ކަނޑު އަޑީގެ ޚާއްސަ އޮޕަރޭޝަންތައް ހިންގުމަށް އެމްއެންޑީއެފް ކޯސްޓްގާޑުގައި "ސްޕެޝަލް ބޯޓް ސްކޮޑްރަން"ގެ ނަމުގައި ޚާއްސަ ސްކޮޑެެއް ރައީސް ޑރ. މުޙައްމަދު މުއިއްޒު މިއަދު އިފްތިތާހުކޮށްދެއްވައިފިއެވެ.
މި ސްކޮޑް އިފްތިތާހުކޮށްދެއްވީ ނަސްރުގެ ދުވަސް ފާހަގަކުރުމަށް މިއަދު ހަވީރު ޖުމްހޫރީ މައިދާނުގައި އޮތް ސިފައިންގެ ޚާއްސަ ޑްރިލާއި ހަރަކާތްތައް ދައްކައިލުމުގެ ހަފްލާގެ ތެރެއިންނެވެ.
އެއަށްފަހު އެ މަނިކުފާނުވަނީ މި ސްކޮޑްރަންގެ ދިދަ ކޯސްޓްގާޑުގެ ކޮމަޑާންޓް ބްރިގޭޑިއާ ޖެނެރަލް މުޙައްމަދު ސަލީމާ ހަވާލުކުރައްވައިފައެވެ. އަދި ސްކޮޑްރަންގެ ފަރާތުން ހަވާލުވެލެއްވީ ކޮމާންޑިން އޮފިސަރު ލެފްޓިނަންޓް ކާނަލް އަލީ ނިޔާޒު އަބްދުލްމަޖީދެވެ.
ކަނޑުމަތީގެ ޚާއްސަ ސްކޮޑްރަންގައި ހިމެނެނީ 59 ދަރިވަރުންނާއެކު ލ. ކައްދޫގައި ހިންގި މެރިޓައިމް ސްޕެޝަލް އޮޕަރޭޝަންގެ ފުރަތަމަ ކޯހުން ފާސްވި 30 ބައިވެރިންނެވެ.
މީގެ އިތުރުން 42 ދަރިވަރުންނާއެކު ރާއްޖެއާއި ސްރީލަންކާގައި ހިންގި ސްޕެޝަލް އޮޕަރޭޝަން ފޯސް ލެވެލް-5 އިން ޓްރެއިނިން ނިންމި 17 ބައިވެރިން ދަސްވެނިވެފައިވެއެވެ.
މި ބައިވެރިންނަށް އެ ބައިވެރިންގެ ސްކޮޑްރަންގެ ޚާއްސަ އަޒުމް ވެސް ވަނީ ލައިދީފައެވެ. އަޒުމްލައިދެއްވީ ވައިސް ޗީފް އޮފް ޑިފެންސް ފޯސް އަޙްމަދު ގިޔާސެވެ.
މިއަދު ދަސްވެނިވި ބައިވެރިން ފުރިހަމަކޮށްފައިވާ މި ދެ ތަމްރީނަކީ ސިފައިން ގޭގައި ހިންގޭ އެންމެ ވަރުގަދަ މަތީ ފަންތީގެ ދެ ތަމްރީނެވެ.