ރާއްޖޭގެ ރައީސުން ހިމެނޭ ގޮތަށް، ދައުލަތުގެ މުވައްޒަފުންގެ މައްސަލަތަކުގައި ދައުވާކުރުމަށް ހުރި ގޮންޖެހުންތައް ނައްތާލަން ގާނޫނަށް އިސްލާހު ގެންނަން ރައީސް ޑރ. މުޙައްމަދު މުއިއްޒު ނިންމެވީ ކޮރަޕްޝަން ނައްތައިލުމުގެ ނިޔަތާއި އަޒުމާއެކު ކަމަށް ހޯމް މިނިސްޓަރު އަލީ އިހުސާން މިރޭ ވިދާޅުވެއްޖެއެވެ.
އިހުސާން މިފަދައިން ވިދާޅުވީ ރައީސްގެ އެ އިސްލާހު ގެންނަވާނެކަން ހާމަކުރެއްވުމާ ގުޅިގެން އެކްސްގައި ކުރެއްވި ޕޯސްޓެއްގައެވެ.
އިހުސާން ވިދާޅުވީ މިހާރު އޮތް ޤާނޫނުގައި މާއްދާ އޮތީ ތުހުމަތުކުރެވުނު ނަމަވެސް އެއްވެސް މީހެއްގެ މައްޗަށް ދައުވާ ނުކުރެވޭ ގޮތަށްކަމަށެވެ.
އަދި ދައުވާކުރުމުން ސާބިތު ވެސް ނުވާގޮތަށް ކަމަށް ވިދާޅުވިއެވެ. އަދި އޭނާ ސިފަކުރެއްވީ އެއީ ކަންކުރުމުގެ ނިޔަތް ނެތި ލިޔެފައޮތް މާއްދާއެއް ގޮތަށެވެ.
ނަމަވެސް ރައީސް މުއިއްޒުގެ ނިންމެވުމަށް ތައުރީފްކުރައްވައި ވަނީ އެއީ ކޮރަޕްޝަން ހުއްޓުވުމުގެ ނިޔަތުގައި ކުރައްވާ ކަމެއްކަމަށް ވިދާޅުވެފައެވެ.
"ރައީސް ޑރ. މުއިއްޒު މިގެންނަވަން ނިންމެވި އިސްލާހަކީ ދައުލަތްތެރޭ އޮތް ޒަމާންވީ ކޮރަޕްޝަންގެ މައްސަލަ ހައްލުކުރެވޭނެ އަދި އެނިޔަތާއި އަޒުމް ފެންނަ އިސްލާހެއް،" އިހުސާން ވިދާޅުވިއެވެ.
ރައީސް މިއަދު ވިދާޅުވީ ދައުލަތުގެ އިދާރާތަކުގެ ތެރޭގައި އަށަގެންފައިވާ ކޮރަޕްޝަނާއި ނުހައްގު މުއްސަނދިކަން ހޯދުމުގެ މައްސަލަތައް ތަހްގީގުކޮށް، ދަޢުވާކުރުމަށް ހުރި ގޮންޖެހުންތައް ނައްތާލުމަށް ދިވެހިރާއްޖޭގެ ޤާނޫނުލްއުޤޫބާތަށް ގެންނަންޖެހޭ އިސްލާހުތައް މިފެށޭ ހަފުތާގައި ސަރުކާރުގެ ފަރާތުން މަޖިލީހަށް ހުށަހެޅުމަށް ނިންމާފައިވާ ކަމަށެވެ.
ރައީސް ވިދާޅުވީ ޤާނޫނުލްއުޤޫބާތުގެ 515 ވަނަ މާއްދާއަށް ގެނެވޭ އިސްލާހުގެ ސަބަބުން ރައީސުލްޖުމްހޫރިއްޔާއާއި ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ފަނޑިޔާރުން ހިމެނޭގޮތުން، ދައުލަތުގެ މުވައްޒަފުންނާއި ދައުލަތުގެ މުވައްޒަފެއްގެ މަޤާމު އަދާކޮށްފައިވާ ފަރާތްތަކުން ހޯދަމުންދާ ނުވަތަ ހޯދާފައިވާ ނުޙައްޤު މުއްސަނދިކަމުގެ މައްސަލަތައް ބެލުމަށް ފަސޭހަވާނެ ކަމަށެވެ.
ރާއްޖޭގައި ހިންގާ ބޮޑެތި ކޮރަޕްޝަނުގެ މައްސަލަތައް ބެލުމުގެ ޒިންމާ މަތިކޮށްފައި އޮންނަނީ އެންޓި ކޮރަޕްޝަން ކޮމިޝަން (އޭސީސީ)އަށެވެ.