ސްޕެނިޝް ލަލީގާގައި އެފްސީ ބާސެލޯނާއިން އެސްޕަންޔޯލް ބަލިކޮށް، އެ ޓީމުގެ ލީޑު ފުޅާކޮށްފިއެވެ.
ބާސާގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 3-1 އިންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބާސާއިންނެވެ. މެޗުގައި ބާސާއިން ކާމިޔާބުކުރި ތިން ލަނޑު ވެސް އެ ޓީމުން ކާމިޔާބުކޮށްފައިވަނީ ފުރަތަމަ ހާފުގައެވެ.
މިދިޔަ ހަފުތާގައި އެންމެ ފަހުގެ ޗެމްޕިއަން ރެއާލް މެޑްރިޑާ، އެ ޓީމުގެ ދަނޑުގައި ކުޅެ ބަލިކުރުމުން ލިބިފައިވާ އިތުބާރާ އެކު މި މެޗު ބާސާއިން ފަށާފައިވަނީ ވަރަށް ފޯރީގައެވެ. ނަތީޖާއަކަށް ވެގެންދިޔައީ މެޗުގެ 12 ވަނަ މިނެޓުގައި ބާސާއިން ލަނޑެއް ޖަހައި، މެޗުގެ ލީޑު ނެގުމެވެ. މި ލަނޑު އެ ޓީމަށް ކާމިޔާބުކޮށްދިނީ ޑަނީ އޮލްމޯއެވެ.
މެޗުގައި ބާސާގެ ދެވަނަ ލަނޑު މެޗުގެ 23 ވަނަ މިނެޓުގައި ކާމިޔާބުކޮށްދީފައިވަނީ ކެޕްޓަން ރަފީނިއާއެވެ. ފަހު ލަނޑު މެޗުގެ 31 ވަނަ މިނެޓުގައި ކާމިޔާބުކޮށްދީފައިވަނީ ފުރަތަމަ ލަނޑު ވެސް ކާމިޔާބުކޮށްދިން އޮލްމޯއެވެ.
މެޗުގައި އެސްޕަންޔޯލްއިން ކާމިޔާބުކުރި ހަމައެކަނި ލަނޑު އެ ޓީމަށް ކާމިޔާބުކޮށްދީފައިވަނީ މެޗުގެ 63 ވަނަ މިނެޓުގައި ހާވީ ޕުއާޑޯއެވެ. މެޗުގެ ފުރަތަމަ ހާފުގައި އެސްޕަންޔޯލްއިން ދެ ލަނޑު ކާމިޔާބުކުރި ނަމަވެސް ދެ ލަނޑު ވެސް ވަނީ އޮފް ސައިޑް ކަމަށް ދައްކާފައެވެ.
މި ކާމިޔާބީއާ އެކު ބާސާއަށް މިހާރުވަނީ ތާވަލުގެ އެއްވަނައިގައި ނުވަ ޕޮއިންޓްގެ ލީޑެއް ލިބިފައެވެ. އެއީ، 12 މެޗުން ލިބިފައިވާ 33 ޕޮއިންޓާ އެކުއެވެ. ބާސާއަށް ނުވަ ޕޮއިންޓުގެ ލީޑެއް ލިބުނީ މި ހަފުތާގައި ރެއާލާއި ވެލެންސިއާ ބައްދަލުކުރަން އޮތް މެޗު ސްޕެއިންގެ ވެލެންސިއާ ހިމެނޭ ސަރަހައްދުގައި އާދަޔާ ހިލާފަށް ފެން ބޮޑުވެ، ގިނަ އަދަދެއް މީހުން މަރުވުމާ ގުޅިގެން ފަސް ކޮށްފައިވުމުންނެވެ.
މެޗުން ބަލިވުމުން އެސްޕަންޔޯލް އޮތީ 10 ޕޮއިންޓާ އެކު ތާވަލުގެ 17 ވަނައިގައެވެ. ރެއާލް މެޗުގެ އިތުރުން ވިޔަރެއާލާއި ރާޔޯ ވަޔެކާނޯ ބައްދަލުކުރަން އޮތް މެޗު ވެސް ވަނީ ފަސްކޮށްފައެވެ.
މުބާރާތުގައި ތާވަލުގެ ތިންވަނައިގައި އޮތް އެޓްލެޓިކޯ މެޑްރިޑާއި ލާސް ޕާލްމާސް ބައްދަލުކުރި މެޗު 2-0 އިން ކާމިޔާބުކޮށްފައިވަނީ އެޓްލެޓިކޯއެވެ.
މެޗުގައި އެޓްލެޓިކޯގެ ދެ ލަނޑު ކާމިޔާބުކޮށްދިނީ ޖޫލިއާނޯ ސިމިއޯނީއާއި އެލެގްޒެންޑާ ސޮރިއޮތުއެވެ. މި ކާމިޔާބީއާ އެކު އެޓްލެޓިކޯއަށް މިހާރު ވަނީ 12 މެޗުން 23 ޕޮއިންޓް ލިބި ރެއާލާ ދެމެދުގައިވާ ފަރަގު އެއް ޕޮއިންޓަށް ކުޑަކުރެވިފައެވެ. ލާސް ޕާލްމާސް އޮތީ ނުވަ ޕޮއިންޓާ އެކު ތާވަލުގެ 18 ވަނައިގައެވެ.