އިންޑިއާގެ ވެރިރަށް ދިއްލީގެ ވައި ފާއިތުވެދިޔަ ދެތިން ދުވަހުގެ ތެރޭގައި ވަރަށް ބޮޑަށް ނުސާފުވެފައިވާ ކަމަށް މޫސުމާބެހޭ ހިސާބުތަކުން ދައްކައިފިއެވެ.
މިދިޔަ ހަފުތާގައި ދިއްލީގެ ބައެއް ހިސާބުތަކުގައި ވައި ތަޣައްޔަރުވުމުގެ މިންވަރު ވަނީ ދުނިޔޭގެ ސިއްޚަތު ޖަމިއްޔާ (ޑަބްލިޔުއެޗްއޯ)އިން ލަފާދީފައިވާ ރައްކާތެރިކަމުގެ މިންވަރު ކަމަށްވާ، 25އާއި 30ގުނަ ފަހަނައަޅައި ގޮސްފައެވެ.
ތަޖުރިބާކާރުން ވިދާޅުވާ ގޮތުގައި މޫސުން ގޯސްވުމާއި، ކައިރި ސްޓޭޓްތަކުގައި ކުނި އެންދުމާއި އެނޫންވެސް ސަބަބުތަކާހުރެ ކުރިއަށް އޮތް ދުވަސްތަކުގައި ދިއްލީގެ ވައި ތަޢައްޔަރުވުން އިތުރުވާނެއެވެ.
ނޮވެމްބަރު އަދި ޑިސެމްބަރު މަހު އަވަށްޓެރި ސްޓޭޓް ޕަންޖާބާއި ހަރިޔާނާގެ ދަނޑުވެރިން، ދަނޑުތައް އަލުން ހެއްދުމަށް ކުރިން ހުރި ދަނޑުތައް އަންދައެވެ.
ދިއްލީ އާއި އިންޑިއާގެ އުތުރުގެ ބައެއް ސިޓީތަކުގައި ކޮންމެ އަހަރަކު އޮކްޓޯބަރު މަހާއި ޖެނުއަރީ މަހާއި ދެމެދު އިންތިހާއަށް ވައި ތަޣައްޔަރުވުމުގެ ސަބަބުން ވިޔަފާރިތަކަށް ބުރޫއަރާ، ސްކޫލްތަކާއި އޮފީސްތައް ބަންދުވާ ކަމަށް ރިޕޯޓް ކުރެއެވެ.
ދިއްލީގެ ކަމާބެހޭ ފަރާތްތަކުން ވަނީ ވީހާވެސް ގިނައިން ގޭތެރޭގައި ތިބުމަށް އިލްތިމާސްކޮށް، އެ ސިޓީގައި އިމާރާތްކުރުމުގެ މަސައްކަތްތައް ވަގުތީ ގޮތުން ހުއްޓާލުމަށް ވެސް މިހާރު ވަނީ އަންގާފައެވެ.