ޗައިނާ ސަރުކާރުން ބާރުދީގެން ހިންގާ ކަމަށް އެމެރިކާއިން ބުނާ ހެކަރުންގެ ގްރޫޕަކުން އެމެރިކާގެ ޓްރެޜަރީ ޑިޕާޓްމަންޓަށް ވަދެ، ސަރުކާރުގެ ވޯކް ސްޓޭޝަންތަކާއި ސިއްރު ނޫން ލިޔެކިޔުންތަކަށް ހުއްދަނެތި އެކްސެސް ހޯދައިފިކަމަށް މީޑިއާ ރިޕޯޓެއްގައި ހާމަކޮށްފިއެވެ.
ޓްރެޜަރީ ޑިޕާޓްމަންޓުން މި ހާދިސާ ސިފަކޮށްފައިވަނީ "މޭޖާ ސައިބާ ސެކިއުރިޓީ އިންސިޑެންޓެއް"ގެ ގޮތުގައެވެ. މި ހާދިސާގެ މައުލޫމާތު ހޯދާފައިވަނީ މި މަހުގެ އަށްވަނަ ދުވަހު، ތާޑް ޕާޓީ ސޮފްޓްވެއާ ޕްރޮވައިޑަރެއް ކަމަށްވާ ބިޔޮންޑްޓްރަސްޓުން އެޖެންސީއަށް އެންގުމުންނެވެ.
"ލިބިފައިވާ މަޢުލޫމާތުތަކަށް ބަލާއިރު، މި ހާދިސާ ނިސްބަތްވަނީ ޗައިނާ ސަރުކާރުން ބާރުދީގެން ހިންގާ އެޑްވާންސްޑް ޕާސިސްޓެންޓް ތްރެޓް (އޭޕީޓީ) އެކްޓަރަކަށް،" ކަމަށް ޑިޕާޓްމަންޓުން ޤާނޫނު ހަދާ މަޖިލީހުގެ މެންބަރުންނަށް ފޮނުވި ސިޓީއެއްގައި ބުނެފައިވެއެވެ.
ހެކަރުންގެ ޓީމުން ސިސްޓަމްތަކަށް ރިމޯޓްކޮށް އެކްސެސް ހޯދުމަށް ސެކިއުރިޓީ ކީއެއް ބޭނުންކޮށްފައިވާ ކަމަށް ވެސް އެ ސިޓީގައި ބުނެފައިވެއެވެ.
މީޑިއާ ރިޕޯޓުތަކުގައި ބުނެފައިވާ ގޮތުގައި، ޓްރެޜަރީގެ އޮފިޝަލުން އިތުރަށް ކަށަވަރުކޮށްދީފައިވަނީ ކޮމްޕްރޮމައިޒްވެފައިވާ ސާވިސް އޮފްލައިންކޮށްފައިވާ ކަމަށާއި، "ޗައިނާގެ ސްޓޭޓް އެކްޓަރަށް އަދިވެސް ޓްރެޜަރީގެ މަޢުލޫމާތުތަކަށް އެކްސެސް އޮތްކަމުގެ ހެއްކެއް ނެތް" ކަމަށެވެ.
ޗައިނާއިން މިފަދަ ހަމަލާތަކުގައި ބައިވެރިވާކަން ދޮގުކުރާއިރު، މިފަދަ އެންމެ ފަހުގެ ހާދިސާ ހިނގާފައިވަނީ އެމެރިކާގެ ޓެލެކޮމް ނެޓްވޯކްތަކަށް އަމާޒުކޮށްގެން ހިންގި ހާދިސާއެއް ހިމެނޭގޮތަށް ޗައިނާއާ ގުޅުންހުރި އެހެން ސައިބާ ހާދިސާތަކެއް ހާމަވުމަށް ފަހުގައެވެ.
ޗައިނާއިން އަދިވެސް ބާރުއަޅަމުންދަނީ ސައިބާ ސެކިއުރިޓީގެ މައްސަލަތަކުގައި އެމެރިކާއާ އެކު އެއްބާރުލުން ދިނުމަށެވެ.