މިނިވަން މުއައްސަސާތަކުގެ ތެރެއިން އެންޓި ކޮރަޕްޝަން ކޮމިޝަން (އޭސީސީ)އާއި އިލެކްޝަންސް ކޮމިޝަން (އީސީ)ގެ ރައީސުން އައްޔަންކުރުމުގެ ބާރު ރައީސުލްޖުމްޙޫރިއްޔާއަށް ދޭގޮތަށް ގާނޫނަށް ބަދަލުގެންނަން ރައްޔިތުންގެ މަޖިލީހަށް ހުށަހެޅި ދެ ބިލު ބަލައިގަނެ، ކޮމިޓީއަށް މިއަދު ފޮނުވައިފިއެވެ.
މިއަދުގެ ޖަލްސާގައި ނެގި ވޯޓުގައި އޭސީސީގެ ރައީސުން އައްޔަންކުރުމުގެ ބާރު ރައީސުލްޖުމްޙޫރިއްޔާއަށް ދޭގޮތަށް ގާނޫނަށް އިސްލާހު ގެނައުމުގެ ބިލު ބަލައިގެންފައިވަނީ 60 މެންބަރުންގެ ވޯޓާ އެކުއެވެ. ދެކޮޅަށް ވޯޓުދެއްވާފައިވަނީ އެންމެ ފަސް މެންބަރުންނެވެ.
އީސީގެ ރައީސުން އައްޔަންކުރުމުގެ ބާރު ރައީސުލްޖުމްޙޫރިއްޔާއަށް ދޭގޮތަށް ގާނޫނަށް އިސްލާހު ގެނައުމުގެ ބިލު ބަލައިގެންފައިވަނީ 60 މެންބަރުންގެ ވޯޓާ އެކުއެވެ. ދެކޮޅަށް ވޯޓުދެއްވާފައިވަނީ އެންމެ ހަ މެންބަރުންނެވެ.
އެއާއެކު މި ދެ ބިލު އިތުރަށް ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފައެވެ.
މި ބިލަށް މަޖިލިސް ތަޅުމުގައި ބަހުސްކުރިއިރު ޚިޔާލުތަފާތުވުންތަކެއް ހުއްޓެވެ. ސަރުކާރަށް ތާއީދުކުރާ މެންބަރުން ވިދާޅުވާ ގޮތުގައި އޭސީސީއަށް އެ ކޮމިޝަންގެ ޒިންމާ އަދާނުކުރެވޭ ކަމަށާއި، ރާއްޖޭގައި ހިނގާ ބޮޑެތި ކޮރަޕްޝަންގެ މައްސަލަތައް ނުބެލި ދޫވެގެން ދާތަން ބަލަން ނުތިބެވޭނެ ކަމަށް ވިދާޅުވެފަވެއެވެ. އަދި, އެ ބިލު ފާސްވެ، ގާނޫނަށް އިސްލާހު އައުމުން ކޮރަޕްޝަންގެ މައްސަލަތައް ހިނގައި، އޭސީސީ ޒިންމާދާރުކުރެވޭނެ ކަމަށް ސަރުކާރު މެންބަރުން ވިދާޅުވިއެވެ.
ނަމަވެސް, އިދިކޮޅު އެމްޑީޕީން މި އިސްލާހުތަކާ ދެކޮޅެވެ. އެމްޑީޕީ މެންބަރުން ވިދާޅުވާ ގޮތުގައި މިއީ މިނިވަން މުއައްސަސާތަކަށް ސަރުކާރުން ނުފޫޒު ފޯރުވުމުގެ ގޮތުން ކުރާ ކަމެކެވެ.
މި ދެ ބިލު މަޖިލީހަށް ހުށަހަޅާފައިވަނީ ސަރުކާރުގެ ފަރާތުންނެވެ. އެގޮތުން، އީސީގެ ގާނޫނުނަށް ބަދަލު ގެނައުމުގެ ބިލު ކެލާ ދާއިރާގެ މެންބަރު އަބްދުالله ޝަރީފު ހުށަހެޅުއްވިއިރު، އޭސީސީގެ ގާނޫނުނަށް ބަދަލު ގެނައުމުގެ ބިލު ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރެވެ.
އިސްލާހުގައި ބަޔާންކޮށްފައިވާ ކަންތައްތައް
މި ދެ ބިލުގައި ވާގޮތުން، އޭސީސީ ނުވަތަ އީސީއަށް ރައީސަކާއި ނައިބު ރައީސެއް އައްޔަންކުރުމަށް، ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅުއްވާނީ ރައީސުލްޖުމްހޫރިއްޔާއެވެ.
މި ނަން ފާސްކުރުމަށް މަޖިލީހުގެ ޖަލްސާއެއް ބާއްވަން ޖެހެއެވެ. އެ މަގާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށް ކަމަށް އިސްލާހުގައި ބަޔާންކޮށްފައިވެއެވެ. އަދި، ގާނޫނަށް އަމަލުކުރަން ފެށުމުގެ ކުރިން ދެ ކޮމިޝަންގެ ރައީސާއި ނައިބު ރައީސް ވެސް ގާނޫނުގައިވާ ގޮތުގެ މަތިން މަގާމުން ވަކިވަންދެން އެ މަގާމުގައި ދެމިތިބޭނެއެވެ.
މިހާރު ގާނޫނުގައި އޮންނަ ގޮތުން ނަމަ އޭސީސީ އަދި އީސީގެ ރައީސް އަދި ނައިބު ރައީސް އައްޔަނުކުރަނީ އެ ދެ ކޮމިޝަންގެ މެންބަރުންގެ މެދުގައި ނަގާ ވޯޓަކުންނެވެ. މި ވޯޓުގެ ނަތީޖާ 28 ގަޑިއިރުތެރޭ ރައީސުލްޖުމްހޫރިއްޔާއަށާއި މަޖިލީހަށް ހުށަހަޅަން ޖެހޭނެއެވެ.