އެމެރިކާގެ ކުރީގެ ރައީސް ޑޮނަލްޑް ޓްރަމްޕް 2020 ވަނަ އަހަރުގެ ރިޔާސީ އިންތިޚާބުން ބޮޑު ބައްޔަކާ ކުރިމަތިލެއްވުމަށްފަހު، މި އަހަރުގެ ރިޔާސީ އިންތިޚާބުން ދެވަނަ ދައުރެއް ކަށަވަރު ކުރައްވައިފިއެވެ.
އެމެރިކާގައި އިއްޔެ ބޭއްވި ރިޔާސީ އިންތިޚާބުގައި 224 މިލިއަން މީހުންނަށް ވޯޓުލުމުގެ ހައްގު ލިބިފައިވާއިރު، މިހާތަނަށް 138 މިލިއަން ވޯޓު ވަނީ ގުނައިފައެވެ. އެ ނަތީޖާއިން ދައްކާ ގޮތުގައި ޓްރަމްޕަށް 51.06 ޕަސެންޓު ވޯޓު ލިބިފައިވާއިރު ނައިބު ރައީސް އަދި ވެރިކަން ކުރާ ޑިމޮކްރެޓިކް ޕާޓީގެ ކެންޑިޑޭޓް ކަމަލާ ހެރިސްއަށް ލިބިފައިވަނީ 47.45 ޕަސެންޓް ވޯޓެވެ.
އެ އިންތިޚާބުގައި ކެންޑިޑޭޓުންނަށް ކުރި ލިބޭނީ އެ ބޭފުޅަކަށް އެންމެ ގިނައިން ވޯޓު ލިބޭ ސްޓޭޓެއްގެ ގޮތުންނެވެ. އެގޮތުން ކޮންމެ ސްޓޭޓެއްގައި ކޮންމެ ކެންޑިޑޭޓަކަށް ވެސް، އެ ސްޓޭޓެއްގެ ކޮންގްރެސް މެންބަރުންނާ އެއް އަދަދަކަށް 'އިލެކްޓާސް' ކަނޑައަޅައިފައި ތިބޭނެއެވެ.
އެހެންކަމުން ބައެއް ސްޓޭޓްތަކުގައި އިލެކްޓާސް ގިނައިރު، އެހެން ސްޓޭޓުތަކުގައި މަދުވާނެ އެވެ. އަދި އިންތިޚާބުގައި އާންމު ރައްޔިތުން ދޭ ވޯޓަށް ފަހު، ކޮންމެ ސްޓޭޓެއްގެ އިލެކްޓާސް ވެސް ފަހުން އެއްވެ، ވޯޓު ދޭނެއެވެ. އެ އިލެކްޓާސްގެ ވޯޓު ދޭނީ އެ ސްޓޭޓެއްގެ އެންމެ ގިނަ ރައްޔިތުން ވޯޓު ދިން ކެންޑިޑޭޓަކަށެވެ.
ރައީސް ކަމަށް އިންތިޚާބު ވާނީ ޖުމްލަ 538 އިލެކްޓާސްގެ ތެރެއިން 270 އިލެކްޓޯރަލް ވޯޓު ލިބޭ ކެންޑިޑޭޓެކެވެ.
މިހާތަނަށް ގުނައިފައިވާ ވޯޓުން ދައްކާ ގޮތުގައި ޓްރަމްޕަށް ވަނީ 277 އިލެކްޓޯރަލް ވޯޓު ލިބިފައެވެ. ހެރިސްއަށް ލިބިފައިވަނީ 224 އިލެކްޓޯރަލް ވޯޓެވެ.
އެހެންވެ، ޓްރަމްޕަށް ވަނީ އެމެރިކާގެ 47 ވަނަ ރައީސްކަން ގާތްގަނޑަކަށް ކަށަވަރުވެފައެވެ.
ޓްރަމްޕް ވަނީ ކާމިޔާބީ އިއުލާން ކުރައްވައި އެމެރިކާގެ ރައްޔިތުންނަށް ޝުކުރު އަދާކުރައްވައިފައެވެ. އަދި ދެން އޮތީ އެގައުމުގެ 'ރަން ޒަމާނެއް' ކަމަށް ވިދާޅުވިއެވެ.
ރިޔާސީ އިންތިޚާބުގެ ނަތީޖާއާ ގުޅޭ ގޮތުން ހެރިސް މިހާތަނަށް އެއްޗެކޭ ވިދާޅުވެފައިނުވެއެވެ.
ޓްރަމްޕް 2017ގައި އިންތިޚާބުވީ ޑިމޮކްރެޓިކް ކެންޑިޑޭޓް ހިލަރީ ކްލިންޓަންއާ ވާދަކުރައްވައެވެ. އެ ފަހަރު ގިނަ ވޯޓު ލިބުނީ ކްލިންޓަންއަށް ނަމަވެސް، ޓްރަމްޕަށް ކާމިޔާބުވި އިލެކްޓާސްގެ އަދަދު އިތުރުވުމުން ރައީސް ކަމަށް ހޮވުނީއެވެ. އެއީ ކްލިންޓަންއަށް 227 އިލެކްޓޯރަލް ވޯޓު ލިބުނު ނަމަވެސް ޓްރަމްޕަށް 304 އިލެކްޓޯރަލް ވޯޓު ލިބުމުންނެވެ.
އެއަށްފަހު ދެވަނަ ދައުރަކަށް ކުރިމަތިލެއްވި އިންތިޚާބުގައި ޓްރަމްޕަށް ލިބުނީ 232 އިލެކްޓޯރަލް ވޯޓެވެ. އަދި 306 އިލެކްޓޯރަލް ވޯޓާއެކު ރައީސް ޖޯ ބައިޑެން ކުރި ހޯއްދެވިއެވެ.
އެ އިންތިޚާބަށް ފަހު ޓްރަމްޕް ނަތީޖާ ގަބޫލުކުރައްވަން ދެކޮޅު ހެއްދެވިއެވެ. އަދި ޓްރަމްޕްގެ ތާއިދާއެކު، އޭނާއަށް ތާއިދުކުރާ ބަޔަކު ކޮންގްރެސް އިމާރާތަށް ވަދެ ހަމަނުޖެހުން ހިންގި މައްސަލަ ބޮޑުވިއެވެ.
ޓްރަމްޕާ ގުޅުން ހުރި މައްސަލަތަކެއް މިހާރު ވެސް އެމެރިކާގެ ކޯޓުތަކުން ބަލަމުން އަންނައިރު، އޭނާ ގުޅުން ބޭއްވި އަންހެނަކަށް ފައިސާ ދީގެން އެ ވާހަކަ އޮއްބާލަން މަސައްކަތްކުރި ކަމަށް ބުނެ ކޮށްފައިވާ ދައުވާއެއް މިދިޔަ މެއި މަހު ސާބިތުވެސް ވެފައިވެއެވެ. ނަމަވެސް އެ މައްސަލަ ބެއްލެވި ފަނޑިޔާރު ނިންމެވީ އިންތިޚާބަށް ފަހު ހުކުމް ކުރުމަށެވެ.