ފަލަސްތީނުގެ މިނިވަން ކަމަށް މަސައްކަތްކުރާ ހަމާސް ޖަމާއަތުގެ ސިޔާސީ ވެރިޔާ އިސްމާޢީލް ޙަނިއްޔާ ޝަހީދުކޮށްލި ކަމަށް އިސްރާއީލުން ފުރަތަމަ ފަހަރަށް އެއްބަސްވެއްޖެއެވެ.
އިއްޔެ ބޭއްވި ހަފްލާއެއްގައި ހަނިއްޔާ ޝަހީދުކޮށްލާފައިވާކަން އިސްރާއީލުގެ ދިފާއީ ވަޒީރު އިސްރާއީލް ކަޓްޒް ވަނީ ވިދާޅުވެފައެވެ. އަދި ޔަމަނުގެ ހަތިޔާރުއެޅި ޖަމާއަތް ޙޫޘީން ނުރައްކާތެރި ހަމަލާދޭނެ ކަމަށް ކަޓްޒް ވަނީ އިންޒާރުދެއްވާފައެވެ.
"އިސްރާއީލުން ޙޫޘީންގެ ސްޓްރެޓެޖިކް އިންފްރާސްޓްރަކްޗާއަށް ގެއްލުންދޭނެ. އަދި އެ މީހުންގެ ލީޑަރުންގެ ބޯ ކަނޑާލާނަން. ތެހެރާން، ޣައްޒާ އަދި ލުބުނާނުގައި ހަނިއްޔާ، ސިންވާރު އަދި ނަސްރުالله ބަލިކުރި ފަދައިން އެކަން ޔަމަނު، ހުދައިދާ އަދި ސަނާގައި ކުރާނަން." ކަޓްޒް ވިދާޅުވިއެވެ.
"ޙޫޘީ ޓެރަރިސްޓް ޖަމިއްޔާއިން އިސްރާއީލަށް މިސައިލް ހަމަލާ ދެމުންދާއިރު، އަޅުގަނޑުގެ ވާހަކަ ފެށުމުގައި އެ މީހުންނަށް ސާފު މެސެޖެއް ފޯރުކޮށްދޭން ބޭނުން. އަޅުގަނޑުމެން ހަމާސް ބަލިކޮށްފިން، ހިޒްބުالله ބަލިކޮށްފިން، އީރާނުގެ ދިފާއީ ނިޒާމުތަކަށް ގެއްލުންދީފިން، އަޅުގަނޑުމެން ސީރިއާގެ ބަޝާރުލް އަސަދުގެ ވެރިކަން ވައްޓާލައިފިން." ކަޓްޒް ވިދާޅުވިއެވެ.
ފާއިތުވި މަސްތަކުގައި ޙުޘީން ވަނީ އިސްރާއީލަށް ގިނަ މިސައިލް ހަމަލާތަކެއް ދީފައެވެ. އޭގެ ތެރޭގައި ހައިޕާސޮނިކް ބެލިސްޓިކް މިސައިލެއް ބޭނުންކޮށްގެން ހޮނިހިރު ދުވަހު އިސްރާއީލުގެ ވެރި ރަށް ތެލް އަވީވަށް ދިން ހަމަލާވެސް ހިމެނެއެވެ.
ހަނިއްޔާ އަވަހާރަކޮށްލާފައިވަނީ މިދިޔަ ޖުލައި މަހުގެ 31 ވަނަ ދުވަހު އީރާނުގެ ރައީސް މަސޫދު ޕެޒެޝްކިއާއަށް ވެރިކަން ހަވާލުކުރުމަށް ބޭއްވި ރަސްމިއްޔާތުގައި ބައިވެރިވެވަޑައިގަތުމަށް ތެހެރާނަށް ވަޑައިގެން އުޅުއްވަނިކޮށެވެ.
އޭރު އީރާނުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި ހަނިއްޔާއާއި އޭނާގެ ބޮޑީގާޑު މަރުވެފައިވަނީ އޭނާ ދިރިއުޅުއްވި ހޮޓަލަށް ދަންވަރު ދިން ވައިގެ ހަމަލާއެއްގައެވެ.
އީރާނާއި ފަލަސްތީނުގެ ލީޑަރުން އަވަހާރަކޮށްލިކަމުގެ ތުހުމަތު އިސްރާއީލަށް ކުރި ނަމަވެސް އިސްރާއީލުން އެކަމުގެ ޒިންމާ މިހާތަނަށްވެސް ނަގާފައެއްނުވެއެވެ.
ހަނިއްޔާ ޝަހީދުކޮށްލުމާ ގުޅިގެން މުޅި ފަލަސްތީނުގައި ރުޅިވެރިކަން އުފެދި، އީރާނުގެ ސުޕްރީމް ލީޑަރު އާޔަތުالله އަލީ ޚާމަނާއީ ވަނީ ބަދަލު ހިފުމުގެ ގޮތުން އިސްރާއީލަށް ހަރުކަށި އަދަބު ދޭނެ ކަމަށް ވައުދުވެވަޑައިގެންފައެވެ.
އެގޮތުން އޮކްޓޯބަރު މަހު އީރާނުން ބަދަލު ހިފުމުގެ ގޮތުން ވަނީ އިސްރާއީލުގެ ބައެއް ސިޓީތަކަށް މިސައިލްތައް ފޮނުވާލާފައެވެ.