248 ސިޔާސީ މުވައްޒަފުން ވަކިކޮށްފި، ޕާފޯމަންސް ބަލާނެ ނިޒާމެއް ވެސް ގާއިމުކުރަނީ

ރައީސް ޑރ. މުހައްމަދު މުއިއްޒު އިއުލާނުކުރެއްވި ޚަރަދު ކުޑަކުރުމުގެ ސިޔާސަތުގެ ދަށުން މިހާތަނަށް 248 ސިޔާސީ މުވައްޒަފުން މަގާމުން ވަކިކޮށްފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު މިއަދު ވިދާޅުވެއްޖެއެވެ.

ޚަރަޑު ކުޑަކުރުމުގެ ގޮތުން 228 ސިޔާސީ މުވައްޒަފުން ވަކިކުރާނެކަން ރައީސް އިއުލާނުކުރެއްވީ މިދިޔަ މަހުގެ 15 ގައެވެ.

ރައީސް އޮފީހުގެ ތަރުޖަމާނު ހީނާ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ސަރުކާރުގެ އިކޮނަމިކް ރިފޯމް އެޖެންޑާގެ ދަށުން ޚަރަދު ކުޑަކުރަން އަޅައި ފިޔަވަޅުތަކުގެ ތެރެއިން، މިހާތަނަށް 31 އޮކްޓޯބަރުގެ ނިޔަލަށް 248 ސިޔާސީ މުވައްޒަފުން މަގާމުން ވަކިކޮށްފައިވާ ކަމަށެވެ.

އެއީ، ރައީސް އިއުލާނުކުރެއްވި އަދަދަށްވުރެ 20 މުވައްޒަފުން އިތުރު އަދަދެކެވެ.

ހީނާ ވިދާޅުވީ، މުވައްޒަފުން ވަކިކުރުމާ އެކު، ދެން ތިބި ސިޔާސީ މުވައްޒަފުންގެ ޕާފޯމަންސް ބަލާނެ ނިޒާމެއް ގާއިމުކުރަން ވެސް ވަޒީރުންގެ މަޖިލީހުން މިހާރު ނިންމާފައިވާ ކަމަށެވެ. އެ ނިޒާމަށް ވަރަށް އަވަހަށް އަމަލުކުރަން ފަށާނެ ކަމަށް އޭނާ ވިދާޅުވިއެވެ.

އެކަމަކު، އެކިއެކި ފެންވަރުގައި ސަރުކާރަށް އައްޔަންކޮށްފައި ތިބި ސިޔާސީ މުވައްޒަފުންގެ ޖުމުލަ އަދަދާ ގުޅޭ އެއްވެސް މައުލޫމާތެއް މިހާތަނަށް ސަރުކާރުން ހާމަކޮށްފައެއް ނުވެއެވެ.

ވަކިކުރި މުވައްޒަފުންގެ ތަފުސީލުތައް މިހާތަނަށް ސަރުކާރުން ހާމަކޮށްފައިނުވި ނަމަވެސް އެކަން އިއުލާނުކުރެއްވިއިރު ރައީސް މުއިއްޒު ވިދާޅުވީ، ވަކިކުރާނީ ހަތް ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި 109 ސީނިއާ ޕޮލިޓިކަލް ޑިރެކްޓަރުންގެ އިތުރުން 69 ޕޮލިޓިކަލް ޑިރެކްޓަރުން ކަމަށެވެ.

https://sun.mv/197929

އެ މުވައްޒަފުން ވަކިކުރުމުން ދައުލަތުގެ މާލިއްޔާއިން 5.7 މިލިއަން ރުފިޔާ ސަލާމަތްކުރެވޭނެ ކަމަށް އޭރު ރައީސް ވިދާޅުވިއެވެ.

ސަރުކާރުގެ ވައުދަކީ ސިޔާސީ މުވައްޒަފުންގެ އަދަދު 700 އަށްވުރެ އިތުރުވިޔަނުދީ ހިފެހެއްޓުމެވެ. އެކަމަކު، އެ އަދަދު މިހާރު 2،000 އަށްވުރެ އިތުރުވާނެ ކަމަށް ބައެއް އިދިކޮޅު ފަރާތްތަކުން ތުހުމަތުކުރެއެވެ. ސަރުކާރުން އެކަން ދޮގުކުރި ނަމަވެސް ސީދާ އަދަދު ހާމައެއް ނުކުރެއެވެ.

މި އަހަރަށް އިތުރު 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް ހުށަހަޅުއްވަމުން މާލީ ވަޒީރު މޫސާ ޒަމީރު ވަނީ ސިޔާސީ މުވައްޒަފުންނަށް ހޭދަކުރީ ދައުލަތުގެ މުވައްޒަފުންގެ މުސާރައާއި އިނާޔަތްތަކަށް ކުރާ ހޭދައިގެ ހަތަރު އިންސައްތަ ކަމަށް ވިދަޅުވެފައެވެ.

މާލީ ހިސާބުތަކުން ފެންނަ ގޮތުގައި މި އަހަރު މިހާތަނަށް މުސާރައާއި އިނާޔަތްތަކަށް ކުރި ހޭދަ މިދިޔަ އަހަރަށްވުރެ 1.3 ބިލިއަން ރުފިޔާ އިތުރެވެ. މި އަހަރު ޕޭރޯލަށް ބަޖެޓުކޮށްފައި އަދަދުގެ ހަތަރު އިންސައްތައަކީ 408 މިލިއަނެއްހާ ރުފިޔާއެވެ. ޒަމީރު ވިދާޅުވި ގޮތުން ނަމަ އެއީ ސިޔާސީ މުވައްޒަފުންގެ މުސާރައަށް ކުރާ ހޭދައެވެ.

https://sun.mv/198591

ރާއްޖޭގެ ދަރަނި ބޮޑުވެ، ބޭރުގެ މާލީ އިދާރާތަކުން ކަންބޮޑުވެފައިވާއިރު އަންނަ އަހަރަށް ލަފާކުރާ ދައުލަތުގެ ބަޖެޓުގައި އިސްލާހީ ގިނަ ފިޔަވަޅުތަކެއް ވަނީ ހިމަނާފައެވެ.

އޭގެ ތެރޭގައި ސަރުކާރުގެ އިސްވެރިންނާއި ސިޔާސީ މުވައްޒަފުންގެ އިތުރުން ސަރުކާރު ކުންފުނިތަކުގައި 12،000 ރުފިޔާއަށް ވުރެ ބޮޑުކޮށް މުސާރަ ލިބޭ މުވައްޒަފުންގެ މުސާރައިން 10 އިންސައްތަ ކުޑަކުރަން ވަނީ ނިންމައިފައެވެ. އަދި، ރައީސް މުއިއްޒު ވަނީ އެ މަނިކުފާނުގެ މުސާރައިގެ 50 އިންސައްތަ ނުނަންގަވަން ނިންމަވާފައެވެ.

އަންނަ އަހަރަށް ލަފާކުރާ ބަޖެޓުގައި 11.5 ބިލިއަން ރުފިޔާގެ މާލީ އިސްލާހީ ފިޔަވަޅުތައް ހިމަނާފައިވެއެވެ. އެއީ، ޚަރަދުން ސަލާމަތްކުރެވޭނެ ކަމަށް އަންދާޒާކޮށްފައިވާ 6.6 ބިލިއަން ރުފިޔާއަކާއި އާމްދަނީއަށް އިތުރުވާނެ ކަމަށް އަންދާޒާކޮށްފައިވާ 4.9 ބިލިއަން ރުފިޔާއެވެ.