މުޖުތަމަޢުގައި އުފާވެރިކަން އާލާކުރުމުގެ މަޤްޞަދުގައި ހެޕިނަސް ކުލަބުން ތަޢާރަފުކޮށްފައިވާ ޕޮޑްކާސްޓް ސިލްސިލާގެ ފުރަތަމަ އެޕިސޯޑަކީ "ހިތުލޯބި" އެވެ. މި އެޕިސޯޑް ވަނީ 2023 އޮކްޓޫބަރު 4 ވަނަ ދުވަހު ސަން ޕޮޑްކާސްޓް މެދުވެރިކޮށް ޢާންމުކޮށްފައެވެ. މި އެޕިސޯޑުގެ ޚާއްޞަ މެހެމާނަކީ ތަޢުލީމީ ދާއިރާގެ ތަޖުރިބާކާރު، 44 އަހަރަށްވުރެ ގިނަ ދުވަހު ޤައުމަށް ޚިދުމަތް ކުރައްވާފައިވާ އަލްފާޟިލް ސަޢީދު އަޙްމަދެވެ.
ސަޢީދު އަޙްމަދު ވިދާޅުވި ގޮތުގައި އޭނާއަކީ އަބަދުވެސް އުފާވެރި މީހެކެވެ. އޭނާގެ ނަމުގެ މާނައަކީ ވެސް އުފާވެރިކަމެވެ. އޭނާގެ ޅަފަތުގެ އުފާވެރި ހަނދާންތަކުގެ ތެރޭގައި، ޢާއިލާގެ މެދުގައި އޮތް ބަދަހި ގުޅުމާއި، މައިންބަފައިންގެ ލޯބި، އަދި ކުދިކުދި ހަދިޔާތަކުން ލިބުނު އުފާވެރިކަމުގެ އިޙްސާސްތައް ހިއްސާ ކުރެއްވިއެވެ.
ސަޢީދު އަޙްމަދުގެ ތަޢުލީމީ ދަތުރު ފެށިގެން އައީ ކުޅުދުއްފުށީގެ އެދުރުގެއަކުން، އޭރުގެ މަޝްހޫރު މުދައްރިސާ ފާތުމަދައިތަގެ އަރިހުންނެވެ. އޭނާގެ ރަސްމީ ތަޢުލީމު ފެށިގެން އައީ މާލޭގެ އީ.ޕީ.އެސް ސްކޫލުންނެވެ. މާލޭގައި ކިޔެވުމުގެ އެންމެ ފުރަތަމަ މަރުޙަލާގައި އެހީތެރިވެ ވަޑައިގެންދެއްވީ މިހާރުގެ މަޝްހޫރު ލިޔުންތެރިޔާ މުޙައްމަދު ފާރޫޤާއި، ޑރ. މުޞްޠަފާ ލުޠުފީކަން ޝުކުރުވެރިކަމާއެކު ފާހަގަކުރެއްވިއެވެ.
އީ.ޕީ.އެސް ނިންމެވުމަށްފަހު ސަޢީދު އަޙްމަދު މަތީ ތަޢުލީމު ޙާޞިލުކުރެއްވީ އިނގިރޭސިވިލާތުގެ އެޑިންބަރާގައެވެ. އެ ދުވަސްވަރަކީ ވެސް އުފާވެރި ދުވަސްތަކެއްކަމުގައި ވިދާޅުވިއެވެ. ދަތުރުފަތުރުކުރެއްވުމަކީ އޭނާ ޝައުޤުވެރިވާ ކަމެއްކަމަށާއި، އެ ދުވަސްވަރަކީ ވެސް އުފާވެރި ހަނދާންތަކާ ގުޅިފައިވާ ދުވަސްތަކެއްކަން ފާހަގަކުރެއްވިއެވެ.
ސަޢީދު އަޙްމަދުގެ ޅަފަތުގެ ހަނދާންތަކުން ޢިބްރަތްތެރި ފިލާވަޅުތަކެއް ލިބިގެންދެއެވެ. އޭނާ ފާހަގަކުރެއްވި ގޮތުގައި މައިންބަފައިންގެ ލޯތްބާއި އޯގާތެރިކަން ފުރިހަމައަށް ލިބުމުގެ މުހިންމުކަމާއި، ޢާއިލާގެ ތެރޭގައި އެއްކުއްޖަކު އަނެއްކުއްޖަކާ ދޭތެރޭގައި އަޚުވަންތަކަން ޤާއިމުވެފައި އޮތުމުގެ މުހިންމުކަން ހާމަވެއެވެ. އަދި ކިތަންމެ އާދައިގެ އެއްޗެއްކަމުގައި ވިޔަސް، ލިބުނު ހަދިޔާތަކުން ވަރަށް ބޮޑު އުފަލެއް ލިބިވަޑައިގަތްކަން ފާހަގަކުރެއްވިއެވެ.
ޢީދު ފާހަގަކުރުމާއި ކުޅިވަރުތަކުގެ ތެރެއިން ދިރިއުޅުމަށް މުހިންމު ހުނަރުތަކެއް ދަސްވެގެންދިޔަކަން ސަޢީދު އަޙްމަދު ފާހަގަކުރައްވައެވެ. ކުޅުދުއްފުށީގެ މަޝްހޫރު ކުޅިވަރު ކަމުގައިވާ މަށިމާލި ކުޅުމުގެ ތަޖުރިބާ ލިބިވަޑައިގަތްކަން ވެސް ހާމަކުރައްވައެވެ. އަދި ލޯތްބާއި ހިތްހަމަޖެހުމާއި އުފާވެރިކަމަކީ ހަމައެކަނި މާއްދީ މުއްސަނދިކަމުން ލިބޭ އެއްޗެއް ނޫންކަމަށް ވިދާޅުވެއެވެ. އެއީ މިފަދަ ތަޖުރިބާގެ ތެރެއިން އުފެދޭ ގުޅުންތަކުން އުފެދޭ ވަރުގަދަ އިޙްސާސްތަކެއް ކަމުގައި ފާހަގަކުރެއްވިއެވެ.
ސަޢީދު އަޙްމަދުގެ ވާހަކަފުޅުތަކުން އަލިއަޅުވާލެއްވީ އިންސާނީ ގުޅުންތަކާއި ހިތުގެ އިޙްސާސްތަކުގެ މުހިންމުކަމުގެ މައްޗަށެވެ. އަދި ކުޑައިރުގެ ތަޖުރިބާތަކުން ދިރިއުޅުމަށް ބޭނުންތެރި ފިލާވަޅުތަކެއް ލިބިދޭކަން ފާހަގަކުރެއްވިއެވެ. މިއީ މިއަދުގެ ޖީލުތަކަށް ފުރުޞަތުތައް ފަހިކޮށްދިނުމުގައި އަޅުގަނޑުމެން ވިސްނާލަން ޖެހޭ މުހިންމު ނުކުތާތަކެކެވެ.
ތަޢުލީމީ ދާއިރާއާ ގުޅޭގޮތުން ވާހަކަފުޅު ދައްކަވަމުން، ވިލާ އިންޓަރނޭޝަނަލް ހައިސްކޫލަށް ނިސްބަތްކުރައްވާ ސަޢީދު އަޙްމަދު ވިދާޅުވެފައިވަނީ އެ ސްކޫލަކީ "އުފާވެރިކަމާއި ލޯބީގެ ބަނދަރެއް" ކަމަށެވެ. ދަރިވަރުންގެ ތަޢުލީމީ ކުރިއެރުމަށް އުފާވެރި މާޙައުލެއް މުހިންމު ކަމަށް އޭނާ ދެކެވަޑައިގަންނަވައެވެ. އަދި ރަސްމީ މެޑެއްޔަކަށްވުރެ މީހުންގެ ހިތުން ދޭ ހިތުލޯބީގެ އަގު މާ މަތިވެރި ކަމަށް ސަޢީދު ދެކެވަޑައިގަންނަވައެވެ. މިކަމުގެ މިސާލެއްގެ ގޮތުން، ދަރިވަރުން ތައްޔާރުކޮށް ހަދިޔާކުރި ހަނދާނީ ފޮތުގައިވާ އިޚްލާޞްތެރި ޝުޢޫރުތަކުގެ އަގު ވަޒަންކުރައްވާ ކަމުގައި ވިދާޅުވެއެވެ.
މުދައްރިސުންގެ ދައުރުގެ މުހިންމުކަން ފާހަގަކުރައްވައި، ދަރިވަރުންނާއި މުދައްރިސުންގެ ދެމެދުގައި ރަނގަޅު ގުޅުމެއް އޮންނަންޖެހޭ ކަމަށް ވިދާޅުވިއެވެ. އަދި ސްކޫލުގެ އެންމެހައި މުވައްޒަފުން ދަރިވަރުންނަށް ނަމޫނާއަކަށް ވާންޖެހޭ ކަމަށް ވިދާޅުވިއެވެ. ހަމައެއާއެކު، ދަރިވަރުންނާމެދު ހަމަހަމަކަމާއެކު މުޢާމަލާތްކުރުމުގެ މުހިންމުކަން ފާހަގަކުރައްވާ، ސްކޫލެއްގެ އަޚްލާޤު ބިނާވެފައިވަނީ ޕްރިންސިޕަލާއި ދަރިވަރުންގެ ދެމެދުގައި އޮންނަ ގުޅުމުގެ މައްޗަށް ކަމަށް ވިދާޅުވިއެވެ. އަދި މުދައްރިސުންނާއި ދަރިވަރުންގެ މެދުގައި އިތުބާރާއެކު މުޢާމަލާތްކުރެވޭނެ މާޙައުލެއް އޮތުމުގެ މުހިންމުކަންވެސް ފާހަގަކުރެއްވިއެވެ.
ބެލެނިވެރިންގެ ދައުރާ ގުޅޭގޮތުން ވާހަކަފުޅު ދައްކަވަމުން، ސަޢީދު ވިދާޅުވެފައިވަނީ ބެލެނިވެރިން ސްކޫލު ހިންގާ ފަރާތްތަކަށް އިޙްތިރާމްކޮށް، އިތުބާރުކުރުން މުހިންމުކަމުގައެވެ. އަދި ސްކޫލާއި ބެލެނިވެރިންގެ ދެމެދުގައި އޮންނަ ގުޅުމުގެ ނަމޫނާ ދަރިވަރުންނަށް ފެންނަން ޖެހޭކަމަށް ވިދާޅުވެއެވެ. މި ހުރިހާ ކަމެއްގެ މައިގަނޑު މަޤްޞަދަކީ ދަރިވަރުންނަށް ފަހި މާޙައުލެއް ޤާއިމްކޮށްދިނުމާއި، އެކުދިންގެ ތަޢުލީމީ އަދި އަޚްލާޤީ ކުރިއެރުމަށް މަގުފަހިކޮށްދިނުން ކަމުގައި ސަޢީދު ވިދާޅުވިއެވެ.
ޚުލާޞާކޮށް ބަލާއިރު، ސަޢީދު އަޙްމަދުގެ ވާހަކަފުޅުތަކުގައި އަލިއަޅުވާލެއްވީ ތަޢުލީމީ ދާއިރާގައި އިންސާނީ ގުޅުންތަކުގެ މުހިންމުކަމުގެ މައްޗަށެވެ. އަދި އުފާވެރި އަދި ލޯބިން ފުރިގެންވާ މާޙައުލެއްގައި ކިޔެވުމުގެ ކުދިންނަށް ލިބިދިނުމުގެ މުހިންމުކަމާއި، މުދައްރިސުންނާއި ދަރިވަރުންނާއި ބެލެނިވެރިންގެ ދެމެދުގައި އޮންނަންޖެހޭ ގުޅުމުގެ މުހިންމުކަމުގެ މައްޗަށެވެ. މިފަދަ މާޙައުލެއްގައި ދަރިވަރުންގެ ތަޢުލީމީ އަދި އަޚްލާޤީ ކުރިއެރުން ހަރުދަނާ ކުރެވޭނެކަމަށް ސަޢީދު ދެކެވަޑައިގަންނަވައެވެ.
މި ޕްރޮގްރާމުގައި، ދަރިވަރުންނާއި މުދައްރިސުންނާއި ބެލެނިވެރިންގެ ބައިވެރިވުމާއެކު، ސްކޫލް މާޙައުލަކީ އުފާވެރި ތަނަކަށް ހެދުމުގެ މުހިންމުކަމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. މި މަޝްވަރާތަކުގައި ދަރިވަރުންނަށް ނިންމުންތައް ނިންމުމުގެ ފުރުޞަތު ދިނުމުގެ މުހިންމުކަމާއި، ދަރިވަރުން އިސްނަގައިގެން ޙަރަކާތްތައް ރާވައި ހިންގުމަށް ހިތްވަރުދިނުމުގެ މުހިންމުކަން ފާހަގަވިއެވެ.
މީގެ އިތުރުން، ދަރިވަރުންގެ ތަރައްޤީއަށް ބޭނުންވާ ޖާގައާއި ވަސީލަތްތައް ފޯރުކޮށްދިނުމާއި، ހުސްވަގުތު ހެޔޮގޮތުގައި ހޭދަކުރުމުގެ ފުރުޞަތުތައް ތަނަވަސްކޮށްދިނުމުގެ މުހިންމު ކަމުގެ މައްޗަށް އަލިއަޅުވާލެވުނެވެ. ހަމައެހެންމެ، ކުޅިވަރާއި އެހެނިހެން ޙަރަކާތްތަކަށް އެކަށީގެންވާ ވަގުތާއި ޖާގަ ދިނުމާއި، ރައްކާތެރި އަދި ހިތްފަސޭހަ މާޙައުލެއް ޤާއިމުކުރުމުގެ މުހިންމުކަންވެސް ފާހަގަކުރެވުނެވެ.
ސްކޫލްގެ މާހައުލަކީ އުފާވެރިކަމާއި ލޯތްބާއި އަޅާޅުން އެކުލެވޭ މާހައުލަކަށް ހެދުމުގެ ނަތީޖާއެއްގެ ގޮތުން، ދަރިވަރުންނަކީ މުސްތަޤުބަލުގައި މުޖުތަމަޢަށް ފައިދާހުރި، އުފެއްދުންތެރި އަދި ޒިންމާދާރު ރައްޔިތުންތަކަކަށް ވެގެންދާނެކަމާއި، ޤައުމުގެ ތަރައްޤީއަށް އެހީތެރިވެދޭނެ ބަޔަކަށް ވާނެކަން ކަށަވަރު ކުރެވޭނެކަން، ޕްރޮގްރާމުގައި ފާހަގަކުރެވުނެވެ. މި ޕްރޮގްރާމުގެ ސަބަބުން ސްކޫލް މާޙައުލަކީ އުފާވެރި، ރައްކާތެރި އަދި ދަރިވަރުންގެ ކުރިމަގު އުޖާލާކޮށްދޭނެ ތަނަކަށް ހެދުމަށް އިތުރު ބާރެއް ލިބިގެންދާނެކަން ޔަޤީނެވެ.