ގޫގުލްގެ މަޝްހޫރު ނޯޓް ލިޔުމުގެ އެޕްލިކޭޝަން، 'ގޫގުލް ކީޕް'، އެންޑްރޮއިޑް 16ގެ ސިސްޓަމް އެޕެއްގެ ގޮތުގައި ހިމެނުމަށް ނިންމައިފިއެވެ.
މި ބަދަލު ފާހަގަކުރެވިފައި ވަނީ އަންނަން އޮތް އޮޕަރޭޓިން ސިސްޓަމްގެ ދެވަނަ ޑިވެލޮޕާ ޕްރިވިއުގައެވެ. 2013ވަނަ އަހަރު ތަޢާރަފުކުރި މި އެޕްގެ ތާރީޚުގައި މިއީ އައު ބާބެއްގެ ފެށުމެވެ.
ސިސްޓަމް އެޕެއްގެ ގޮތުގައި ހިމެނުމާއެކު، ގޫގުލް ކީޕްއަށް އެންޑްރޮއިޑްގެ ތެރޭގައި އިތުރު ބާރުތަކެއް ލިބިގެންދާނެއެވެ. މި ބާރުތަކުގެ ސަބަބުން އާންމު އެޕްތަކާ އަޅާބަލާއިރު އޮޕަރޭޓިންގ ސިސްޓަމްގެ ތެރޭގައި އިތުރު ފަންކްޝަންތަކެއް ހިންގުމުގެ ޤާބިލުކަން ލިބިގެންދާނެއެވެ. ނަމަވެސް، މި ބަދަލާއެކު ބޭނުންކުރާ ފަރާތްތަކަށް މި އެޕް އަންއިންސްޓޯލް ކުރުމުގެ ފުރުޞަތު ގެއްލިގެންދާނެއެވެ. އެހެންނަމަވެސް، ބޭނުންވެއްޖެ ހިނދެއްގައި އެޕް ޑިސޭބަލް ކުރުމުގެ ފުރުޞަތު އޮންނާނެއެވެ.
މި ބަދަލާއެކު ގޫގުލް ކީޕް ވެގެންދާނީ ގޫގުލް ޕްލޭ ސްޓޯ، ކޮންޓެކްޓްސް އަދި ފޯނު އެޕް ފަދަ މުހިންމު އެންޑްރޮއިޑް ސިސްޓަމް އެޕްތަކާ އެއްފަންތިއެއްގެ އެޕަކަށެވެ. މި އެޕްތަކަށް ލިބިފައި ވަނީ ބޭނުންކުރާ ފަރާތްތަކުގެ ތަޖުރިބާ ރަނގަޅުކޮށް، ޑިވައިސްގެ ސްޓެބިލިޓީ އިތުރުކުރުމަށް އެހީވާ އިތުރު ހުއްދަތަކެކެވެ.
އެންޑްރޮއިޑް 16ގެ ޑިވެލޮޕާ ޕްރިވިއުގައި ގޫގުލް ކީޕްއަށް ގެނެވޭ އައު ފީޗާތަކެއްގެ ވާހަކަ ވެސް ހިމަނާފައިވެއެވެ. މީގެ ތެރެއިން ފާހަގަކޮށްލެވޭ އެއް ފީޗާއަކީ ލޮކް ސްކްރީނުން ނޯޓްތައް ބެލޭނެ ގޮތް ހެދުމެވެ. މިއީ އަވަހަށް އަދި ފަސޭހައިން ނޯޓްތައް ބޭނުންކުރުމަށް ލިބިގެންދާނެ ފުރުޞަތެކެވެ.
މީގެ އިތުރުން، އެންޑްރޮއިޑާ އެކު ބޭނުންކުރުމުގެ ފުރުޞަތު އިތުރުވެ، އެޕްގެ މުޅި ފަންކްޝަނަލިޓީ ރަނގަޅުވެގެންދާނެކަމަށް ބެލެވެއެވެ.
ގޫގުލް ކީޕް ތަޢާރަފުވީއްސުރެ ވަރަށް ބޮޑު ކުރިއެރުމެއް ހޯދާފައިވެއެވެ. އެންމެ ފުރަތަމަ ފަށައިގަތީ ހަމައެކަނި ނޯޓް ލިޔުމުގެ އެޕެއްގެ ގޮތުގައި ނަމަވެސް، މިހާރު އޭގައި ވަނީ ގިނަގުނަ ފީޗަރތަކެއް ހިމެނިފައެވެ. މީގެ ތެރޭގައި:
- ޓެކްސްޓް، ފޮޓޯ، އޯޑިއޯ އަދި އަތުން ލިޔެފައިވާ ނޯޓްތައް ހެދުން
- ތަފާތު ޑިވައިސްތަކުގައި ސިންކްރޮނައިޒް ވުމުގެ ސަބަބުން ކޮންމެ ތަނަކުން ވެސް ނޯޓްތަކަށް ވާސިލުވުމުގެ ފުރުޞަތު ލިބުން
- ފޮޓޯތަކުން ޓެކްސްޓް ދެނެގަތުމާއި ސާރޗްކުރުމުގެ ޤާބިލުކަން
- ކުލަޖެއްސުމާއި، ލޭބަލް ޖެހުމާއި، ވަގުތާއި ތަނަށް ބަލައި ރިމައިންޑަރ ޖެހުން ފަދަ އިންތިޒާމުކުރުމުގެ ވަސީލަތްތައް
މި ފީޗާތަކުގެ ސަބަބުން ގޫގުލް ކީޕް ވެގެން ގޮސްފައިވަނީ ޚިޔާލުތަކާއި މަސައްކަތްތައް އިންތިޒާމުކުރުމަށް ބޭނުންވާ ފަރާތްތަކަށް ބޭނުންތެރި އަދި އިތުބާރުހުރި އެޕަކަށެވެ.
ގޫގުލް ކީޕް ސިސްޓަމް އެޕަކަށް ހެދުމަށް ގޫގުލުން ނިންމީ އޭގެ އައު ލޮކް ސްކްރީން ޓޫލްތަކުގެ ސަބަބުން ކަމަށް ބެލެވެއެވެ. އެޕް ސިސްޓަމްގެ އަޑިއަށް ވެއްދުމުން، އޭގެ ސްޓެބިލިޓީ އިތުރުވެ، ބޭނުންކުރަން ފަސޭހަވެ، އެންޑްރޮއިޑް ސެޓަޕްގެ މުހިންމު ބައެއްގެ ގޮތުގައި ހިމެނިގެންދާނެއެވެ.
އެންޑްރޮއިޑް 16އިން އިތުރު ބަދަލުތަކެއް ގެނައުމަށް ހަމަޖެހިފައިވާއިރު، ކީޕް ސިސްޓަމް އެޕަކަށް ބަދަލުވުމަކީ މަސައްކަތާއި ޓާސްކްތަކަށް ހިތްގައިމު އަދި ފަސޭހަ ވަސީލަތްތަކެއް ފޯރުކޮށްދިނުމަށް ގޫގުލުން ކުރަމުންދާ މަސައްކަތުގެ ހެއްކެކެވެ.