ވަގަށް ނަގައިގެން އުޅުނު 67 ސިނގިރޭޓު ކާޓަންއާ އެކު ދިވެއްސަކު ހައްޔަރުކޮށްފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ އިއްޔެގެ 5:40 ހާއިރު ފުލުހުން ޕެޓްރޯލްކުރަމުން ދިޔައިރު އޮލިމްޕަސް ކައިރިން ދިޔަ މީހަކާމެދު ތުހުމަތު ކުރެވިގެން ހުއްޓުވާ އޭނާ ގެންގުޅުނު ދަބަސްތަކަކާއި ކޮތަޅުތަކެއް ބަލާ ފާސްކޮށްފައި ވާކަމަށެވެ.
އަދި މި ތަކެތި ބަލާ ފާސްކުރުމުގެ ތެރޭގައި އެ ދަބަސްތަކާއި ކޮތަޅުތަކުން 67 ކާޓަން ސިނގިރޭޓު ފެނިފައި ވާކަމަށް ފުލުހުން ބުންޏެވެ.
ފުލުހުން ވަނީ މިހާތަނަށް ބެލިބެލުމުން މި ތަކެއްޗަކީ އޭނާ އޯޝެން ނީޓިކަލްސް ޕްރައިވެޓް ލިމިޓެޑުން ވަގަށް ނަގާފައިވާ ތަކެތި ކަން އެނގިފައި ވާކަމަށް ބުނެފައެވެ.
މި މައްސަލައިގައި ހައްޔަރުކޮށްފައި ވަނީ ށ. ފޭދޫ ހިރުނދުމާގޭ، އުމުރުން 24 އަހަރުގެ އަޙްމަދު ލުޖައިންއެވެ. ފުލުހުން ބުނީ އޭނާގެ ބަންދާއިމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހުގެ މުއްދަތަށް އޭނާ ބަންދުކުރުމަށް އަމުރުކޮށްފައި ވާކަމަށެވެ.
މި މައްސަލަ ފުލުހުން މިހާރު ގެންދަނީ އިތުރަށް ތަހުގީގު ކުރަމުންނެވެ.
ގިނަ އަދަދެއްގެ ސިނގިރޭޓް ވަގަށް ނަގައިގެން މީހަކު ހައްޔަރުކުރިއިރު މިމަހު އެއް ވަނަ ދުވަހުން ފެށިގެން ސިނގިރޭޓަށް ނަގާ ޑިއުޓީ ވަނީ ބޮޑުކޮށްފައެވެ. އެއާއެކު ސިނގިރޭޓްގެ އަގު ވަަރަށް ބޮޑަށް އިތުރުވެގެން ދާނެއެވެ.