މޯލްޑިވްސް މީޑިއާ ކައުންސިލުން މި އަހަރު ދިން 2023 ވަނަ އަހަރުގެ ނޫސްވެރިކަމުގެ އެވޯޑުގެ މައްސަލަ އެންޓި ކޮރަޕްޝަން ކޮމިޝަން (އޭސީސީ)އިން މިއަދު ބަލަން ފަށައިފިއެވެ.
އޭސީސީގެ މީޑިއާ އޮފިޝަލް "ސަން"އަށް ވިދާޅުވީ އެ މައްސަލަ އޭސީސީއަށް ހުށަަހަޅައި، ތަހުގީގުގެ މަސައްކަތް ފެށިފައިވާ ކަމަށެވެ.
އެނގިފައިވާ ގޮތުގައި އޭސީސީން ވަނީ މި މައްސަލަ ތަހުގީގުކުރަން މީޑިއާ ކައުންސިލަށް ވަދެފައެވެ.
މީޑިއާ ކައުންސިލުން ދިން އެވޯޑުގެ މައްސަލަ ބޮޑުވެފައިވަނީ ތަހުގީގީ ނޫސްވެރިކަމުގެ ވީޑިއޯ ކެޓަގަރީން ދިން އެވޯޑަކާ ގުޅިގެންނެވެ.
އެންމެ ފުރަތަމަ އެ ކަން ސަމާލުކަމަށް އައީ އެވޯޑު ހަފުލާ އޮތް ރޭ އެވޯޑުގެ ނޮމިނޭޝަން ޕަބްލިކް ސާވިސް މީޑިއާ (ޕީއެސްއެމް)ގެ ލައިވުން ދެއްކުމާ އެކުގައެވެ. އެގޮތުން، ލައިވް ތެރޭ ކުރިއާލައި އެންގުމެއް ނެތި ދެއްކި އެ ކޮންޓެންޓަކީ ޕީއެސްއެމަށް އޮޅުވައިލައި ދެއްކި އެއްޗެއްކަމަށް ތުހުމަތުކޮށް ބަޔާނެއް ނެރުނެވެ. އެއީ އެ ކުންފުނީގެ އެޑިޓޯރިއަލާ ޚިލާފު، ނޫސްވެރިކަމުގެ މިންގަނޑުތަކާ ވެސް ޚިލާފު ކޮންޓެއްޓެއް ކަމަށް ބުނެފައިވެއެވެ.
އެ މައްސަލައިގައި، ޕީއެސްއެމްގައި 30 އަހަރަށްވުރެ ގިނަ ދުވަހު ޚިދުމަތްކުރެއްވި، އެމްއެމްސީގެ ރައީސްކަން ކުރައްވާ އަހްމަދު މުސްތަފާ، ކުންފުނީގައި އަދައިކުރައްވަމުން އައި ޓެކްނިކަލް މެނޭޖަރުގެ ވަޒީފާއިން ވެސް ކަނޑައިލިއެވެ. ނަމަވެސް، އަލުން ވަޒީފާ މިހާރު ވަނީ އިއާދަކޮށްދީފައެވެ.
އެއާއެކު އެ އެވޯޑުގެ މައްސަލައިގައި ކައުންސިލް މެމްބަރު އަލީ ނިޝާން (މިލްޒީރޯ) ވަނީ ކައުންސިލުގެ ރައީސް އަހްމަދު މުސްތަފާ އެވޯޑުގެ ނޮމިނޭޝަން ދެއްކުމަށް ހެދި ކޮންޓެންޓަށް ނުފޫޒު ފޯރުވީކަމަށް ވިދާޅުވެ، ތުހުމަތުތަކެއް ކުރައްވައިފައެވެ.
ނަމަވެސް، ކައުންސިލް ރައީސްގެ ހައިސިއްޔަތުން މުސްތަފާ ނެރުއްވި ބަޔާނެއްގައި، އޭނާ ވަނީ އެވޯޑުގެ އެއްވެސް ކަމެއްގައި އޭނާގެ ބައިވެރިވުމެއް ނޯންނާނެ ކަމަށް ވިދާޅުވެ ތުހުމަތުތައް ދޮގުކުރައްވައިފައެވެ.
އޭގެ ފަހުން، އެމްއެމްސީ އެވޯޑަށް މި ފަހަރުގެ ހުށަހެޅުންތައް އިންސާފުކުރެއްވި ހަތް ފަނޑިިޔާރުން ވެސް ވަނީ ތަހުގީގީ ނުސްވެރިކަމުގެ ވީޑިއޯ ކެޓަގަރީން އެވޯޑު ލިބުނު އުފެއްދުމަށް އެވޯޑު ދިނީ އުސޫލާ ޚިލާފަށް ކަމަށް ބުނެ ބަޔާނެއް ނެރެފައެވެ.
މީޑިއާ ކައުންސިލްގެ އެވޯޑުތައް ދެނީ ޖަޖުންގެ ޕަނަލަކުންނެވެ. އެއީ، ވަކިން އިއުލާނުކޮށްގެން ނަގައި ޖަޖުންގެ ޕެނަލެކެވެ.
ފާހަގަކޮށްލެވޭ ގޮތުގައި މި ފަހަރު ޖަޖުންގެ ގޮތުގައި ތިއްބެވި ގިނަ ބޭފުޅުންނަކީ ކުރިން ވެސް މި އެވޯޑަށް އިންސާފުކުރައްވާފައިވާ ބޭފުޅުންނެވެ.