ހދ. ކުޅުދުއްފުށީ "ސަމޭދާން"ގޭގައި ރޯވެ ރޭ ހިނގި އަލިފާނުގެ ހާދިސާގައި އެ ގެ ބޭނުންނުކުރެވޭ ވަރަށް އަނދާ ހުލިވެފައި ވާކަމަށް އާއިލާއިން ބުނެފިއެވެ.
އެ ގޭގެ ވެރިފަރާތުގެ އާއިލާ މީހަކު "ސަން"އާ ވާހަކަ ދައްކަމުން ބުނީ އެ ގޭގައި ރޯވި ސަބަބު އަދިވެސް ދެނެގަނެވިފައި ނުވާކަމަށެވެ.
"ބޮޑަށް ބެލެވެނީ ކަރަންޓު ޝޯޓެއް ވެގެން ކަމަށް،" އޭނާ ބުންޏެވެ.
އެ ގެއަކީ މީގެ ދެތިން އަހަރު ކުރިން މަރާމާތު ކޮށްފައިވާ ގެއެކެވެ. އޭނާ ބުނިގޮތުގައި ގޭގައި ބޮޑަށް ބޭނުންކޮށްފައި ހުންނާނީ ފިލައެވެ.
"ސީލިންގު ވެސް ހަމަ ފިލައިން ހަދާފައި ހުންނާނީ، ބިއްތައް ވެސް ފިލައިން ޖަހާފައި ހުންނާނީ. މުޅިން އާ ގެއެކޭ ދަންނަވާކަށް ނުކެރޭނެ އެކަމަކު،" އޭނާ ބުންޏެވެ.
މި ގޭގައި އަލިފާން ރޯވި އިރު ގޭގައި ދިރިއުޅުނީ ފިރިހެނެކެވެ. އޭނާ މިހާރު ހުރީ އާއިލީ އެހެން ގެއެއްގައެވެ.
ގެ ހަދަން ހޭދަވާނެ އަދަދެއް ލަފާކުރަން ނޭންގޭކަމަށް އޭނާ ބުންޏެވެ. ނަމަވެސް ގެ އަލުން އިމާރާތް ކުރަން ގިނަ އަދަދެއްގެ ފައިސާ ހޭދަވާނެކަމަށް އޭނާ ލަފާކުރެއެވެ.
"މާލީ ތަނަވަސްކަން ހުރި ވަރަކުން ހެދޭނީ އަލުން ދޯ. އެ ދިޔައީ ވެސް ހަމަ ވަރަށް މަސައްކަތް،" އޭނާ ބުންޏެވެ.
ހާދިސާ ހިނގި ސަރަހައްދު މިވަގުތު ފުލުހުން ގެންދަނީ ތަހުގީގު ކުރަމުންނެވެ.
މި ހާދިސާ ހިނގީ ރޭ 21:00 ހާއިރެވެ. އަލިފާން ނިއްވާލީ ކުޅުދުއްފުށީ ފަޔާ ސްޓޭޝަންގެ ސިފައިންގެ މަސައްކަތުންނެވެ.