މިއަދު އިފްތިތާހުކުރެވުނު ހިޔާވަހި ފައިނޭންސިން ސްކީމަކީ އެންމެ ފަހަރަކު ކުރިއަށް ގެންދާނެ ކަމެއް ނޫން ކަމަށާއި، މިއީ ދާއީމީ ގޮތެއްގައި ކުރިއަށް ގެންދާނެ ފައިނޭންސިން ސްކީމެއް ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އެ ސްކީމް ތައާރަފްކުރުމުގެ ހަފްލާގައި ވާހަކަފުޅުދައްކަވަމުން ރައީސް ވިދާޅުވީ، މިއީ ކުރިއަށް އޮތް ހަތަރު އަހަރު ވެސް ކުރިއަށް ގެންދާނެ ސްކީމެއް ކަމަށެވެ. އަދި މި ކަމަށް ކޮންމެ އަހަރަކު ވެސް ސަރުކާރުގެ ބަޖެޓުގައި އެއް ބިލިއަން ރުފިޔާ ހިމަނާނެ ކަމަށް ވެސް އެ މަނިކުފާނު ވިދާޅުވިއެވެ.
"މިއީ މިއަދު ފަށައިފައި މި އަންނަ އަހަރު ހުއްޓައިލައި ސްކީމެއް ނޫން. މިއީ ދާއިމަށް އިރާދަކުރެއްވީތީ ކޮންމެ އަހަރަކު ވެސް ކުރިއަށް ގެންދާނެ މަޝްރޫއެއް. މި އަހަރު މި ފާސްކުރަން ހުށަހަޅައިފައި އޮތް މި އަންނަ އަހަރުގެ ބަޖެޓުގެ، 2025ގެ ބަޖެޓުގައި، މި ސްކީމް، މިއަދު މި އިއުލާނުކުރި ސްކީމް ކުރިއަށް ގެންދިއުމަށް އެއް ބިލިއަން ރުފިޔާ ސަރުކާރު ބަޖެޓުން ކަނޑައަޅައިފައިވާނެ،" ރައީސް ވިދާޅުވިއެވެ.
އެ މަނިކުފާނު ވިދާޅުވީ އެއް ބިލިއަން ރުފިޔާ އިންވެސްޓުކޮށްގެން ދެ ބިލިއަނަށްވުރެ ގިނަ ރުފިޔާގެ ލޯނު އަހަރު ތެރޭ ދޫކުރެވޭނެ ކަމަށެވެ.
"އެއް ބިލިއަން ރުފިޔާ އިންވެސްޓުކުރެވިގެން ޚަރަދުކުރެވިގެންދާނީ މި ރޭވިފައި އޮތް ގޮތުން ކަމުގައިވާތީވެ އިފެކްޓިވްލީ ހަގީގަތުގައި ދެ ބިލިއަނަށްވުރެ ގިނަ ރުފިޔާގެ ލޯނު މި ސްކީމްގެ ދަށުން ދެންމެ މި އިއުލާނުކުރެވުނު އެއް ބިލިއަން ރުފިޔާގެ ކެޕްގެ ދަށުގައި...،" ރައީސް ވިދާޅުވިއެވެ.
އެ މަނިކުފާނު ވިދާޅުވީ މި ސްކީމްގެ ސަަބަބުން ގެދޮރު ބިނާކުރަން ބޭނުންވެފައިތިބި ފަރާތްތަކަށް އެ ފުރުސަތު ވަރަށް ބޮޑަށް ތަނަވަސްވާނެ ކަމަށެވެ.
އަދި މިއަދު ތަންފީޒުކުރެވެން ފެށުނީ އެ މަނިކުފާނު ވައުދުވެވަޑައިގެންނެވި ކަންކަން ކަމަށާއި އެންމެ އިސްކަންދެއްވަނީ ވައުދުތައް ފުއްދަވަން ކަމަށް ވެސް ވިދާޅުވިއެވެ. އަދި މި ސްކީމުން ރާއްޖޭގައި އޮތް ގެދޮރުވެރިކަމުގެ މައްސަލަ ހައްލުކުރުމަށް އެންމެ ފުރިހަމަ ނަތީޖާ ނެރެދޭނެ ކަމަށް ވެސް ވިދާޅުވިއެވެ.
"މި ލޯނު ސްކީމުގެ ސަބަބުން އިރާދަކުރެއްވިއްޔާ އެތައް ހާސް ރައްޔިތަކަށް އެ މަގުފަހިވެގެން އެބަދޭ،" ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ އެ މަނިކުފާނުގެ ދައުރު ނިމޭއިރު ދެކެވަޑައިގަންނަވަން ބޭނުންފުޅުވަނީ ގެދޮރުވެރިކަން ނެތް އެެއްވެސް ރައްޔިތަކު ނެތް މަންޒަރު ކަމަށް ވެސް ވިދާޅުވިއެވެ.