ޖަޕާނުގެ ވިޔަފާރި ވާދަވެރިކަމުގެ (އެންޓިޓްރަސްޓް) ގާނޫނާ ޚިލާފުވި ކަމަށް ގޫގުލް އަށް ތުހުމަތު ކޮށްފިއެވެ.
ޖަޕާނުގެ ވިޔަފާރީގެ ވާދަވެރިކަން ބަލަހައްޓާ ފަރާތުން ގޫގުލް އިން އެ ޤައުމުގެ އެންޓިޓްރަސްޓް ޤާނޫނާ ޚިލާފުވެފައިވާކަމަށް ނިންމައިފާނެ ކަމަށް ރިޕޯޓްކޮށްފައިވަނީ ޖަޕާނުގެ މީޑިއާ ނިކެއި އޭޝިއާ އިންނެވެ.
މި ރިޕޯޓުގައި ބުނެފައިވަނީ ޖަޕާން ފެއާ ޓްރޭޑް ކޮމިޝަން (ޖޭއެފްޓީސީ) އިން އަންގަރާ ދުވަހު ގޫގުލްއަށް އެފަދަ އަމަލުތައް ހުއްޓާލުމަށް އަންގާ އަމުރެއް ނެރޭނެ ކަމަށެވެ.
މި މައްސަލައާ ގުޅޭގޮތުން ގޫގުލްއިން އަދި މިހާތަނަށް އެއްވެސް ކޮމެންޓެއް ދީފައެއް ނުވެއެވެ. އަދި ޖޭއެފްޓީސީއިން ވެސް މިކަމާގުޅޭ އިތުރު މައުލޫމާތެއް ހާމަކޮށްފައެއް ނުވެއެވެ.
ގޫގުލްގެ ވެބް ސާރޗް ޚިދުމަތްތަކުގައި އެންޓިމޮނޮޕޮލީ ޤާނޫނާ ޚިލާފުވެފައިވޭތޯ ބެލުމަށް ވެސް ޖަޕާނުގެ ވިޔަފާރި ވާދަވެރިކަން ބަލަހައްޓާ ފަރާތުން ގޫގުލްއާ މެދު ތަހުގީގެއްވަނީ ފަށަފައިެވެ. އެ ތަހުގީގު ފަށާފައިވަނީ މިދިޔަ އަހަރުގެ އޮކްޓޯބަރު މަހެވެ. މިއީ ޔޫރަޕާއި އެހެނިހެން ބޮޑެތި އިގުތިސާދުތަކުގެ އިދާރާތަކުން އެޅި ފިޔަވަޅުތަކާ އެއްގޮތް ފިޔަވަޅެކެވެ.
ގޫގުލްގެ ކްރޯމް ބްރައުޒަރަކީ ދުނިޔޭގައި އެންމެ ގިނައިން ބޭނުންކުރާ ވެބް ބްރައުޒަރެވެ. އަދި މިއީ ގޫގުލްގެ ވިޔަފާރީގެ މައިގަނޑު ތަނބެކެވެ. ކްރޯމް މެދުވެރިކޮށް ޔޫޒަރުންގެ މަޢުލޫމާތު ލިބި، އެ މަޢުލޫމާތުގެ އަލީގައި އިޝްތިހާރުތައް އަމާޒުކުރުމަށް މަގުފަހިވެއެވެ. މިކަމުގެ ސަބަބުން ކުންފުނީގެ ފައިދާ އިތުރުވެއެވެ.
މިދިޔަ މަހު އެމެރިކާގެ ޖަސްޓިސް ޑިޕާޓްމަންޓުން ބުނެފައިވަނީ ގޫގުލްގެ ސާރޗް މޮނޮޕޮލީ ނިމުމަކަށް ގެނައުމަށްޓަކައި އަލްފަބެޓް އިން ކްރޯމް ބްރައުޒަރު ވިއްކާލަންޖެހޭނެ ކަމަށާއި، ފަސް އަހަރު ދުވަހުގެ މުއްދަތަކަށް ބްރައުޒަރުގެ މާކެޓަށް އަލުން ވަނުން މަނާކުރަންޖެހޭނެ ކަމަށެވެ.