ރާއްޖޭގައި މަޝްހޫރު ފުޓްބޯޅަ ރެފްރީއެއް ކަމަށްވާ ގ. ހާޒަލްހައުސް. ކ. މާލެ، އަހްމަދު ނިޒާރު މިއަދު ނިޔާވެއްޖެއެވެ.
ނިޒާރު ނިޔާވީ އުމުރުން 78 އަހަރުގައެވެ.
ނިޒާރުގެ މައްޗަށް ކުރެވޭ ކަށުނަމާދު އޮންނާނީ މިއަދު ޢަޞްރު ނަމާދަށް ފަހު މަސްޖިދުއްތަޢާވުނި މިސްކިތުގައެވެ.
'ސަން'އަށް މައުލޫމާތު ލިބިފައިވާ ގޮތުގައި ނިޒާރު ނިޔާވެފައިވަނީ ބަލިވެއުޅުމަށް ފަހުއެވެ.
ނިޒާރަކީ 1970ގެ އަހަރުތަކުގެ ކުރީކޮޅުން ފެށިގެން ފުޓްބޯޅައިގެ ރެފްރީކަން ކުރައްވަން ފެއްޓެވި ބޭފުޅެކެވެ. އޭނާއަކީ ފަސްޓް ޑިވިޝަންގެ ރެފްރީއެކެވެ.
ނިޒާރު ރެފްރީކަން ކުރުން ހުއްޓާލާފައިވަނީ 1990ގެ ކުރީކޮޅެވެ. ރެފްރީކަން ކުރުން ހުއްޓާލާފައިވަނީ އޭރު ކަކުލަށް ލިބުނު އަނިޔާއެއްގައެވެ. ނަމަވެސް، އޭގެ ފަހުން ވެސް އޭނާ ވަނީ ފުޓްބޯޅަ މެޗުތަކުގައި ލައިންސްމަންކަން ވެސް ކޮށްފައެވެ.
ރެފްރީކަންކުރުމުގެ އިތުރުން ނިޒާރު ވަނީ މީގެ ކުރިން ފުޓްބޯޅައާއި ހޮކީ ވެސް ކުޅުއްވާފައެވެ. އޭނާ ވަނީ އޭރުގެ 'ރޭޑިއެންޓް' ކްލަބަށާއި 'ރާނީ' ކްލަބަށް ވެސް ކުޅުއްވާފައެވެ.
ނިޒާރު ފާހަގަކޮށްލެވެނީ ރެފްރީކަން ކުރިއިރު މެޗު ބްރީފިންތަކުގައި ބައިވެރިވެ، މައުލޫމާތު ހިއްސާކޮށް، ރެފްރީ ސެޝަންތަކުގައި އޭނާގެ ތަޖުރިބާ ހިއްސާކުރާ ފަރާތެއްގެ ގޮތުގައެވެ. ހަމައެއާ އެކު ނިޒާރު ވަނީ މީގެ ކުރިން ސަރުކާރުގެ ބައެއް ވަޒީފާތައް ވެސް އަދާކުރައްވައިފައެވެ. އޭރު މާލޭގައި ހުންނަ އަވަށު އޮފީސްތަކުގައި ވެސް ވަޒީފާއަދާކުރެއްވިއެވެ.