ދިވެހިރާއްޖެއަށް ފަސް ކިލޯއަށްވުރެ ގިނަ މަސްތުވާތަކެތި އެތެރެކުރަން އުޅުނުކަމުގެ ތުހުމަތުގައި ފުލުހުން ދެ ދިވެއްސަކާއި ބިދޭސީއަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ:
- ހއ. ދިއްދޫ ފާގަތިގެ، އުމުރުން 45 އަހަރުގެ އަަޙްމަދު ނަޞީރު
- ގއ. ކަނޑުހުޅުދޫ ނެސްޓް، އުމުރުން 18 އަހަރުގެ އަލީ އައިހަމް
- ބަނގްލަދޭޝްގެ އުމުރުން 29 އަހަރުގެ ރޮހަމާން
ފުލުހުން ބުނީ، މި ތިން މީހުންގެ ތެރެއިން، އަަޙްމަދު ނަޞީރު ހައްޔަރުކޮށްފައިވަނީ ކަސްޓްމަސްއިން ފުލުހުންނާ ހިއްސާކުރި މައުލޫމާތަކާ ގުޅިގެން މިދިޔަ އޮކްޓޫބަރު މަހުގެ 31 ވަނަ ދުވަހުގެ ރޭ ވެލާނާ އިންޓަނޭޝަނަލް އެއާޕޯޓުން ކަމަށެވެ.
އޭނާ ހައްޔަރުކޮށް، ކައުންޓާ ނާކޮޓިކްސް އިންޓެލިޖެންސާއި ޑުރަގު އެންފޯސްމަންޓު ގުޅިގެން ކުރިއަށް ގެންދިގަ ކޮންޓްރޯލް ޑެލިވަރީ އޮޕަރޭޝަނުގައި އަނެއް ދެ މީހުން ހައްޔަރުކޮށްފައިވަނީ މާލޭން ކަމަށް ވެސް ފުލުހުން ވަނީ ބުނެފައެވެ.
ފުލުހުން ބުނީ، ރާއްޖެއަށް މަސްތުވާތަކެތި އެތެރެކޮށް، ގެންގުޅެ، ބޭނުންކޮށް އަދި މަސްތުވާތަކެތީގެ ވިޔަފާރިކުރާކަމުގެ ތުހުމަތުގައި މި ތިން މީހުން ހައްޔަރުކޮށް ބަލައިފާސްކުރިއިރު މަސްތުވާތަކެތި ކަމަށް ބެލެވޭ ތަކެތި ފެނިފައިވާކަމަށެވެ. ފެނުނު މަސްތުވާތަކެތީގެ ވަގުތީ ބަރުދަނުގައި ފަސް ކިލޯ 936 ގްރާމު ހުރިކަމަށް ވެސް ފުލުހުން ވަނީ ބުނެފައެވެ.
މި މައްސަލައާ ގުޅިގެން މި ތިން މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އަަޙްމަދު ނަޞީރުގެ ބަނަދަށް ފަސް ދުވަސް، ޢަލީ އައިހަމްގެ ބަންދަށް 10 ދުވަސް އަދި ރޮހަމާން ހަތް ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފައިވެއެވެ.
ފުލުހުން އަންނަނީ މި މައްސަލަ އިތުރަށް ތަހުގީގުކުރަމުންނެވެ.
ވައިގެ މަގުންނާއި މި ނޫން ވެސް ގޮތްގޮތުން ރާއްޖެއަށް މަސްތުވާތަކެތި އެތެރެކުރުން މިހާރު ވަނީ އާންމު ކަމަކަށް ވެފައެވެ. ދާދި ފަހުން ވެސް ވަނީ ރާއްޖެއަށް މަސްތުވާތަކެތި އެތެރެކުރި މެލޭޝިއާ އަދި ނޭޕާލް އަދި އިންޑިއާގެ ދެމަފިރިއަކު ވެސް ހައްޔަރުކޮށްފައެވެ.