އިސްރާއީލުން ފަލަސްތީނުގެ ޣައްޒާގައި ކުރަމުންދާ ހަނގުރާމަ ހުއްޓުވާނެ ކަމަށް އެމެރިކާގެ ރިޔާސީ އިންތިޚާބުގައި ވާދަކުރައްވާ ކެންޑިޑޭޓް އަދި ގައުމުގެ ނައިބު ރައީސް ކަމަލަ ހެރިސް ވިދާޅުވެއްޖެއެވެ.
ހެރިސް އެގޮތަށް ވިދާޅުވީ، އެމެރިކާގެ އަރަބި ނަސްލުގެ މީހުންގެ ބޮޑު އާބާދީއެއް އޮންނަ މިޝިގަން ސްޓޭޓްގައި ކެމްޕޭނު ނިންމުމުގެ ގޮތުން ބޭއްވި ޖަލްސާއެއްގައެވެ.
އެމެރިކާގެ އަރަބި ދަރިކޮޅުގެ މީހުން ވޯޓުލާން ނުކުތުމަށް ގޮވައިލައްވައި ހެރިސް ވިދާޅުވީ މި އަހަރަކީ އުނދަގޫ އަހަރެއް ކަމަށެވެ. އެގޮތުން މިއީ ޣައްޒާގައި އެތައް ބަޔަކު މަރުވެ، ލުބުނާނުގެ އާންމުންނަށް ގެއްލުންތަކެއް ލިބުނު އަހަރެއް ކަމަށް އެ ކަމަނާ ވިދާޅުވިއެވެ.
"[އެމެރިކާގެ] ރައީސަކަށް ވުމުން، ޣައްޒާގެ ހަނގުރާމަ ނިމުމަކަށް ގެނައުމަށާއި ރަހީނުން އަނބުރާ [އިސްރާއީލަށް] ގެންދިޔުމަށާއި ޣައްޒާގެ ރައްޔިތުން ތަހައްމަލު ކުރަމުންދާ ހާލަތަށް ނިމުމެއް ގެނައުމަށާއި އިސްރާއީލުގެ ރައްކާތެރިކަން ކަށަވަރު ކުރުމަށައި ފަލަސްތީނުގެ ރައްޔިތުންނަށް ކަރާމާތާއި، މިނިވަންކަމާއި، ރައްކާތެރިކަމާއި އަމިއްލައަށް ގޮތް ނިންމުމުގެ ހައްގު ހޯދައި ދިނުމަށް ކުރެވެން ހުރި ހުރިހާ ކަމެއް އަޅުގަނޑު ކުރާނަން،" ހެރިސް ވިދާޅުވިއެވެ.
އިޒްރާއީލަށް އަސްކަރީ ގޮތުން އެންމެ ބޮޑަށް ވާގިވެރިވާ އެއް ގައުމަކީ އެމެރިކާ ކަމަށްވާއިރު، ޣައްޒާއަށް ދެމުންދާ ހަމަލާތައް ހުއްޓުވާނެ ގޮތެއް ހެރިސް ވިދާޅެއް ނުވެއެވެ. އަދި މީގެ ކުރިން ހެރިސް ވަނީ ރައީސް ކަމަށް އިންތިޚާބުވެއްޖެ ނަމަ އެ ސަރުކާރުން ވެސް އިސްރާއީލަށް ހަތިޔާރު ފޯރުކޮށްދޭނެ ކަމަށް ވިދާޅުވެފައެވެ.
އެމެރިކާގެ ރިޔާސީ އިންތިޚާބުގައި ރަސްމީކޮށް ވޯޓުލުން ފަށަން ކުޑަ ވަގުތުކޮޅަކަށްވެފައިވާއިރު، ހެރިސްއާއި އެމެރިކާގެ އދިކޮޅު ލީޑަރު ޑޮނަލްޑް ޓްރަމްޕްވެސް އަންނަނީ ވަރަށް ވާދަވެރިކަމާއެކު ކެމްޕޭނު ކުރައްވަމުންނެވެ.
މި ރިޔާސީ އިންތިޚާބުގެ ވާދަވެރިކަން އިންތިހާއަށް ބޮޑުވެފައިވާއިރު، 'ސްވިންގް ސްޓޭޓް'ތަކުގެ ގޮތުގައި ފާހަގަވެފައިވާ މުހިންމު ހަތް ސްޓޭޓުގެ އަޣުލަބިއްޔަތު ހޯދަން ހެރިސްއަށް ވަރަށް މުހިންމެވެ. އޭގެ ތެރެއިން އެއް ސްޓޭޓަކީ، އަރަބި ދަރިކޮޅުގެ ދެ ލައްކަ މީހުންގެ އާބާދީއެއް އޮންނަ މިޝިގަންއެވެ. އެހެންވެ އެ ސްޓޭޓުގެ ވޯޓުތައް ވެސް ހެރިސްއަށް ވަނީ ވަރަށް މުހިންމުވެފައެވެ.
ސްވިންގް ސްޓޭޓަތަކުގެ ގޮތުގައި ހިމެނެނީ މިޝިގަންގެ އިތުރުން އެރިޒޯނާ، ޖޯޖިއާ، ނެވާޑާ، ނޯތު ކެރޮލައިނާ، ޕެންސިލްވޭނިއާ އަދި ވިސްކޮންސިން އެވެ.
އެމެރިކާގެ ގިނަ ސްޓޭޓުތަކުން އާންމު ގޮތެއްގައި ވޯޓު ދޭނީ މައި ދެ ޕާޓީ ކަމަށްވާ ރިޕަބްލިކަން ޕާޓީ ނުވަތަ ޑިމޮކްރެޓިކް ޕާޓީގެ ކެންޑިޑޭޓަށެވެ. އެ ސްޓޭޓުތަކުގެ ނަތީޖާ ލަފާކުރަން ފަސޭހަވާއިރު، ސްވިންގް ސްޓޭޓުތަކަކީ އެކި ފަހަރު އެކި ގޮތަށް ވޯޓު ދޭ ސްޓޭޓުތަކެވެ.
ހުކުރު ދުވަހު ޓްރަޕްމްވެސް ވަނީ މިޝިގަންއަށް ވަޑައިގެން ކެމްޕޭނު ކުރައްވާފައެވެ. އަދި މެދުއިރުމަތީގައި އޮތް ހަމަނުޖެހުން ނިމުމަކަށް ގެންނަވާނެ ކަމަށް ވައުދުވެވަޑައިގެންފައިވެއެވެ. ނަމަވެސް އެކަން ކުރައްވާނެ ގޮތެއް ޓްރަމްޕް ވެސް ވިދާޅުވެފައެއްނުވެއެވެ.
މީގެ ކުރިން ހެރިސް އާއި ޓްރަމްޕް ވެސް ވަނީ ތަކުރާރުކޮށް އިސްރާއީލުގެ އަމަލުތައް ދިފާއު ކުރައްވައި، އިސްރާއީލަށް އަމިއްލަ ދިފާއުގެ ހަމަލާތައް ދެވޭނެ ކަމަށް ވިދާޅުވެފައެވެ.
އެމެރިކާގައި ރަސްމީކޮށް ވޯޓުލާން ފަށަނީ މާދަމާ ކަމަށްވީ ނަމަވެސް، މިދިޔަ ސެޕްޓެމްބަރު މަހު އެގައުމުގައި ވަނީ މެއިލް މެދުވެރިކޮށާއި ވޯޓުލާ މަރުކަޒަށް ގޮންގެން ވެސް ވޯޓުލުމުގެ ފުރުސަތު ހުޅުވައިލައިފައެވެ. އެގޮތުން މިހާތަނަށް 78 މިލިއަނަށް ވުރެ ގިނަ މީހުން ވޯޓު ލައިފައިވާ ކަމަށް ޔުނިވާސިޓީ އޮފް ފްލޮރިޑާ އިލެކްޝަން ލެބްއިން އާންމުކޮށްފައިވާ ތަފާސްހިސާބުން ދައްކައެވެ.