދަކުރައްވާނެ ކަމަށް ވިދާޅުވެފައެވެ.
މި ސަރުކާރު ވެރިކަމަށް އައިތާ ހަފުތާއެއް ނުވަނީސް ޔާމީން ވަނީ ޕީޕީއެމް/ޕީއެންސީގެ ލީޑަރުކަމުން އިސްތިއުފާދެއްވައި އަމިއްލަފުޅު ޕާޓީއެއް އުފައްދަވައިފައެވެ. އެއަށް ފަހު، އެ މަނިކުފާނު ގެންދަވަނީ ސަރުކާރާއި އެމްޑީޕީއަށް ވެސް ވަރަށް ބޮޑަށް ފާޑު ވިދާޅުވަމުންނެވެ.