ސަރުކާރުގެ ޚަރަދުގައި ގެ ނުވަތަ ފްލެޓް އަޅައިފައި ދިނުމަަށްވުރެ ރައްޔިތުންނަށް ލޯނު ދޫކުރުމުން ފެންނަ ނަތީޖާ މާ ރަނގަޅު ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އެ މަނިކުފާނު މިފަދައިން ވިދާޅުވީ ރައީސްގެ ރިޔާސީ ވައުދުފުޅެއްކަމަށްވާ ހިޔާވަހި ފައިނޭންސިން ސްކީމް ތައާރަފްކުރުމަށް މިއަދު އޮތް ހަފްލާގައި ވާހަކަފުޅުދައްކަވަމުންނެވެ.
ރައީސް ވިދާޅުވީ މިއަދު ތާއަރްފްކުރެވުނު ސްކީމަކީ ބޯހިޔާވަހިކަމަށް ދާއީމީ ހައްލެއް ގެނައުމުގެ ގޮތުން ފެށުނު އެންމެ މުހިންމު ކަންތައް ކަމަށެވެ.
"ހަގީގަތުގައި ސަރުކާރުން ގެއެއް އަޅައިފައި ދިނުމަށްވުރެ މީގެން މި [ހިޔާވަހި] ސްކީމުން ލިބޭ ނަތީޖާ މާ ރަނގަޅު ވެސް ވާނެ. މާ ގިނަ ބަޔަކަށް އެހީ ވެސް އެބަ ލިބިގެންދޭ،" ރައީސް ވިދާޅުވިއެވެ.
ހަމައެއާއެކު ރައީސް ވިދާޅުވީ، ވައުދުވެވަޑައިގެންނެވި ގޮތަށް މާލެ ސަރަހައްދުން ލިބިފައިވާ ގޯތިތައް އިމާރާތްކޮށްދިނުމަށް ސަރުކާރުގެ ކުންފުނިތަކުން އެހީވެދޭ ސްކީމެއް ތައާރަފްކުރެއްވުމަށް ވެސް މަސައްކަތް ކުރައްވަމުން އަންނަ ކަމަށެވެ.
"...އަދި އަޅުގަނޑު ވައުދުވީ ފަދައިން މާލޭ ސަރަހައްދުން ލިބިފައި މިހުރި ގޯތިތައް ހެދުމަށް ޓަކައި އެހީތެރިކަމެއް ލިބޭ ސްކީމެއް ވެސް ތައާރަފްކުރަން މަސައްކަތް ވެސް އެބަކުރަން،" ރައީސް ވިދާޅުވިއެވެ.
އެ މަނިކުފާނު ވިދާޅުވީ އެ ސްކީމުގެ ތެރެއިން ސަރުކާރު ކުންފުންޏަކާއެކު މަސައްކަތްކޮށްގެން ގޯތީގައި ގެ އިމާރާތްކުރެވޭނެ ލުއި ގޮތެއް ހޯދޭނެކަމަށެވެ.
މިހާރު ކުރިއަށް ދަނީ އެ ކަމުގެ ޓެކްނިކަލް މަސައްކަތްކަމަށާއި އެ ކަން ފައިނަލްވުމުން ގެ އަޅައިދާނެ ސްކީމެއް ތައާރަފްކޮށް އިއުލާނުކޮށްދެއްވާނެކަމަށް ރައީސް ވިދާޅުވިއެވެ.