އަލްފަބެޓްގެ އޭއައި އިންވެސްޓްމަންޓްތަކުން ވިޔަފާރި ކުރިއަރައިފި

އަލްފަބެޓްއިން އާޓިފިޝަލް އިންޓެލިޖެންސް (އޭއައި)އަށް ކުރަމުންދާ އިންވެސްޓްމަންޓްތަކާ ގުޅިގެން، ކުންފުނީގެ ވިޔަފާރި ވެސް ވަރަށް ބޮޑަށް ކުރިއަރައިފިއެވެ.

މި އަހަރުގެ ތިން ވަނަ ކުއާޓަރުގައި އަލްފަބެޓްގެ އާމްދަނީ 88.27 ބިލިއަނަށް އަރައިފައިވާއިރު އެއީ މިދިޔަ އަހަރުގެ އެ މުއްދަތާ އަޅައިބަލާއިރު 15 ޕަސެންޓުގެ އިތުރުވުމެކެވެ.

ގޫގުލްގެ މައި ކުންފުނި އަލްފަބެޓުން ބުނެފައިވަނީ އެ ކުންފުނިން އޭއައިއަށް ކުރަމުންދާ އިންވެސްޓްމަންޓްތަކުގެ ނަތީޖާ ފެންނަން ފަށައިފައިވާ ކަމަށެވެ. މިގޮތުން ތިންވަނަ ކުއާޓަރުގައި ކުންފުނީގެ ކްލައުޑް ވިޔަފާރި 35 އިންސައްތަ އިތުރުވެފައިވާ ކަމަށާއި، އެމެރިކާގެ އިންތިޚާބާ ގުޅިގެން ޔޫޓިއުބްގެ އިޝްތިހާރު ވިޔަފާރި ވެސް އިތުރުވެފައިވާ ކަމަށް ވަނީ ހާމަކޮށްފައެވެ.

މި ޚަބަރާ ގުޅިގެން އަލްފަބެޓްގެ ހިއްސާގެ އަގު ގާތްގަނޑަކަށް ހަ އިންސައްތަ ވަނީ އަރައިފައިވެއެވެ.

އަލްފަބެޓްއިން ވަނީ ކުންފުނީގެ މައިގަނޑު ވިޔަފާރި ކަމަށްވާ ސާޗް އިންޖިންގެ އާމްދަނީ 12 އިންސައްތަ އިތުރުވެފައިވާ ކަމަށާއި، ޔޫޓިއުބްގެ އިޝްތިހާރު ވިޔަފާރި ވެސް ހަމަ އެ މިންވަރަށް އިތުރުވެފައިވާ ކަމަށް ހާމަކޮށްފައެވެ.

މާލީ ޚިދުމަތްތައް ދޭ ކުންފުނި ހާގްރީވްސް ލޭންސްޑައުންގެ ސީނިއާ އިކުއިޓީ އެނަލިސްޓް މެޓް ބްރިޓްޒްމަން ބުނި ގޮތުގައި، އަލްފަބެޓަކީ މި އަހަރު އާމްދަނީ ހާމަކުރި ފުރަތަމަ، ބޮޑު ޓެކް ކުންފުންޏެވެ. އެ ކުންފުނިން ހާމަކުރި ނަތީޖާތަކުން މާޔޫސްވާންޖެހޭ ކަމެއް ނެތް ކަމަށާއި އަލްފަބެޓްގެ އާމްދަނީން ދައްކުވައިދެނީ ކްލައުޑް ޚިދުމަތް ފޯރުކޮށްދޭ ފަރާތްތަކަށް ފައިދާވާނެކަން ކަމަށް އޭނާ ބުންޏެވެ.

އަލްފަބެޓްގެ އައު ޗީފް ފައިނޭންޝަލް އޮފިސަރު އަނާޓް އަޝްކެނާޒީ ބުނެފައިވަނީ އަންނަ އަހަރު ކުންފުނީގެ ކެޕިޓަލް އެކްސްޕެންޑިޗާ މި އަހަރަށްވުރެ އިތުރުވާނެ ކަމަށެވެ. އަދި ތިންވަނަ ކުއާޓަރުގައި އަލްފަބެޓްގެ ކެޕިޓަލް އެކްސްޕެންޑިޗާ 62 އިންސައްތަ އިތުރުވެ 13 ބިލިއަން ޑޮލަރަށް އަރާފައިވާ ކަމަށާއި، ހަތަރުވަނަ ކުއާޓަރު ވެސް އެހާވަރަށް ޚަރަދު ވާނެ ކަމަށް އޭނާ ބުންޏެވެ.

އަލްފަބެޓް އިންކްއަކީ 2015 ވަނަ އަހަރު ގޫގުލް ރީސްޓްރަކްޗާ ކުރުމާ ގުޅިގެން އުފެއްދި ކުންފުންޏެކެވެ.

ކެލިފޯނިއާގެ މައުންޓަން ވިއުގައި މައި އޮފީސް ގާއިމުކޮށްފައިވާ މި ކުންފުނިން ސާޗް އިންޖިން، ކްލައުޑް ކޮމްޕިއުޓިން، ސޮފްޓްވެއާ އަދި ހާޑްވެއަވެއާ އުފެއްދުމުގެ އިތުރުން އޮންލައިން އިޝްތިހާރު ވިޔަފާރި ފަދަ ގިނަ ދާއިރާތަކެއްގައި ވިޔަފާރިކުރެއެވެ.