މި ސަރުކާރުން މިސްރާބުޖަހާފައި ވަނީ ލާމަރުކަޒީ ގާނޫނު ވުޖޫދުން ފޮހެލަންކަން ސަރުކާރުގެ އަމަލުތައް ހުރިގޮތުން ދޭހަވާކަމަށް މާލޭ ސިޓީ ކައުންސިލްގެ މޭޔަރު އާދަމް އާޒިމް މިއަދު ވިދާޅުވެއްޖެއެވެ.
ކައުންސިލްތަކުން ހުށަހެޅި ފައިސާގެ ބޮޑުބައެއް ބަޖެޓުން އުނިކޮށްފައިވާކަން ފާހަގަކޮށް އޭނާ އެކްސްގައި ކުރެއްވި ޕޯސްޓެއްގައި ވަނީ، ސަރުކާރުގެ ނިންމުންތައް ހުރިގޮތުން، ލާމަރުކަޒީ ގާނޫނަށް އަމަލުކުރަން ބޭނުން ނުވާކަން ފެންނަކަމަށެވެ.
"މިއީ ކައުންސިލްތަކުން ރައްޔިތުންނަށް ފޯރުކޮށްދޭންޖެހޭ ޚިދުމަތްތަކުން، ރައްޔިތުން މަހުރޫމްކުރުމަށް ރާވައިގެން ކުރާ ކަންކަކަމުގެ ތެރެއަށް އިތުރުވި ބޮޅެއް. ލާމަރުކަރީ ޤާނޫނުން ކައުންސިލްތަކުން ރައްޔިތުންނަށް ފޯރުކޮށް ދިނުމަށް ލާޒިމްކޮށްފައިވާ ޚިދުމަތް ދިނުމަށް، ބަޖެޓުގައި ހިމަނާފައިވާ ފައިސާ އުނިކުރުމުގެ ބާރު، ސަރުކާރަށް ނޯންނާނެ،" އެ ޕޯސްޓުގައި ވެއެވެ.
އޭނާ ވަނީ މިފަދަ ކަންކަން އިސްލާޙުކުރުމަށް ސަރުކާރަށް ގޮވައިލައްވައިފައެވެ. އަދި ބަޖެޓު ތައްޔާރު ކޮށްފައިވަނީ ލާމަރުކަޒީ ގާނޫނާ ޚިލާފަށްކަމަށާއި ގާނޫނާ އެއްގޮތަށް ބަޖެޓު އެކުލަވާލުމަށް ވެސް އޭނާ ގޮވައިލެއްވިއެވެ.
މި ސަރުކާރުން ގާނޫނަށް ގެންނަން ހުށަހަޅާ އިސްލާހުތައް ލާމަރުކަޒީ ގާނޫނަށް ފުށޫއަރާކަމަށް ބުނެ އިދިކޮޅުގެ ގިނަ ބަޔަކު އަންނަނީ ސަރުކާރަށް ފާޑު ކިޔަމުންނެވެ.
ދައުލަތުގެ އެ އަހަރެއްގެ އާމްދަނީން މަދުވެގެން ފަސް ޕަސެންޓް ކައުންސިލްތަކަށް ޚާއްސަކުރަން ޖެހޭއިރު، މިއަހަރަށް ފާސްކުރި 49.5 ބިލިއަން ރުފިޔާގެ ބަޖެޓުގައި ކައުންސިލަތަކަށް 2.2 ބިލިޔަން ހަމަޖެއްސިއެވެ. ނަމަވެސް މި ސަރުކާރުން އަންނަ އަހަރަށް ހުށަހެޅި 56.6 ބިލިއަން ރުފިޔާގެ ބަޖެޓުގައި ކައުންސިލްތަކަށް ޚާއްސަކޮށްފައި ވަނީ 1.4 ބިލިޔަން ރުފިޔާއެވެ.
އެ މައްސަލައިގައި އެމްޑީޕީގެ ރައީސް އަބްދުﷲ ޝާހިދު ވެސް ކަންބޮޑުވުން ފާޅުކުރައްވައި، ދައުލަތުގެ ބަޖެޓުން ކައުންސިލްތަކަށް ފައިސާ ދިނުން މަދުކޮށްފައިވަނީ ރައްޔިތުން 'ނިކަމެތި' ކޮށްލަން ކަމަށް ވަނީ ތުހުމަތު ކުރައްވައިފައެވެ.