ތުރުކީވިލާތާއި ދިވެހިރާއްޖެއާ ދެމެދު ހަދާފައިވާ މިނިވަން ވިޔަފާރީގެ އެއްބަސްވުމުގެ ދަށުން، އެ ގައުމުން 60 ޕަސަންޓުގެ އިމްޕޯޓު ޑިއުޓީ ނަގަމުން ދިޔަ މަހުގެ އުފެއްދުންތަކުގެ 39 ބާވަތަކަށް ޑިއުޓީ ނުނަގާނެ ކަމަށް އިކޮނަމިކް މިނިސްޓްރީން ބުނެފިއެވެ.
ޓެރިފާ ނުލައި ތުރުކީއަށް މަހުގެ ބާވަތްތައް އެކްސްޕޯޓް ކުރުން ހިމެނޭ ޕްރިފަރެންޝަލް ޓްރޭޑް އެއްބަސްވުމުގައި އިކޮނޮމިކް މިނިސްޓްރީން ތުރުކީއާއެކު ސޮއިކުރީ މިއަދެވެ.
އެ މިނިސްޓްރީން ވަނީ ދެ ގައުމުގެ ދެމެދުގައި ސޮއިކުރި ވިޔަފާރީގެ އެއްބަސްވުމާގުޅޭ ބައެއް މައުލޫމާތު ހިއްސާކޮށްފައެވެ.
އޭގައިވާ ގޮތުން ރާއްޖެއިން ތުރުކީވިލާތަށް އެކްސްޕޯޓުކުރަމުންދާ، މަހުން އުފައްދާ 39 ބާވަތެއްގެ އުފެއްދުމަކަށް ޑިއުޓީއެއް ނުނަގާނެއެވެ. އެއީ މީގެ ކުރިން 60 ޕަސަންޓުގެ އިމްޕޯޓު ޑިއުޓީ ނަގަމުން އައި ތަކެއްޗެވެ. އަދި 103 ބާވަތުގެ މަހުގެ އުފެއްދުންތައް ތުރުކީވިލާތަށް އިމްޕޯޓު ކުރުމުގައި ބޮޑެތި ލުއިތަކެއް ލިބޭނެއެވެ.
އިކޮނަމިކް މިނިސްޓްރީން ބުނެފައިވާ ގޮތުގައި މި އެއްބަސްވުމުގެ ދަށުން ދިވެހި ރައްޔިތުންނަށް ފައިދާތަކެއް ލިބިގެންދާނެއެވެ. އޭގެ ތެރޭގައި:
- ތުރުކީވިލާތުން ހެޔޮ އަގުގައި ދިވެހި ރައްޔިތުންނަށް މުދާ ލިބޭނެ ގޮތް ހަމަޖެހުން
- އެކްސްޕޯޓު އަދި ރިއެކްސްޕޯޓު ކުރުމުގެ ދާއިރާތަކުގެ އުފެއްދުންތެރިކަން ރާއްޖޭގައި އިތުރުވުން
- ދިވެހީންނަށް ވަޒީފާގެ ފުރުސަތުތައް އިތުރުވުން
މީގެ އިތުރުން ވެސް މި އެއްބަސްވުމުގެ ދަށުން ރާއްޖޭގެ ކުދި، އަދި ބޮޑެތި ވިޔަފާރިތަކަށް ވެސް ފައިދާތަކެއް ލިބޭނެ ކަމަށް އިކޮނަމިކް މިނިސްޓްރީން ބުނެއެވެ. އޭގެ ތެރޭގައި:
- ހިފާ ގެންގުޅޭ ތަކެތި ހެޔޮ އަގެއްގައި އިމްޕޯޓު ކުރެވުން
- ތުރުކީވިލާތުގެ ވިޔަފާރިތަކާ އެކު ގުޅުން ގާއިމް ކުރުމުގެ ފުރުސަތު ފަހިވުން
- ބޮޑެތި ވިޔަފާރިތަކުން އިމްޕޯޓުކުރާ އިމާރާތް ކުރުމުގެ ސާމާނު ފަދަ ތަކެތިން ޑިއުޓީގެ ބޮޑެތި ލުއިތަކެއް ލިބި، އުމްރާނީ ތަރައްގީއަށް ކުރާ ޚަރަދު ކުޑަވުން
- އެކްސްޕޯޓު މާކެޓުގައި ހަރަކާތްތެރިވާ ވިޔަފާރިތަކުގެ މާކެޓު އިތުރުވުން
މި އެއްބަސްވުމުގެ ދަށުން ޑިއުޓީގެ ލުއި ލިބޭ ބާވަތްތަކުގެ ތެރޭގައި ހިމެނޭ:
- ކާބޯތަކެތި
- ސިނާއީ އަދި ކޮންސްޓްރަކްޝަން މެޓީރިއަލް
- މެރިން އަދި ޓްރާންސްޕޯޓު
- މެޝިނަރީ އަދި އިކުއިޕްމަންޓު
- ހިފައިގެންގުޅޭ ތަކެތި
- ފަރުނީޗަރު
އެ އެއްބަސްވުމަށް އަމަލުކުރަން ފަށާނީ އަންނަ އަހަރުގެ ފުރަތަމަ ކުއާޓަރުގައި، ދެ ގައުމުގެ ސަރުކާރުން ކަނޑައަޅާ ތާރީޚެއްގައެވެ.
މިއީ މިދިޔަ އަހަރު ރައީސް ޑރ. މުހައްމަދު މުއިއްޒު ތުރުކީއަށް ކުރެއްވި ދަތުރުފުޅުގައި އެ ގައުމުގެ ރައީސް ރަޖަބް ޠައްޔިބް އުރުދުޣާނާ ބައްދަލުކުރައްވައި ނިންމެވި ކަންތައްތަކުގެ ތެރޭގައި ހިމެނޭ ކަމެކެވެ.
އެ ބައްދަލުކުރެއްވުމުގައި ދެގައުމުގެ އިގްތިޞާދީ ގުޅުން ވަރުގަދަކުރަން ކުރެވެން ހުރި ކަންކަމާ ގުޅޭ ގޮތުން ދެ ބޭފުޅުން މަޝްވަރާ ކުރެއްވިއެވެ.
ރައީސުލްޖުމްހޫރިއްޔާކަމުގެ ހުވާ ކުރެއްވުމަށް ފަހު ރައީސް އެންމެ ފުރަތަމަ ރަސްމީ ދަތުރުފުޅު ކުރެއްވީ ތުރުކީއަށެވެ.