އެމެރިކާގެ ކުރީގެ ރައީސް ބިލް ކްލިންޓަން ހޮސްޕިޓަލްގައި އެޑްމިޓްކޮށްފައިވާ ކަމަށް ޑިމޮކްރެޓިކް ޕާޓީގެ ތަރުޖަމާނަކު ވިދާޅުވެއްޖެއެވެ.
ތަރުޖަމާނު އޭންޖަލް ޔޫރޭނާއާ ހަވާލީ ބީބީސީން ރިޕޯޓުކޮށްފައިވާ ގޮތުގައި އެމަނިކުފާނު އެޑްމިޓްކުރީ ހުމުގެ އާލާސްކަންފުޅެއްގައެވެ. އެޑްމިޓްކޮށްފައި ވަނީ އިއްޔެ ހަވީރު ވޮޝިންޓަން ޑީސީގެ ޖޯޖްޓައުން ޔުނިވާސިޓީ މެޑިކަލް ސެންޓަރުގައެވެ.
އެމެރިކާގެ މީޑިއާތަކުން ބުނާ ގޮތުގައި ކްލިންޓަންގެ ހާލުކޮޅު މިހާރު އަންނަނީ ރަނގަޅުވަމުންނެވެ.
ހަތްދިހަ އަށް އަހަރުގެ ކްލިންޓަން އެންމެ ފަހުން އެޑްމިޓްކޮށްފައި ވަނީ 2021 ވަނަ އަހަރު ކެލިފޯނިއާގެ ހޮސްޕިޓަލެއްގައެވެ. އެ ފަހަރު އެޑްމިޓްކޮށްފައި ވަނީ ލޭގައި އިންފެކްޝަން ހެދިގެންނެވެ. އާލާސްކަންފުޅުގައި ހަ ދުވަހު އެޑްމިޓްވެގެން އޮންނަވަން ޖެހިވަޑައިގަތެވެ.
އުމުރުން 58 އަހަރުގައި 2004 ވަނަ އަހަރު ޑޮކްޓަރުންނަށް ހިތުގެ ބޮޑު ބަލީގެ އަލާމާތްތައް ފެނުމުން ކުއަޑްރޫޕްލް ބައިޕާސް ސާޖަރީއެއްވެސް ކްލިންޓަން ހެއްދެވިއެވެ. އޭގެ ދިހަ އަހަރު ފަހުން ވެސް އޯޕަން ސާޖަރީއެއް ކުރައްވާފައިވެއެވެ.
ކްލިންޓަން ވަނީ މި އަހަރު ރިޔާސީ އިންތިޚާބުގައި ޑިމޮކްރެޓިކް ޕާޓިން ވާދަކުރެއްވި ނާއިބު ރައީސް ކަމާލާ ހެރިސްއަށް ކެމްޕޭނުކޮށްދެއްވުމުގައި ވަރަށް ހަރަކާތްތެރިކޮށް އުޅުއްވާފައެވެ.
މިދިޔަ މަހު އޭނާ ވަނީ އޭނާގެ އެންމެ ފަހުން ލިޔުއްވި ފޮތް "ސިޓިޒަން: މައި ލައިފް އަފްޓާ ދަ ވައިޓް ހައުސް" ނެރުއްވާފައެވެ.
ކްލިންޓަން އެމެރިކާގެ ރައީސްކަން ކުރެއްވީ 1993 ން 2001 އަށެވެ. އެމަނިކުފާނަކީ އެމެރިކާގެ 42 ވަނަ ރައީސްއެވެ.