ވޮޝިންޓަން (6 ނޮވެންބަރު 2024): އެމެރިކާގެ ރިޔާސީ އިންތިޚާބުގެ ވޯޓުލުން ނިމި ވޯޓު ގުނަމުންދާއިރު, ކުރީގެ ރައީސް ޑޮނަލްޑް ޓްރަމްޕް ކާމިޔާބީ އިއުލާން ކުރައްވައިފިއެވެ.
އެމެރިކާގެ ރައީސް އިންތިޚާބު ކުރަނީ އެގައުމުގެ ސްޓޭޓްތަކުގެ އެލެކްޓަރުން ތިއްބަވާ އިލެކްޓޯރަލް ކޮލެޖުގެ ވޯޓުންނެވެ. ރައްޔިތުންގެ ވޯޓަކީ އެމެރިކާގެ ރިޔާސީ އިންތިޚާބު ކާމިޔާބުކުރުމަށް މުހިއްމު ވޯޓެއް ނޫނެވެ. އިލެކްޓޯރަލް ކޮލެޖްގައި ތިއްބަވާ 538 އިލެކްޓަރުންގެ ތެރެއިން 270 އިލެކްޓަރުންގެ ވޯޓު ލިބޭ ބޭފުޅަކަށް އިންތިޚާބު ކާމިޔާބު ކުރެއްވޭނެއެވެ.
އިލެކްޓޯރަލް ކޮލެޖް ގެ ވޯޓުގެ ދެބައިކުޅަ އެއްބަޔަކީ 269 އެވެ. 270 އިލެކްޓަރުންގެ ވޯޓަކީ އަޣްލަބިއްޔަތަށްވުރެ އެއްވޯޓު ގިނަ މިންވަރެކެވެ. އެހެންކަމުން 270 ވޯޓު ލިބޭ ކެންޑިޑޭޓަކީ އިންތިޚާބު ކާމިޔާބު ކުރައްވާ ކެންޑިޑޭޓެވެ.
މިހާތަނަށް ގުނާފައިވާ ޕޮޕިއުލާ ވޯޓަށް ބެލުމަށްފަހު އިލެކްޓޯރަލް ކޮލެޖްގެ އިލެކްޓަރުންގެ ތެރެއިން 267 އިލެކްޓަރުންވަނީ ޓްރަމްޕަށް ވޯޓު ދެއްވާފައެވެ. ދެން އޭނާ ހޯއްދަވަން ޖެހޭނީ ތިން އިލެކްޓަރުންގެ ވޯޓެވެ.
ކަމަލާ އަށް ބަލާއިރު އޭނާއަށް ލިބިފައިވަނީ 214 އިލެކްޓަރުންގެ ވޯޓެވެ. އިންތިޚާބު ކާމިޔާބު ކުރުމަށް ކަމަލާ އަދި އިލެކްޓަރުންގެ 56 ވޯޓު ހޯއްދަވަން ޖެހޭނެއެވެ. މިއީ ވުމަށްވުރެ ނުވުން ގާތްކަމެއްކަމަށް އެމެރިކާގެ އިންތިޚާބާބެހޭ ތަޖުރިބާކާރުން ވިދާޅުވެއެވެ.
ސަބަބަކީ އެމެރިކާގެ ރިޔާސީ އިންތިޚާބު ކާމިޔާބު ކުރައްވާ ކެންޑިޑޭޓް ކަނޑައަޅާ އެންމެ މުހިއްމު 7 ސްޓޭޓް (ސްވިންގް ސްޓޭޓް) ތަކުގެ ތެރެއިން ދެ ސްޓޭޓެއްގެ ވޯޓު ކާމިޔާބު ކުރައްވާފައިވަނީ ޓްރަމްޕް ކަމަށް ވެފައި އަނެއް ފަސް ސްޓޭޓް ގެ ތެރެއިންވެސް ދެ ސްޓޭޓެއްގައި ކުރީގައި އުޅުއްވަނީ ޓްރަމްޕް ކަމަށްވާތީއެވެ. ކަމަލާއަށް ކިރިޔާވެސް ފުރުސަތެއް އޮތީ މި ފަސް ސްޓޭޓް އެއްކޮށް ކާމިޔާބު ކުރެއްވިގެންނެވެ. މިއީ ވުމަށްވުރެ ނުވުން ގާތްކަމެކެވެ.
މި 7 ސްޓޭޓަކީ ޕެންސިލްވީނިއާ، މިޝިގަން، ވިސްކޮންސިން، ނޯތު ކެރޮލައިނާ، ޖޯޖިޔާ، އެރިޒޯނާ، އަދި ނެވާޑާ އެވެ. މީގެތެރެއިން ނޯތު ކެރޮލައިނާ، ޖޯޖިޔާ ގެ ވޯޓު ކާމިޔާބު ކުރެއްވީ ޓްރަމްޕެވެ.
މި 7 ސްޓޭޓަކީ އެމެރިކާގެ ރިޔާސީ އިންތިޚާބުގެ ނަތީޖާ އަށް ބަދަލުތައް ގެނުވަ ސްޓޭޓްތަކެވެ. ޕޮޕިއުލާ ވޯޓު ނުވަތަ ރައްޔިތުންގެ ވޯޓަށް ބަލާއިރުވެސް ޓްރަމްޕް އުޅުއްވަނީ ކަމަލާއަށްވުރެ ގާތްގަނޑަކަށް 5 މިލިޔަން ވޯޓު ކުރީގައެވެ. ނަމަވެސް އެމެރިކާގެ ރިޔާސީ އިންތިޚާބު ކާމިޔާބު ކުރުމަށް ރައްޔިތުންގެ ވޯޓަކީ އެހާ މުހިއްމު ވޯޓެއް ނޫނެވެ.
އެމެރިކާގެ ރައީސް އިންތިޚާބު ކުރަނީ ދެ ބާވަތެއްގެ ވޯޓަކުންނެވެ. އެއްވޯޓަކީ ރައްޔިތުންގެ ވޯޓު ނުވަތަ ޕޮޕިއުލާ ވޯޓެވެ. އަނެއް ވޯޓަކީ އެމެރިކާގެ ސްޓޭޓްތަކުން ދޭ ވޯޓެވެ. ސްޓޭޓްތަކުން ދޭ ވޯޓަށް ކިޔަނީ އިލެކްޓޯރަލް ކޮލެޖް ގެ ވޯޓެވެ.
ރިޔާސީ އިންތިޚާބު ކާމިޔާބު ކުރެވެނީ ރައްޔިތުންގެ ވޯޓަށް ބަލައި އެއަށް ރިއާޔަތްކޮށްފައި އިލެކްޓޯރަލް ކޮލެޖުގައި ތިއްބަވާ އިލެކްޓަރުން ދޭ ވޯޓުގެ އަޣްލަބިއްތު ލިބުމުންނެވެ. އެއީ އެމެރިކާގެ ރައީސަކީ ރައްޔިތުން ނުސީދާކޮށް އިންތިޚާބުކުރާ އަދި ސްޓޭޓްތަކުގެ ވޯޓުން ސީދާ ގޮތެއްގައި އިންތިޚާބު ކުރާ ބޭފުޅަކަށް ވާތީއެވެ.
މިއީ އެމެރިކާގެ ޑިމޮކްރަސީ އާއި އެމެރިކާގެ ވެރިކަމުގެ ނިޒާމު 18 ވަނަ ގަރުނުގެ ތެރޭގައި ބައްޓަންކުރެއްވި "ފައުންޑިން ފާދާސް" އިން އެގައުމުގެ ނިޒާމު ބައްޓަން ކުރައްވާފައިވާ ގޮތެވެ. އެމެރިކާގެ "ފައުންޑިން ފާދާސް" ގެ ގޮތުގައި ބެލެވެނީ 7 ބޭފުޅަކަށެވެ. އެއީ ޖޯން އެޑަމްސް، ބެންޖަމިން ފްރަންކްލިން، އެލެގްޒެންޑަރ ހެމިލްޓަން، ޖޯން ޖެއި، ތޯމަސް ޖެފްރިސަން، ޖޭމްސް މެޑިސަން އަދި ޖޯޖް ވޮޝިންޓަން މި 7 ބޭފުޅުންނެވެ.