ޕީސީބީން ''ވަކިކޮށްފައި'' ވަނިކޮށް އައިޝަތު ނޫރައްދީން ބޭންކް ބޯޑުން އިސްތިއުފާ ދެއްވައިފި

ބޭންކް އޮފް މޯލްޑިވްސް (ބީއެމްއެލް)ގެ ބޯޑުން އެ ކުންފުނީގެ ޑެޕިއުޓީ ސީއީއޯ، އައިޝަތު ނޫރައްދީން ވަކިކޮށްފައިވާ ކަމަށް، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ސިޓީ ފޮނުވާފައިވަނިކޮށް އޭނާ އެ މަގާމުން އިސްތިއުފާ ދެއްވައިފިއެވެ.

އައިޝަތު ނޫރައްދީން ބޯޑު މެންބަރުކަމުން ވަކިކޮށްފައިވާ ކަމަށް ޕީސީބީން އޭނާއަށް ސިޓީ ފޮނުވީ މިދިޔަ ބުރާސްފަތި ދުވަހުއެވެ. ނަމަވެސް، ބޭންކްގެ އަސާސީ ގަވާއިދު ބުނާގޮތުން އެގޮތަށް ޕީސީބީއަށް ބޭންކުގެ ބޯޑު މެންބަރަކު ވަކި ނުކުރެވޭނެ ކަމަށް ބައެއް ގާނޫނީ ބޭފުޅުން ދިޔައީ ބުނަމުންނެވެ.

ބީއެމްއެލްއިން ޔަގީން ކޮށްދޭ ގޮތުގައި އައިޝަތު ނޫރައްދީން ބޯޑު މެންބަރުގެ މަގާމުން އިސްތިއުފާ ދެއްވީ މިދިޔަ އާދިއްތަ ދުވަހުއެވެ.

ނަމަވެސް، އަދިވެސް އައިޝަތު ނޫރައްދީން ހުންނެވީ ބޭންކުގެ ޑެޕިއުޓީ ސީއީއޯގެ މަގާމުގައެވެ. އޭނާ ބޭންކަށް ޚިދުމަތް ކުރައްވާތާ 42 އަހަރު ވަނީ ވެފައެވެ.

މިދިޔަ އާދިއްތަ ދުވަހު ބީއެމްއެލްއިން ވަނީ ރުފިޔާ ކާޑަށް ޑޮލަރު ލިމިޓް ދިނުން ހުއްޓާލުމަށް ނިންމައިފައެވެ. އަދި، ކްރެޑިޓް ކާޑަށް ވެސް މަހަކު 100 ޑޮލަރު އެކަނި ދޭން ނިންމިއެވެ. ބޭންކުން އެ ނިންމުން ނިންމީ އެ ބޭންކަށް ޑޮލަރުން ލިބޭ އާމްދަނީ ދަށްވުމުން އެހެން ގޮތެއް ނެތިގެން ކަމަށް ބުނެއެވެ.

އެ ނިންމުން ސަރުކާރުން ސިފަކުރަނީ ބަޣާވާތެއް ކުރަން އުޅުނީ ކަމަށެވެ. ޕީއެންސީއިން ރޭ ބޭއްވި ޖަލްސާއެއްގައި ރައީސް ޑރ. މުޙައްމަދު މުއިއްޒާއި ފިޝަރީޒް މިނިސްޓަރު އަޙްމަދު ޝިޔާމް ވެސް ވަނީ އެ ގޮތަށް ސިފަކޮށް ބޭންކުގެ އަމަލު ކުށްވެރިކޮށްފައެވެ.