ބިންވެރިޔާ ސްކީމުން ކަމަށް ބުނެ ނުހައްގުން ގޯތި ދީފައިވާ ކަމަށް ތުހުމަތު ކުރެވޭ މައްސަލައިގައި ކުރިއަށްގެންދާ ތަހުގީގުގައި، ގެދޮރުވެރިޔާ ސްކީމަށް ކުރިމަތިލީ ބަޔެއްގެ އަތުގައި ވެސް ގޯތި ލިބުނު ކަމުގެ ލިޔުން އޮތްކަން ފާހަގަވެފައިވާ ކަމަށް ފުލުހުން ބުނެފިއެވެ.
ގޯއްޗަށް ޝަރުތު ހަމަނުވާ ބަޔަކަށް ގޯތި ދީފައިވާ ކަމަށް ދޭހަވާ ލިޔެކިޔުންތަކެއް ސޯޝަލް މީޑިއާގައި ވަނީ އާންމުވެފައެވެ. އޭގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑީއެމްޑީ މުހައްމަދު ފަޒީލް ރަޝީދު ހިމެނޭއިރު، އެ މައްސަލައިގައި އެޗްޑީސީއަށް ވަނީ ބޮޑު ތުހުމަތުތަކެއް އަމާޒުވެފައެވެ.
މިރޭ ފުލުހުން ބޭއްވި ނޫސްވެރިންގެ ބައްދަލުވުމެއްގައި އެސިޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވީ، ބިންވެރިޔާ ސްކީމާ ގުޅޭ ތަހުގީގުގައި ފުލުހުން އެންމެ ފުރަތަމަ އެޗްޑީސީގެ ވެރިންނާ ބައްދަލުކޮށް މައުލޫމާތު ސާފުކުރި ކަމަށެވެ.
އެޗްޑީސީގައި ބެލިބެލުމުން އެނގުނީ، ސޯޝަލް މީޑިއާގައި އާންމުވެފައިވާ ލިޔުމަކީ އެޗްޑީސީގައި ވެސް އޮތް ލިޔުމެއްކަން ކަމަށް އެއީ ވަށާފާރު ރޭނުމަށް ހުށަހަޅާފައިވާ ލިޔުމެއް ކަމަށް އޭނާ ވިދާޅުވިއެވެ. އަދި އެކަން އިތުރަށް ބެލުމުން، އެ ލިޔުން ނޫން އެފަދަ އެހެން ލިޔުން ވެސް ޕޯޓަލްއަށް ހުށަހެޅިކަން އެނގުނު ކަމަށް ޝަރީފް ވިދާޅުވިއެވެ.
"އަޅުގަނޑުމެންނަށް މިހާ ހިސާބަށް މަސައްކަތް ކުރެވުނު އިރުގައި ތިން ޕްލޮޓެއްގައި މިކަހަލަ މައްސަލަ ހުރިކަން އަދި ބައެއް ލޮޓްތަކަށް އެއް ފަރާތަށް ވުރެ ގިނަ ފަރާތުން ލިޔުން ހޯދައިގެން ޕޯޓަލް ތެރެއިން ހުށަހަޅައިފައި ހުރިކަން،" އޭނާ ވިދާޅުވިއެވެ.
އެ ކަންތައްތައް ހިނގާފައި ހުރި ގޮތަށް ބެލިއިރު، ވަށާފާރު ރާނަން އެއް ގޯއްޗަށް އެކަކަށް ވުރެ ގިނަ މީހުން ކުރިމަތިލުމުން ލިޔެކިޔުމުގެ ސައްހަކަން ހޯދަން އެޗްޑީސީން ހައުސިން މިނިސްޓްރީގައި އެދިފައިވާކަން އެނގުނު ކަމަށް ޝަރީފް ވިދާޅުވިއެވެ.
"އަޅުގަނޑުމެންނަށް ފާހަގަވީ މިގޮތަށް އެދިފައި ހުރި ހުރިހާ ފަރާތްތަކަކީ ވެސް މި ސްކީމްގެ ދަށުން ޝަރުތު ހަމަނުވާ އަދި މިކަމަށް ހުށަވެސް ނާޅާ ބައެއް ފަރާތްތަކުން ހޯދައިފައި ހުރި ލިޔެކިޔުންތައް،" އޭނާ ވިދާޅުވިއެވެ.
ފުލުހުން އެ މީހުންނާ ސުވާލުކުރުމުން، އޭގެ ތެރެއިން ބައެއް މީހުންނަކީ ޝަރުތު ހަމަނުވާ ކަމަށް ކަނޑައެޅުމުން އެކަން ގަބޫލުނުކޮށް، ކުރީ ސަރުކާރުގެ ހައުސިން މިނިސްޓްރީގެ އިސް ފަރާތްތަކާ ބައްދަލުކުރި މީހުންކަން އެނގުނު ކަމަށް ޝަރީފް ވިދާޅުވިއެވެ.
މިނިސްޓްރީގެ އިސް މީހުންނާ ބައްދަލުކުރުމުން، ޝަކުވާ ބަލާނެ ކަމަށް އެންގި ކަމަށް ވެސް އެ މީހުން ބުނި ކަމަށް އޭނާ ވިދާޅުވިއެވެ.
"އަދި ނިންމައިފައި އޭނާ އެ ކުރި ޝަކުވާ ބަލާޏެ ކަމަށް ބުނެ އެ މައުލޫމާތު އަޅުގަނޑުމެންނަށް ދީފައި ހުރި. އަދި އޭގެ ފަހުން އެ ފަރާތްތަކަށް ގުޅައި ބިން ހަމަޖެފހިައވާ ކަމަށް ހައުސިން މިނިސްޓްރިން ގުޅައިގެން ގޮސް އެ ލިޔުމުގައި ސޮއި ކުރިކަމަށް ވެސް އެއް ފަރާތަކުން ބުނެފައިވޭ،" ޝަރީފް ވިދާޅުވިއެވެ.
"އަދި ބައެއް ފަރާތްތަކުން އަޅުގަނޑުމެން މި މައުލޫމާތު ސާފު ކުރި އިރުގައި އެޕާޓްމެންޓަށް ކުރިމަތިލީ ބައެއް ފަރާތްތަކަށް ވެސް އެބަހުރި ބިން ލިބުނު ކަމަށް ލިޔުން ހޯދައިފައި."
މިހާތަނަށް ތަހުގީގު ކުރިއަށްގޮސްފައިވަނީ 24 ގަޑިއިރަށްކަން ފާހަގަކުރައްވައި އޭނާ ވިދާޅުވީ، މި މައްސަލަ އިތުރަށް ވެސް ތަހުގީގު ކުރަން ޖެހޭކަން މިހާރު އެނގިފައިވާ ކަމަށެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމައިފައިވެއެވެ. އެ ގޯތިތައް ދޫކޮށްފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ.
ގެދޮރުވެރިޔާ ސްކީމުން ފުލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި 15،000 އަށްވުރެ ގިނަ މީހުނަށް ފުލެޓު ދިނުމަށް އެމްޑީޕީ ސަރުކާރުން އޮތީ ނިންމައިފައެވެ. އޭގެ ތެރެއިން ފުރަތަމަ 4،000 ފުލެޓް ލިބޭ މީހުންގެ ލިސްޓެއް އެމްޑީޕީ ސަރުކާރުގައި ނެރުނު ނަމަވެސް، އެ ލިސްޓުން މައްސަލަތަކެއް ފާހަގަވެ، އޭސީސީން މައްސަލަ ބަލާތީ ފުލެޓު ދިނުން ލަސްވިއެވެ.
އެ މައްސަލަތަކާ ގުޅޭ ގޮތުން ގޮތް ނިންމަން ހައުސިން މިނިސްޓްރީއާ ހަވާލުކުރުމުން، ފުލެޓު ލިސްޓު މުރާޖާ ކުރަން ކޮމިޓީއެއް އެކުލަވައިލީއެވެ. އެ ކޮމިޓީން ބަލައި، ލިސްޓު އާންމުކުރަން އެންމެ ފަހުން ދިން ތާރީޚަކީ މިދިޔަ މަހުގެ 16 ކަމަށްވާއިރު، އެ ތާރީޚަށް ވެސް މަސައްކަތްތައް ނުނިމި މިހާރު ފުލެޓު ލިބޭ ފަރާތްތައް ކަށަވަރު ވާނެ ދުވަހެއް އޮތީ ނޭނގިފައެވެ.
ގޯއްޗާއި ފްލުޓު ދިނުން ލަސްވާތީ ނުރުހުން ފާޅުކޮށް، މާލޭގައި މީގެ ކުރިން މުޒާހަރާތައް ވެސް ބާއްވާފައިވެއެވެ.