ދުނިޔޭގެ ސިޔާސީ އޮއެވަރުތައް ހިނގަމުންދާ ގޮތުން ރާއްޖެއަށް ކުއްލި ނުރައްކަލެއް ދިމާވުމަކީ އަބަދުވެސް ވެދާނެ ކަމެއް ކަމަށާއި، ދިވެހި ރައްޔިތުން ތިބެންޖެހޭނީ އަބަދުވެސް އެކަމަށް ތައްޔާރަށް ކަމަށް ކުރީގެ ރައީސް މައުމޫނު އަބްދުލްޤައްޔޫމް މިރޭ ވިދާޅުވެއްޖެއެވެ.
އެމަނިކުފާނަކީ ނޮވެމްބަރު 3ގެ އުދުވާނީ ހަމަލާތައް ރާއްޖެއަށް ދިން އިރު ދިވެހިރާއްޖޭގެ ރައީސުލްޖުމްޙޫރިއްޔާގެ މަގާމުގައި ހުންނެވި ބޭފުޅާއެވެ. މި ހަމަލާއަކީ ހ. ހާޖަރާގޭ އަބްދުﷲ ލުތުފީ އާއި ސ. ހިތަދޫ ޕެރިސްހޮލިޑޭ އަހުމަދު ނާސިރު އިސްވެ ހުރެ، ތަމަޅައިންނާއެކު އަރައި، ހަތިޔާރާއެކު ދިން އުދުވާނީ ހަމަލާއެވެ.
ނަސްރުގެ ދުވަހުގެ ޚާއްސަ ޖަލްސާގައި މިރޭ ވާހަކަފުޅު ދައްކަވަމުން މައުމޫން ވިދާޅުވީ ނޮވެމްބަރު 3ގެ އުދުވާނީ ހަމަލާއަކީ ބިރުވެރި ދުވަހެއް ކަމަށެވެ.
ސިފައިންގެ އަށް ބޭކަލަކާއި އާންމުންގެ 11 ބޭކަލެއް އެ ދުވަހުގެ ހަމަލާގައި ޝަހީދުވެ ދިޔަކަން ފާހަގަކުރައްވާ މައުމޫން ވިދާޅުވީ އެފަދަ ހަނދާނެއް އާކުރާއިރު އަބަދުވެސް ހަނދާން ބަހައްޓަންޖެހޭ ކަމަކީ އެ ނަސްރަކީ މާތްﷲގެ ހަޟުރަތުން ލިބުނު ނަސްރެއް ކަމަށެވެ.
މައުމޫން ވިދާޅުވީ ނަސްރުގެ ދުވަހުގެ ފިލާވަޅުތައް ގިނަކަމަށާއި ހާސިލްވާ އިބުރަތްތައް ވެސް މުއްސަނދި ކަމަށެވެ. އެ ދުވަހު ދައްކުވައިދިނީ ދިވެހި ރައްޔިތުންގެ އެއްބައިވަންތަކަން ކަމަށް އެމަނިކުފާނު ވިދާޅުވިއެވެ. އަދި އެ ދުވަހު ސާބިތުކޮށްދިނީ މާ ބާރުގަދަ ހަތިޔާރުތަކެއް ނެތް ނަމަވެސް ދިވެހީން ހަނގުރާމަކުރީ ވަރަށް ވަރުގަދަ ހިތްވަރަކާއެކުކަން ކަމަށް އެމަނިކުފާނު ވިދާޅުވިއެވެ.
ނަސްރުގެ ދުވަހުގެ ވާހަކައާ ގުޅުވައި މައުމޫން ވަނީ ދިވެހި ދައުލަތަށް ނަސޭހަތެއް ވެސް ދެއްވައިފައެވެ.
ދިވެހި ރައްޔިތުން މިއަދުވެސް އަދި މާދަމާ ވެސް ހަނދާން ބަހައްޓަންޖެހޭ ވަރަށް މުހިންމު ކަމެއް އެބައޮތް. އެއީ ދުނިޔޭގެ ސިޔާސީ އޮއެވަރުތައް ހިނގަމުންދާގޮތުން ރާއްޖެއަށް ކުއްލި ނުރައްކަލެއް ދިމާވުމަކީ އަބަދުވެސް ވެދާނެ ކަމެއް. އަބަދުވެސް ދިވެހި ރައްޔިތުން ތިބެންޖެހޭނީ މިކަމަށް ހޭލާ، ކުރީގެ ރައީސް މައުމޫނު އަބްދުލްޤައްޔޫމް
އެ ދުވަހު އެ ލިބުނު ނަސްރަކީ ދިވެހިން އެކަމަށްޓަކައި އެތައް އިބުރަތްތަކެއް ނަގަންޖެހޭ ފިލާވަޅެއް ކަމަށް މައުމޫން ވިދާޅުވިއެވެ.
އެގޮތުން ގައުމީ މަސްރަހަށް ބަދަލުތައް އައިސް، ސިޔާސީ ޕާޓީތަކެއް އުފެދިގެން ދިޔަ ނަމަވެސް ގައުމީ ވަހުދަކަށް އެއްވެސް ބަދަލެއް އައިސްގެން ނުވާނެކަމަށް އެމަނިކުފާނު ވިދާޅުވިއެވެ. އަދި ގައުމީ ކަންކަމަކީ ސިޔާސީ ކަންކަމަށް ވުރެ އިސްކަން ދޭންޖެހޭ ކަންކަން ކަމަށް ވެސް ވިދާޅުވިއެވެ.
ރައީސް ޑރ. މުޙައްމަދު މުއިއްޒާއި ކުރީގެ ރައިސް މައުމޫން އަބްދުލްގައްޔޫމް: މައުމޫން ވިދާޅުވީ ކުއްލި ނުރައްކަލެއް ދިމާވެދާނެ ކަމަށް ދިވެހީން ތައްޔާރަށް ތިބެންޖެހޭނެ ކަމަށް -- ފޮޓޯ/ ރައީސް އޮފީސް
އެމަނިކުފާނު ވަނީ މިނިވަންކަމާ ސިޔާދަތު ދެމެހެއްޓުމަށްޓަކައި ރައީސް ޑރ. މުހައްމަދު މުއިއްޒު ގެންގުޅުއްވާ ހަރުދަނާ ސިޔާސަތަށް ޝުކުރުދަންނަވައި ތައުރީފުކުރައްވާފައެވެ.
އަދި އެމަނިކުފާނުގެ ވާހަކަފުޅު ނިންމަވާލައްވަމުން ވިދާޅުވީ ފަލަސްތީނުގެ ރައްޔިތުން، ވަކިން ޚާއްސަކޮށް ޣައްޒާގެ ރައްޔިތުންނަށް ކުރިމަތިކުރަމުންދާ ހާލަތު ކުށްވެރި ކުރަންޖެހޭ ކަމަށެވެ. އަދި އެމީހުންގެ ވަރުގަދަ ޖިހާދަށް ތާއީދުކުރުންމަތީ ދިވެހިން ދެމިތިބެންޖެހޭނެ ކަމަށް ވިދާޅުވިއެވެ.
ދިވެހީންނަށް ނަސްރު ލިބުނުތާ 36 އަހަރުވިއިރު މައުމޫނާއި އެމަނިކުފާނުގެ އަނބިކަނބަލުން ނަސްރީނާ އިބްރާހީމް ވަނީ، އެ ދުވަހުގެ ހަނދާންތައް ވެސް ހިއްސާކުރައްވާފައެވެ.