ވޮޝިންޓަން (3 ނޮވެންބަރު 2024): ރަޝިއާއާއި ޗައިނާގެ ގުޅުންތައް އެމެރިކާގެ މަސްލަހަތަށް ގެއްލުންވާ މިންވަރަށް މިހާރު ބަދަހިވެއްޖެކަމަށާއި އެމެރިކާގެ ވެރިކަން ލިބިއްޖެނަމަ އެގުޅުންތައް ޚަރާބުކޮށް ޗައިނާއާއި ރަޝިއާ ދެމެދުގައި ފިތުނަ އުފައްދާނެކަމުގެ އިންޒާރު އެމެރިކާގެ ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ޑޮނަލްޑް ޓްރަމްޕް ދެއްވައިިފިއެވެ.
އެމެރިކާގެ ރިޔާސީ އިންތިޚާބުގައި ރަސްމީކޮށް ވޯޓުލުމަށް އެންމެ ދެދުވަހަށް ވެފައިވަނިކޮށް ދެއްވި ބަޔާނެއްގައި ޓްރަމްޕް ވިދާޅުވީ އޭނާއަށް ވެރިކަން ލިބިއްޖެނަމަ ޗައިނާއާއި ރަޝިއާގެ ދެމެދަށް ވަންނާނެކަށާއި އެގައުމުގެ ދެމެދުގައިވާ ގުޅުންތައް ޚަރާބުކޮށްލާނެކަމުގައެވެ. އަދި ޗައިނާއާއި ރަޝިއާގެ ރަހުމަތްތެރިކަން ހަތުރުވެރިކަމަށް ބަދަލުކޮށްލައްވާނެ ކަމުގައެވެ.
ޗައިނާއާއި ރަޝިއާ އެކަތިގަނޑަކަށް ވެގެން މަސައްކަތްކުރާތީ އެމެރިކާއަކީ ދުނިޔޭގައި ބާރާއި ނުފޫޒު ނެތް ގައުމަކަށްވެ އެގައުމު ބާކީ ވަމުންދާކަމަށާއި މިހާލަތު ދެމިގެންދާނަމަ ދުނިޔެ ލީޑު ކުރުމުގެ ފުރުސަތުން އެމެރިކާ މަހުރޫމް ވުމަށް މާގިނަ ދުވަސްތަކެއް ނުނަގާނެކަމަށް ޓްރަމްޕް ވިދާޅުވިއެވެ. ޗައިނާއާއި ރަޝިއާގެ ގުޅުމަކީ އެމެރިކާއަށް ވަރަށް ނުރައްކާތެރި ގުޅުންތަކެއްކަމަށް ވެސް ޓްރަމްޕް ސިފަކުރެއްވިއެވެ.
ބަސްދީ ގަތުމެއްގައި ޓްރަމްޕް ވިދާޅުވި ގޮތުގައި ރަޝިއާ އާއި ޗައިނާއާ ދެމެދު ބަދަހި ގުޅުންތަކެއް އުފެދެން މެރުވެރިވީ ޖޯ ބައިޑެންގެ ވެރިކަމުގައި އެމެރިކާގެ ޚާރިޖީ ސިޔާސަތު ދޯދިޔާ ކަމުންނެވެ. އަދި ވާނުވާ ބައިޑެންއަށް ނޭނގޭތީއެވެ. ކަމަލާ ހަރިސްއަކީވެސް ވާނުވާ ނޭނގޭ ބޭފުޅެއްކަމަށް ދޭހަވާ ގޮތަށް ޓްރަމްޕް ވާހަކަ ދެއްކެވިއެވެ.
"ބައިޑެންއަކީ ދުނިޔޭގެ މަސްރަހު ނޭނގޭ އަދި ބައިނަލްއަގްވާމީ ބާރުތަކުގެ ރާޒުވާ ކުޅިބައި ކުޅެން ނޭނގޭ އަދި ސިކުނޑީގެ ގޮތުންނާއި ވިސްނުމުގެ ގޮތުން ބަލިކަށި ބޭފުޅެއްކަމުން ބައިޑެންގެ ވެރިކަމުގައި އެމެރިކާ މިހާރު އޮތީ ޖިއޮޕޮލިޓިސްގައި ވަރަށް ނިކަމެތި ހާލަތެއްގައި," ޓްރަމްޕް ވިދާޅުވިއެވެ.
ޓްރަމްޕްގެ މި ވާހަކަތަކާ ބެހޭގޮތުން ތަހުލީލީ ނަޒަރަކުން ޚިޔާލު ފާޅުކުރެއްވި މުހައްލިލުންގެ ނަޒަރުގައި ޗައިނާއާއި ރަޝިއާގެ ގުޅުންތަކަކީ އެގުޅުންތައް ޚަރާބުކުރަން ޓްރަމްޕަށް ފަސޭހަވާނެ ގުޅުންތަކެއް ނޫނެވެ. ސަބަބަކީ އެމެރިކާގައި ހަގީގީ ވެރިކަންކުރަނީ އެގައުމުގެ ރައީސް ނޫންކަމާއި ޑީޕް ސްޓޭޓުންކަން ރަޝިއާއާއި ޗައިނާއަށް ރަނގަޅަށް އެނގޭތީއެވެ. އަދި ޓްރަމްޕްގެ ވެރިކަމަކީ ހަތަރު އަހަރުގެ ވެރިކަމެއްކަމަށްވާތީއެވެ.
މުހައްލިލުންގެ ނަޒަރުގައި ޓްރަމްޕް ވެރިކަމަށް އަތުވެއްޖެ ހިނދެއްގައި ޔުކްރެއިންއަށް ހަތިޔާރު ފޯރުކޮށްދިނުން އެމެރިކާ ހުއްޓާލުމަކީ ފަހަރުގައި އެކަށީގެންވާ ކަމެކެވެ. އަދި ޔުކްރެއިން ހަނގުރާމައިގެ މައްސަލާގައި އެމެރިކާއިން ރަޝިއާ އާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ބޮޑުބައެއް އުވާލުމަކީވެސް ފަހަރުގައި ޓްރަމްޕް ކޮށްފާނެ ކަމެކެވެ.
މީގެއިތުރުން ރަޝިއާގެ ޝަރުތުތަކާ އެއްގޮތަށް ސުލްހައިގެ އެއްބަސްވުމަކަށް ދިޔުމަށް ޔުކްރެއިންއަށް ފިއްތުންތައް ކުރިމަތިކުރުމަކީ ވެސް ޓްރަމްޕް ކޮށްފާނެކަމެކެވެ. މިފަދަ ހާލަތެއްގައި ރަޝިއާގެ ތާއީދު ޓްރަމްޕަށް ލިބިދާނެއެވެ.
ނަމަވެސް މުހައްލިލުން ދެކޭގޮތުގައި ޓްރަމްޕަކީ ހަތަރު އަހަރަށް ފަހުން ބަދަލުވާނެ ރައީސެއްކަން ޗައިނާއާއި ރަޝިއާއަށް ރަނގަޅަށް އެނގޭތީ އެދެގައުމުން ޓްރަމްޕަށް މާބޮޑު ބުރަދަނެއް ނުދޭނެއެވެ. އެދެގައުމުގެ މަސްލަހަތާ އެއްގޮތަށް ދުރު މުއްދަތަކަށް ވިސްނައިގެން ބަދަހިކުރަމުންގެންދާ ސްޓްރެޓީޖިކް ޕާޓްނާޝިޕް ގުޅުންތައް ޓްރަމްޕް ދައްކާނެ ކަމަށް ބެލެވޭ ހަތަރު އަހަރުގެ ވަގުތީ ދަޅަތަކަކަށް ގުރުބާން ކޮށްލުމަކީ އެދެގައުމު ކުރާނެކަމެއް ނޫނެވެ.
ރަޝިއާ ޓްރަމްޕްގެ ދަޅަތަކަށް ދީލާނުލާނެކަން އެނގޭ ސަބަބުތަކުގެ ތެރޭގައި ރަޝިއާގެ ކުރީގެ ރައީސް އަދި މިހާރުގެ ގައުމީ ސަލާމަތާބެހޭ މަޖިލިސްގެ ނައިބު ރައީސް ޑިމިތްރީ މިޑްވެޑޭވް ދާދިފަހުން ވިދާޅުވި ބަސްފުޅު ހިމެނެއެވެ.
މިޑްވެޑޭވް ވަނީ ޓްރަމްޕް ވެރިކަމަށް އަތުވެއްޖެ ހިނދެއްގައި ޔުކްރެއިންއަށް ހަތިޔާރު ފޯރުކޮށްދިނުން ހުއްޓާލުމަށް އޭނާ ނިންމަވައިފިނަމަ އެމެރިކާގެ ކުރީގެ ރައީސެއްކަމަށްވާ ޖޯން ކެނެޑީއަށް ޖެހުނު ހާލު ޓްރަމްޕަށް ޖެހުމަކީ ދުރުކަމެއް ނޫންކަމަށް ވިދާޅުވެ ވާހަކަ ދައްކަވާފައެވެ.
މިއީ މިފަދަ ހާލަތެއްގައި އެމެރިކާގެ ޑީޕް ސްޓޭޓް ނުވަތަ އަޑީ ދައުލަތުން ޓްރަމްޕް އަވަހާރަކޮށްލަފާނެ ކަމަށް ކުރެއްވި އިޝާރާތެކެވެ.
އެމެރިކާގެ ކުރީގެ ރައީސެއްކަމަށްވާ ޖޯން އެފް ކެނެޑީ އެމެރިކާގެ ރައީސްކަމުގައި ހުންނަވަނިކޮށް 1993 ވަނަ އަހަރުގެ ނޮވެންބަރު މަހުގެ 22 ވަނަދުވަހު އޭނާ ވަނީ ކުއްލިގޮތަކަށް އަވަހާރަކޮށްލާފައެވެ. މިޖަރީމާގެ ހަގީގަތް އަދި އަދަށްދާންދެންވެސް އެނގިފައެއް ނުވެއެވެ.
ކެނެޑީގެ ވެރިކަމުގައި އެމެރިކާގެ ޑީޕް ސްޓޭޓްއާ ގުޅިފައިވާ ފަރާތްތަކުން އޭނާގެ ސިޔާސަތުތަކާމެދު ހިތްހަމަނުޖެހޭކަން ފާޅުކޮށްފައިވެއެވެ. އެހެންކަމުން ކެނެޑީ އަވަހާރަކޮށްލި ގާތިލްކަމަށްވާ ލީ ހާވޭ އޮސްވާލްޑްގެ ފަހަތުގައި ވަނީ އެމެރިކާގެ ޑީޕް ސްޓޭޓްކަމަށް ވަނީ ބެލެވިފައެވެ. ކެނެޑީގެ މަރާމެދު އެމެރިކާގެ ގިނަ ބަޔަކުވެސް ދެކެނީ މިގޮތަށެވެ.
ކެނެޑީއަށް ވީގޮތް ޓްރަމްޕަށް ވެދާނެކަމަށް، ރަޝިއާގައި ދެވަނައަށް އެންމެ ބާރުގަދަ ފަރާތްކަމަށްވާ މިޑްވެޑޭވް ވިދާޅުވި ވިދާޅުވުމަކީ ރަޝިއާ، ޓްރަމްޕަށް ބަރޯސާ ނުވާނެކަމާއި އެމެރިކާގެ ހަގީގީ ބާރު އޮންނަނީ އެމެރިކާގެ ރައީސްގެ އަތްމަތީގައި ނޫންކަން ރަޝިއާއަށް އެނގޭކަމުގެ ހެއްކެއް ކަމަށް މުހައްލިލުން ވިދާޅުވެއެވެ.
ޓްރަމްޕް ވަނީ ބައިޑަންގެ ދޯދިޔާ ސިޔާސަތުގެ ސަބަބުން އެމެރިކާއަށް ދުނިޔޭގެ ބާރާއި ނުފޫޒު ގެއްލި ރަޝިއާ، ޗައިނާމ އީރާން އަދި އުތުރު ކޮރެއާ އެއްގަލަކަށް އަރައި ސްޓްރެޓީޖިކް ގޮތުން އެލަޔަންސް ހަދައި ގުޅިގެން ޓެކްނޮލޮޖީ ތަރައްގީކޮށް އެމެރިކާއަށް ގޮންޖަހަން ފަށާފައި ކަމަށް ވިދާޅުވެފައެވެ.
ވެރިކަން ލިބިއްޖެނަމަ ޗައިނާއާއި ރަޝިއާ ދެމެދުގައިވާ ސްޓްރެޓީޖިކް ގުޅުންތައް ޚަރާބުކޮށްލަން ހަދާނެގޮތެއް ޓްރަމްޕް ވިދާޅެއް ނުވެއެވެ.