ރާއްޖޭގެ ވިޔަފާރިވެރިންނަށް އިންވެސްޓުކޮށްގެން ކުރިއަށްދެވޭނެ ގޮތެއް މިއަދު ނެތްކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމު މިރޭ ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އަމިއްލަފުޅު ޕާޓީ ޕީޕަލްސް ނެޝެނަލް ފްރަންޓް (ޕީއެންއެފް)އިން ސިލްސިލާ ގޮތެއްގައި ބާއްވަމުން އަންނަ ޖަލްސާގައި ވާހަކަދައްކަވަމުންނެވެ.
ޔާމީން ވިދާޅުވީ ރާއްޖޭގައި އިންވެސްޓާ ކޮންފިޑެންސް އިތުރުކުރައްވާނެ ކަމަށް ރައީސް ޑރ މުޙައްމަދު މުއިއްޒު ވެރިކަމަށް ވަޑައިގެންނެވިއިރު ވިދާޅުވި ކަމަށެވެ. އިންވެސްޓަރުންގެ އިތުބާރު އިތުރުކުރުމުގެ މާނައަކީ ރާއްޖޭގެ ބޮޑެތި ވިޔަފާރިވެރިން ބޮޑެތި މަސައްކަތްތަކަށް ކުރިމަތިލުމާއި ވިޔަފާރީގެ ގޮތުން ފައިދާލިބޭ ތަނަކަށް ރާއްޖެވުމުން އެމީހުންގެ ލާރި އެހެން ދިމާލަކަށް ނުގެންގޮސް ރާއްޖޭގައި އެ މީހުންގެ ފައިސާއިން ފައިދާހުރި ބޮޑެތި މަސައްކަތްތައް ކުރުން ކަމަށް ޔާމީން ވިދާޅުވިއެވެ.
އެމަނިކުފާނު ވިދާޅުވީ ކުދިކުދި ގައުމުތަކަށް އެ ގައުމުތަކުގައި ހުންނަ ފައިސާއިން ތަނަވަސްނުވާނެ ކަމަށެވެ.
އެހެންވެ ބޭރުގެ އިންވެސްޓަރުންނަށް ފަހި މާހައުލެއް ގާއިމްކޮށް، އެމީހުން ޝައުގުވެރިވާ ކަންތައްތަކާއި ބޭނުންވާ ކަންތައްތައް ކޮށްދީ ރާއްޖެ ގެނެސް އެމީހުން ލައްވާ ބޮޑެތި މަސައްކަތް ކުރުމަކީ އިންވެސްޓަރުންގެ އިތުބާރު ހޯދަންޖެހޭ ސަބަބެއް ކަމަށް ޔާމީން ވަނީ ވިދާޅުވެފައެވެ.
"މުއިއްޒުގެ ވެރިކަމަށް 12 މަސް ވާން މި ގާތްވަނީ ކޮބާތޯ އަޅުގަނޑުމެން ތިބި ގައުމުގެ ވާހަކަ. ކޮބާތޯ މިއާ އިންވެސްޓާ ކޮންފިޑެންސާ އޮތް ގުޅުން،" ރައީސް ޔާމީން ވިދާލުވިއެވެ.
ޔާމީން ވިދާޅުވީ ފުރަތަމަ ކަމަކަށް، މި ގައުމަކީ ބޭރު މީހުން އިންވެސްޓު ކުރުމަށް އެދޭ ގައުމަކަށް ވާނީ ގައުމުގައި ފަހި ވިޔަފާރި މާހައުލެއް އޮވެގެން ކަމަށެވެ.
އަދި އެ މާހައުލު އޮވެއްޖެ ނަމަ އޭގެ ފައިދާ ވާނީ ދިވެހި ރައްޔިތުންނަށް ކަމަށާއި ރައްޔިތުންގެ އިގްތިސާދީ މަސައްކަތްތަކެއް ފެންނާނެ ކަމަށް ޔާމީން ވަނީ ވިދާޅުވެފައެވެ. ނަމަވެސް މިހާރު ފެނިގެންދަނީ ދިމާ އިދިކޮޅު ކަމަށް އެ މަނިކުފާނު ވަނީ ވިދާޅުވެފައެވެ.
"މިހާރު އެބަހުރި ވިޔަފާރި ދާއިމީކޮށް ބަންދުވީ ޖަހާފަ ބޯޑު އަޅުވާފައި ހުރި ތަންތަން. އެހެންވީމަ ކޮބާހެއްޔޭ، މީގެ ހަމަ ދިމާ އަނެއް ކޮޅަށޭ މި ދިޔައީ. ތި އިންވެސްޓާ ކޮންފިޑެންސް ރާއްޖެއާ ހަމައިގައި، ރާއްޖޭގެ ވިޔަފާރިވެރިންނަކަށް ނެތޭ އިންވެސްޓްކޮށްގެން ކުރިއަށް ދެވޭނެ ގޮތެއް. އޭގެ މައްސަލަތަކެކޭ އެ އުޅެނީ،" ޔާމީން ވިދާޅުވިއެވެ.
ޔާމީން ވިދާޅުވީ ވިޔަފާރީގެ ފަހި މާހައުލެއް ގާއިމްކުރަން ސަރުކާރުންދޭ ގެރެންޓީތަކަކީ މި ކަންކަން ހައްލުވެގެން އޭގެ ޒާތުގައި އަންނަ ކަންކަން ކަމަށެވެ. ބޭރުގެ ބޮޑެތި ވިޔަފާރިވެރިން އަންނާނީ ވެސް މި ކަންކަން އިތުރުކޮށްގެން ކަމަށް ވިދާޅުވިއެވެ.
"މިހާރު ރާއްޖޭގަ ޓޫރިޒަމް ދާއިރާ ކަމަށް ވިޔަސް އެއާޓެކްސީ ކަމަށް ވިޔަސް ކުރީގަ ހަދާފަކުރި ބޮޑެތި އިންވެސްޓްމެންޓްތައް މިހިރީ. މިއިން އެއްވެސް ކަމެއް ކުރާކަށް ސޯލިހުގެ ފަސް އަހަރާއި މިހާރު މިދާ 14 މަހުގެ ތެރޭގައި މިކަހަލަ އެއްވެސް ބޮޑެތި އިންވެސްޓްމެންޓެއް ނުފެނޭ،" ޔާމީން ވިދާޅުވިއެވެ.
ޔާމީން ވިދާޅުވީ މީގެ ކުރީން އަހަރަކު 10 ރިސޯޓު ހުޅުވިތަން ފެނިފައި އެބަހުރި ކަމަށެވެ. އިންވެސްޓާ ކޮންފިޑެންސްއަކީ އެއީ ކަމަށާއި އެ ރިސޯޓުތައް ހުޅުވާފައި ހުރީ މައިގަނޑު ގޮތެއްގައި ބޭރުގެ ފަރާތްތަކުން ކަމަށް ޔާމީން ވަނީ ވިދާޅުވެފައެވެ.