އެއް އަހަރު ތެރޭގައި 22 ބިލިއަން ރުފިޔާގެ ދަރަނި މި ސަރުކާރުން އުފައްދާފައިވާ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ރޭ ބޭއްވި ޕީއެންއެފް ޖަލްސާގައި ވާހަކަފުޅު ދައްކަވަމުން ޔާމީން ވިދާޅުވީ އެ މަނިކުފާނުގެ ވެރިކަމުގައި ކުރީ ސަރުކާރުތަކުން ނަގާފައިވާ 28 ބިލިއަން ރުފިޔާގެ ދަރަނި ދައްކާފައިވާނެ ކަމަށެވެ.
އެ މަނިކުފާނު ވިދާޅުވި ގޮތުގައި ޕީޕީއެމުން ވެރިކަން ކުރި ފަސް އަހަރުގެ ދައުރުގައި އަހަރެއްގެ މައްޗަށް އުފެދުނީ 1.2 ބިލިއަން ރުފިޔާގެ ދަރަންޏެވެ. އެ އަދަދު އެއަށްވުރެ އިތުރުނުވާނެ ކަމަށް ޔާމީން ވިދާޅުވިއެވެ.
ޔާމީން މިހެން ވާހަކަފުޅު ދެއްކެވީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރު އަހުމަދު މުބީނަށް އަމާޒު ކުރައްވައެވެ. ޔާމީން އެ ބޭފުޅުންނަށް ވިދާޅުވީ އެ މަނިކުފާނުގެ ވެރިކަމުގެ ދަރަނި ހިސާބުކޮށްލުމަށެވެ. އަދި މި ސަރުކާރަށް އެއް އަހަރުވާއިރު، ހުރި ދަރަނި އަޅައިކިޔާލަން އެ މަނިކުފާނު ޗެލެންޖު ކުރެއްވިއެވެ.
ޔާމީން ވިދާޅުވީ އަހަރެއްގެ މައްޗަށް މީހެއްގެ ބޮލަށް ގާތްގަނޑަކަށް 6،000 ޑޮލަރު ޖެހޭ ދައުލަތުގެ އާމްދަނީ، އެ މަނިކުފާނުގެ ވެރިކަމުގައި 12،000 ޑޮލަރަށް އިތުރު ކޮށްދެއްވާފައިވާނެ ކަމަށެވެ.
"ރައީސް ޔާމީން ހިނގާ މަގުން ހިނގަން މަސައްކަތް ކުރުމަކީ ހަމަ ރަނގަޅު ކަމެއް. އެކަމު އެކަން ކުރާ ކަމަށް ވަންޏާ ރައީސް ޔާމީން ކަންތައް ކުރި ގޮތަށް ނަކަލުރެވޭތޯ ބެލުން މާ މޮޅުވާނެ" ޔާމީން ވިދާޅުވިއެވެ.
މި ސަރުކާރުން ވެރިކަމާ ހަވާލުވީއިރު، ދައުލަތުގެ ދަރަނިތައް އިންތިހާއަށް ބޮޑުވެ، މާލީ ހާލަތު އޮތީ ގޯސްވެފައެވެ.
އެއާ އެކު ސަރުކާރުން އަންނަނީ ޚަރަދުކުޑަ ކުރުމުގެ ގޮތުން ބޮޑެތި ބަދަލުތަކެއް ގެނެސް ފިޔަވަޅުތަކެއް އަޅަމުންނެވެ.
ބޭރު ދަރަނި އިންތިހާއަށް ބޮޑުވެފައިވާއިރު، ދަރަނި މިހާރު ހުރީ ޖީޑީޕީގެ ނިސްބަތުން 116.5 އިންސައްތައިގައެވެ. އަހަރު ނިމޭއިރު 118 އިންސައްތައަށް އަރާނެއެވެ. ބޭރުގެ ދަރަނި އަދާކުރަން މިދިޔަ ޕީޕީއެމްގެ ސަރުކާރުގައި އުފެއްދި ސޮވެރިން ޑިވޮލޮޕްމަންޓް ފަންޑުގައި ވެސް ހުރީ 65 މިލިއަން ޑޮލަރެވެ. އެއީ، އެކަށޭނަ އަދަދެއް ނޫން ކަމަށް ވޯލްޑް ބޭންކުން ވަނީ ބުނެފައެވެ.
މާލީ ހާލަތާ ގުޅިގެން ކަންބޮޑުވުން ބޮޑުވި ނަމަވެސް، ސަރުކާރުން ވަނީ މި ހާލަތުން އަރައިގަނެވޭނެކަމުގެ ޔަގީންކަން ދީފައެވެ.