ރަޝިޔާގެ ކޯޓަކުން ގޫގުލްއަށް ދުނިޔޭގެ މުޅި އުފެއްދުންތެރިކަމަށްވުރެ ބޮޑު ޖޫރިމަނާއެއް ކަނޑައަޅައިފިއެވެ.
ވިހި ނޮނިލިއަން (20,000,000,000,000,000,000,000,000,000,000) ޑޮލަރުގެ މި ޖޫރިމަނާ ކަނޑައަޅާފައިވަނީ ޔޫޓިއުބްގައި ރަޝިޔާގެ ސަރުކާރުގެ މީޑިއާ ޗެނަލްތައް ބްލޮކްކުރުމާ ގުޅިގެންނެވެ.
މިއީ ދުނިޔޭގެ އެންމެ މުއްސަނދި ކުންފުނިތަކުގެ ތެރެއިން އެއް ކުންފުންޏެއް ކަމުގައިވާ ގޫގުލްގެ މުޅި އަގު ކަމުގައިވާ ދެ ޓްރިލިއަން ޑޮލަރަށްވުރެ ވެސް މާ ބޮޑު އަދަދެކެވެ. މިއީ އިންޓަނޭޝަނަލް މަނިޓަރީ ފަންޑުން އަންދާޒާކުރާ ގޮތުގައި ދުނިޔޭގެ މުޅި ޖީޑީޕީ ކަމުގައިވާ 110 ޓްރިލިއަން ޑޮލަރަށްވުރެ ވެސް މާ ބޮޑު އަދަދެކެވެ.
ރަޝިޔާގެ ސަރުކާރުގެ ނިއުސް އޭޖެންސީ ޓާސްއިން ފާހަގަކޮށްފައިވާ ގޮތުގައި މި ޖޫރިމަނާގެ އަދަދު ވަރަށް ބާރު ސްޕީޑެއްގައި އިތުރުވަމުންދެއެވެ. ކްރެމްލިންގެ ސްޕޯކްސްމަން ޑިމިޓްރީ ޕެސްކޯވް ވިދާޅުވެފައިވަނީ މި އަދަދު ކިޔަން ވެސް ނޭނގޭ ކަމަށާއި، ގޫގުލްގެ މެނޭޖްމަންޓުން މި ކަމަށް ސަމާލުކަން ދޭންވާނެ ކަމަށެވެ.
ރަޝިޔާގެ މީޑިއާ އައުޓްލެޓް އާރްބީސީން ރިޕޯޓުކޮށްފައިވާ ގޮތުގައި މި ޖޫރިމަނާ ކަނޑައަޅާފައިވަނީ ޔޫޓިއުބްގައި ރަޝިޔާގެ 17 މީޑިއާ ޗެނަލެއްގެ ކޮންޓެންޓް ހިފެހެއްޓުމާ ގުޅިގެންނެވެ.
މިކަން ފެށިފައިވަނީ 2020 ގައި ނަމަވެސް، 2022 ގައި ރަޝިޔާއިން ޔުކްރެއިނަށް ހަމަލާ ދިނުމާ ގުޅިގެން މިކަން އިތުރަށް ގޯސްވެގެން ގޮސްފައިވެއެވެ. އޭގެ ސަބަބުން ހުޅަނގުގެ ގިނަ ކުންފުނިތަކުން ރަޝިޔާއިން ވިޔަފާރި ހުއްޓާލާފައިވެއެވެ. ޔޫރަޕުގައި ރަޝިޔާގެ މީޑިއާ އައުޓްލެޓްތައް މަނާކުރުމާ ގުޅިގެން މޮސްކޯއިން ބަދަލުހިފުމުގެ ގޮތުން މިފަދަ ފިޔަވަޅުތަކެއް އަޅާފައިވެއެވެ.