އެންމެން ބަލަން ތިއްބާ, އިއްޔެ ފަތިހު މަޖީދީ މަގުގައި ހުރި ފޯނު ފިހާރައެއް ފަޅާލައި، ވައްކަންކުރިކަމުގެ ތުހުމަތުވާ މީހާގެ ބަންދަށް ކްރިމިނަލް ކޯޓުން 20 ދުވަސް ޖަހައިފިއެވެ.
މި މައްސަލައާ ގުޅިގެން ފުލުހުން އިއްޔެ މީޑިއާތަކާ ހިއްސާކުރި މެސެޖެއްގައި ބުނީ، މި މައްސަލައިގައި ހައްޔަރުކޮށްފައިވަނީ ހއ. މާރަންދޫ، ފިނިރޯޅި، އަހުމަދު ނިޔާޒް (47އ) ކަމަށެވެ.
އޭނާ ހައްޔަރުކޮށް، ގެންގުޅުނު ދަބަސް ބަލައި ފާސްކުރިއިރު އެ ފިހާރައިން ވަގަށް ނެގި ކަމަށް ތުހުމަތުކުރެވޭ ނުވަ ފޯނު ފެނިފައިވާ ކަމަށް ފުލުހުން ބުންޏެވެ.
މީސްމީޑިއާގައި ދައުރުވަމުން އަންނަ ވީޑިއޯތަކުން ފެންނަ ގޮތުގައި މަގުމަތިން ހިނގާފައި ދިޔަ މީހަކު ފުރަތަމަ އެ ފިހާރައިގެ ބިއްލޫރިގަނޑު ތަޅައިލާ މަންޒަރު ފެނެއެވެ. އޭގެ ފަހުން މީހަކު އައިސް، ފިހާރައިން ވައްކަން ކުރާ މަންޒަރު ފެންނަ ސީސީޓީވީ ފުޓޭޖުތަކެއް އަންނަނީ ދައުރުވަމުންނެވެ.
ފިހާރައިން ވައްކަންކުރުމުގެ ތުހުމަތުގައި ހައްޔަރުކުރި އަހުމަދު ނިޔާޒް: އޭނާ އަތުން ނުވަ ފޯނު ފެނުނު ކަމަށް ފުލުހުން ބުނި --- ފޮޓޯ/ ފުލުހުން
ފިހާރައަށް ވަން މީހާ އެ ތަނުގެ ވަތްގަނޑުތައް ހަލާކުކޮށްލައި، ކޮތަޅުކޮތަޅުގައި އެއްޗެހިތަކެއް ހިފައިގެން ނުކުންނަތަން ވެސް ވީޑިއޯއިން ފެނެއެވެ. އެ މީހާ ހުރީ މޫނު ނިވާކޮށްގެންނެއް ވެސް ނޫނެވެ. އެ މީހާ އެކަން ކުރީއިރު މަގުމަތިން މީހުން ދާތަނާއި ފިހާރައާ ދިމާ ބަލާތަން ވީޑިއޯއިން ފެނެއެވެ.
އެ ވައްކަންކޮށްފައިވަނީ މަޖީދީ މަގުގައި ހުރި "ޒިއޯން މޯބައިލްސް 4" ފިހާރައިންނެވެ. ފުލުހުން ބުނީ އެ މައްސަލަ ރިޕޯޓުކުރީ އިއްޔެ 5:35 ހާއިރު ކަމަށެވެ.
ފުލުހުންގެ ތަފާސްހިސާބުން ދައްކާ ގޮތުގައި މި އަހަރުގެ މިހާތަނަށް ވައްކަމުގެ 3،124 މައްސަލަ ހުށަހަޅައިފައިވެއެވެ.