މާލޭގައި ބިދޭސީ މީހަކަށް އޮޅުވާލައިގެން އޭނާ ގެއަކަށް ގެންގޮސް، ވަޅިން ބިރުދައްކައިގެން ފޭރުނު މައްސަލައެއްގައި ދިވެހި އަންހެނަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައި ވަނީ، މއ. ފޯޗިއުން، އުމުރުން 37 އަހަރުގެ ފާތިމަތު ޢަލީއެވެ.
ފުލުހުން ބުނީ، އޭނަ ހައްޔަރު ކުރީ އިއްޔެ 22:08 ހާއިރު ބަންގްލަދޭޝް ރައްޔިތަކު ގަލޮޅު ގެއަކަށް އޮޅުވާލައިގެން ގެންގޮސް، ވަޅިން ބިރުދައްކައި ފޭރުނު މައްސަލައަކާ ގުޅިގެން ކަމަށެވެ.
އޭނާގެ ބަންދާ މެދު ގޮތެއް ނިންމަން ކޯޓަށް ހާޒިރު ކުރުމުން 15 ދުވަހަށް ބަންދު ކުރުމަށް ވަނީ އަމުރުކޮށްފައެވެ.
މި މައްސަލައިގައި ފާތިމަތު އަލީގެ އިތުރުން އެ އަމަލު ހިންގުމަށް އެހީތެރިވި ކަމަށް ތުހުމަތު ކުރެވޭ ދިވެހި ފިރިހެނެއް ހޯދުމުގެ މަސައްކަތް ތަހުގީގުގެ ތެރެއިން ކުރަމުން އަންނަ ކަމަށް ފުލުހުން ބުންޏެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.