އެމެރިކާގެ ރިޔާސީ އިންތިޚާބު ކާމިޔާބުކުރެއްވި އެ ގައުމުގެ ކުރީގެ ރައީސް ޑޮނަލްޑް ޓްރަމްޕަށް ރައީސް ޑރ. މުޙައްމަދު މުއިއްޒު މިއަދު މަރުހަބާ ދަންނަވައި، އެއްބާރުލުން އިތުރުކުރަން ތައްޔާރަށް ހުންނެވި ކަމަށް ވިދާޅުވެއްޖެއެވެ.
ޓްރަމްޕް ވަނީ ރިޔާސީ އިންތިޚާބުގެ ކާމިޔާބީ އިއުލާނުކުރައްވާފައެވެ.
އެ ކަމާ ގުޅިގެން ޓްރަމްޕަށް މަރުހަބާ ދަންނަވައި ރައީސް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖެއާއި އެމެރިކާއާ ދެމެދު އޮތް ވަރުގަދަ ގުޅުމަކީ އިޙުތިރާމާއި އެއް ގައުމުން އަނެއް ގައުމުގެ ކަންކަން ދެނެގަތުމުގެ މައްޗަށް އެކުލެވޭ ގުޅުމެއް ކަމަށެވެ.
ދެ ގައުމުގެ އެއްބާރުލުން އިތުރަށް ހަރުދަނާކޮށް، ދުނިޔޭގެ ސުލްހައާއި ކުރިއެރުމަށް ގުޅިގެން މަސައްކަތް ކުރަން ތައްޔާރަށް ހުންނެވި ކަމަށް ރައީސް ވިދާޅުވިއެވެ.
އެމެރިކާގެ ރައީސް އިންތިޚާބު ކުރަނީ އެ ގައުމުގެ ސްޓޭޓްތަކުގެ އެލެކްޓަރުން ތިއްބަވާ އިލެކްޓޯރަލް ކޮލެޖުގެ ވޯޓުންނެވެ. އިލެކްޓޯރަލް ކޮލެޖްގައި ތިއްބަވާ 538 އިލެކްޓަރުންގެ ތެރެއިން 270 އިލެކްޓަރުންގެ ވޯޓު ލިބޭ ބޭފުޅަކަށް އިންތިޚާބު ކާމިޔާބު ކުރެއްވޭނެއެވެ.
އިލެކްޓޯރަލް ކޮލެޖްގެ ވޯޓުގެ ދެބައިކުޅަ އެއްބަޔަކީ 269 އެވެ. ޖުމުލަ 270 އިލެކްޓަރުންގެ ވޯޓަކީ އަޣްލަބިއްޔަތަށްވުރެ އެއް ވޯޓު ގިނަ މިންވަރެކެވެ. އެހެންކަމުން 270 ވޯޓު ލިބޭ ކެންޑިޑޭޓަކީ އިންތިޚާބު ކާމިޔާބުކުރައްވާ ކެންޑިޑޭޓެވެ.
މިހާތަނަށް ގުނާފައިވާ ޕޮޕިއުލާ ވޯޓަށް ބެލުމަށް ފަހު އިލެކްޓޯރަލް ކޮލެޖްގެ އިލެކްޓަރުންގެ ތެރެއިން 267 އިލެކްޓަރުންވަނީ ޓްރަމްޕަށް ވޯޓު ދެއްވާފައެވެ. ދެން އޭނާ ހޯއްދަވަން ޖެހޭނީ ތިން އިލެކްޓަރުންގެ ވޯޓެވެ.
ޓްރަމްޕްއާ ވާދަކުރައްވާ ނައިބު ރައީސް ކަމަލާ ހެރިސްއަށް ލިބިފައިވަނީ 224 އިލެކްޓަރުންގެ ވޯޓެވެ. އިންތިޚާބު ކާމިޔާބުކުރުމަށް ހެރިސް އަދި އިލެކްޓަރުންގެ 56 ވޯޓު ހޯއްދަވަން ޖެހޭނެއެވެ. މިއީ ވުމަށްވުރެ ނުވުން ގާތްކަމެއްކަމަށް އެމެރިކާގެ އިންތިޚާބާބެހޭ ތަޖުރިބާކާރުން ވިދާޅުވެއެވެ.
ސަބަބަކީ އެމެރިކާގެ ރިޔާސީ އިންތިޚާބު ކާމިޔާބު ކުރައްވާ ކެންޑިޑޭޓް ކަނޑައަޅާ އެންމެ މުހިއްމު ހަތް ސްޓޭޓް (ސްވިންގް ސްޓޭޓް)ތަކުގެ ތެރެއިން ދެ ސްޓޭޓެއްގެ ވޯޓު ކާމިޔާބުކުރައްވާފައިވަނީ ޓްރަމްޕް ކަމަށްވެފައި އަނެއް ފަސް ސްޓޭޓްގެ ތެރެއިން ވެސް ދެ ސްޓޭޓެއްގައި ކުރީގައި އުޅުއްވަނީ ޓްރަމްޕް ކަމަށްވާތީއެވެ. ހެރިސްއަށް ކިރިޔާ ވެސް ފުރުސަތެއް އޮތީ މި ފަސް ސްޓޭޓް އެއްކޮށް ކާމިޔާބުކުރެއްވިގެންނެވެ. މިއީ ވުމަށްވުރެ ނުވުން ގާތްކަމެކެވެ.
މި ހަތް ސްޓޭޓަކީ ޕެންސިލްވީނިއާ، މިޝިގަން، ވިސްކޮންސިން، ނޯތު ކެރޮލައިނާ، ޖޯޖިޔާ، އެރިޒޯނާ، އަދި ނެވާޑާއެވެ. މީގެ ތެރެއިން ނޯތު ކެރޮލައިނާ، ޖޯޖިޔާގެ ވޯޓު ކާމިޔާބު ކުރެއްވީ ޓްރަމްޕެވެ.