އިނގިރޭސި ޕްރިމިއާ ލީގުގައި ނިއުކާސްލް ޔުނައިޓެޑުން އާސެނަލް ބަލިކޮށްފިއެވެ.
ނިއުކާސްލްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 1-0 އިންނެވެ.
މެޗުގެ ފެށުން ވެސް ރަނގަޅުވީ އާސެނަލްގެއެވެ. ނަމަވެސް، މެޗުގެ 12 ވަނަ މިނެޓުގައި މެޗުގެ ހަމައެކަނި ލަނޑު ޖަހައި މެޗުގެ ލީޑު ނަގާފައިވަނީ ނިއުކާސްލުންނެވެ. އާސެނަލްގެ ޑިފެންސުން ބޯޅަ ކްލިއާކުރުމުގައި ލަސްކުރުމުގެ ނަތީޖާއަކަށް ވެގެންދިޔައީ އެލެގްޒެންޑާ އިސާކަށް ލިބުނު ފުރުސަތުގެ ބޭނުންހިފާ މެޗުގެ ހަމައެކަނި ލަނޑު ޖެހުމެވެ.
މި ލަނޑާ އެކު އާސެނަލްގެ ފަރާތުން ރަނގަޅު ކުޅުމެއް ފެނިގެންދާނެ ކަމަށް ބެެލެވުނު ނަމަވެސް ފުރަތަމަ ހާފުގައި އާންމުކޮށް އާސެނަލްގެ ފަރާތުން ފެނިގެންދާ މޮޅު ކުޅުން ފެނިގެނެއް ނުދިޔައެވެ. ދެވަނަ ހާފަށް އާސެނަލުން ބައެއް ބަދަލުތައް ގެނައި ނަމަވެސް ނިއުކާސްލްގެ ޑިފެންސް މި މެޗުގައި ފެނިގެންދިޔައީ އާސެނަލްގެ ކުޅުންތެރިންނަށް ފަހަނައަޅާ ދެވޭވަރަށް ވުރެ ވަރުގަދަ ކޮށެެވެ.
މި ކާމިޔާބީއާ އެކު ނިއުކާސްލް މިހާރު އޮތީ 15 ޕޮއިންޓާ އެކު ތާވަލުގެ ނުވަވަނައިގައެވެ. އާސެނަލް މެޗުން ބަލިވުމުން މިހާރު އޮތީ 18 ޕޮއިންޓާ އެކު ތާވަލުގެ ހަތަރުވަނައަށް ވެއްޓިފައެވެ.
މި ވަގުތު ތާވަލުގެ ތިންވަނައިގައި އޮތް ނޮޓިންހަމް ފޮރެސްޓާއި ވެސްޓް ހޭމް ޔުނައިޓެޑް ބައްދަލުކުރި މެޗު އަމިއްލަ ދަނޑުގައި 3-0 އިން ކާމިޔާބުކޮށްފައިވަނީ ފޮރެސްޓެވެ.
މެޗުގައި ފޮރެސްޓްއިން ކާމިޔާބުކުރި ތިން ލަނޑު އެ ޓީމަށް ޖަހައިދީފައިވަނީ ކްރިސް ވުޑް، ކެލުމް ހަޑްސަން އޮޑޯއީ އަދި އޮލާ އިނާއެވެ. މެޗުގެ ފުރަތަމަ ހާފުގެ އިތުރު ވަގުތުގައި ވެސްޓް ހޭމްގެ ޑިފެންޑަރު އެޑްސަން އަލްވަރޭޒަށް ރަތް ކާޑު ދެއްކުމާ ގުޅިގެން އެ ޓީމުން ދެވަނަ ހާފު ކުޅެފައިވަނީ އެއް ކުޅުންތެރިއެއް މަދުކޮށެެވެ.
މި ކާމިޔާބީއާ އެކު ފޮރެސްޓަށް ތިންވަނަ ލިބިފައިވަނީ 19 ޕޮއިންޓާ އެކުއެވެ. ވެސްޓް ހޭމް އުޅެނީ 11 ޕޮއިންޓާ އެކު ތާވަލުގެ 14 ވަނައިގައެވެ.