އިންގްލިޝް ޕްރިމިއާ ލީގުގެ މެންޗެސްޓާ ޔުނައިޓެޑްގެ ކޯޗު ކަމުން އެރިކް ޓެން ހާގް ވަކިކޮށްފިއެވެ.
ޔުނައިޓެޑުން ބުނީ އެ ޓީމުގެ ކޯޗުކަމުން ޓެން ހާގް ވަކިކޮށްފައިވަނީ މިސީޒަންގައި މިހާތަަނަށް މާއެދެވޭ ނަތީޖާއެއް ނުހޯދުމުން ކަމަށެވެ.
ޓެން ހާގްގެ ކޯޗުކަމުގެ ދަށުން ޔުނައިޓެޑް ކުޅުނު ފަހު މެޗަކަށް ވެފައިވަނީ ޕްރިމިއާ ލީގުގައި ރޭ ވެސްޓް ހޭމް ޔުނައިޓެޑާ ދެކޮޅަށް ރަށުން ބޭރުގައި ކުޅެ ދެ ލަނޑު އެއް ލަނޑުން ބަލިވި މެޗެވެ. މިއާއެކު ޔުނައިޓެޑް ލީގުގައި އުޅެނީ މިހާތަނަށް ކުޅުނު ނުވަ މެޗުގެ ތެރެއިން ތިން މެޗުން މޮޅުވެ، ތާވަލްގެ 14 ވަނައިގައެވެ. މީގެއިތުރުން ޔުއޭފާ ޔޫރޮޕާ ލީގުގައި މިހާތަނަށް ކުޅުނު ތިން މެޗުން އެއްވަރުވެ އުޅެނީ، 36 ޓީމު ހިމެނޭ ލީގުގެ 21 ވަނައިގައެވެ.
ޔުނައިޓެޑުން ބުނި ގޮތުގައި އެޓީމަށް ދާއިމީ ކޯޗެއް އައްޔަން ކުރެވެންދެން ވަގުތީ ގޮތުން ޓީމުގެ ކޯޗެއްގެ ގޮތުގައި ހަރަކާތްތެރިވާނީ މިސީޒަންގައި ޓެން ހާގްގެ އެސިސްޓަންޓެއްގެ ގޮތުގައި ޓީމާ ގުޅުނު އެޓީމުގެ ކުރީގެ ތަޖުރިބާކާރު ފޯވަޑް ރޫޑް ވެން ނިސްޓެރޯއީއެވެ.
ރިޕޯޓުތަކުގައިވާ ގޮތުން ޓެން ހާގް މަގާމުން ވަކިކުރަށް ބޯޑުން ނިންމިކަން އޭނާއަށް އަންގާފައިވަނީ މިއަދެވެ. މިދިޔަ ސީޒަންގެ އެފް އޭ ކަޕްގެ ފައިނަލްގައި މެންޗެސްޓާ ސިޓީ ބަލިކޮށް އެމުބާރާތުގެ ތަށި ޔުނައިޓެޑަށް ކާމިޔާބު ކޮށްދިނުމާއެކު އެ ކްލަބުންވަނީ އޭނާގެ ކޮންޓްރެކްޓްގެ މުއްދަތަށް އެއް އަހަރު އިތުރުކޮށްފައެވެ. ނަމަވެސް އެކަން ކުރިތާ ތިން މަސް ވީއިރު މިއީ ޕްރިމިއާ ލީގުގެ ތާރީޚުގައި ޔުނައިޓެޑަށް ދެވަނައަށް އެންމެ ދަށް ފެށުމެއް ފެށުނު ސީޒަނެވެ.
އެރިކް ޓެން ހާގްއަކީ ސާ އެލެކްސް ފާގަސަން އެޓީމުގެ ކޯޗުކަމުން 2013 ވަނަ އަހަރު ވަކިވުމަށްފަހު އެޓީމުގެ ކޯޗުކަން ކުރާ ދާއިމީ ފަސް ވަނަ ކޯޗެވެ. އަދި އެޓީމުން މިހާރު ހޯދަން މަސައްކަތް ފަށާފައިވަނީ ދާއިމީ ހަވަނަ ކޯޗެވެ.
އުމުރުން 54 އަހަރުގެ ޓެން ހާގް ޔުނައިޓެޑްގެ ކޯޗުކަމާ ހަވާލުވެފައިވަނީ 2022 ވަނަ އަހަރުގެ ޖޫން މަހުގެ ތެރޭގައެވެ. އޭނާ ހަވާލުވި ފުރަތަމަ ސީޒަންގައި ލީގުގެ ތިންވަނަ މަގާމް ހޯދައި ދިނެވެ. އަދި މިދިޔަ އަހަރުގެ ކަރަބާއޯ ކަޕްގެ ކާމިޔާބުކޮށް، އެސީޒަން ނިންމާލީ އެފް އޭ ކަޕްގެ ފައިނަލުން ވެސް މޮޅުވެގެންނެވެ.
މިދިޔަ އަހަރުގެ ޑިސެމްބަރު މަހު ސާ ޖިމް ރެޓްކްލިފްގެ އިނިއޯސްއިން ވަނީ ޔުނައިޓެޑްގެ 27.7 އިންސައްތަ ހިއްސާ ގަނެފައެވެ. އަދި ކްލަބްގެ ހިންގުމުގެ ބަޔާ ހަވާލުމަށްފަހު އޭނާ ވަނީ ޔުނައިޓެޑްގެ މައްސަލަ އުޅެނީ ކޯޗުގެ މަގާމަށް ވުރެ މަތީ މަގާމުތަކުގައިކަން ފާހަގަ ކުރެވިފައިވާކަމަށް ބުނެފައެވެ. އެއާއެކު މިހާތަނަށް ކްލަބްގެ ބޯޑުން ދިޔައީ ޓެން ހާގަށް ފުރިހަމައަށް އެއްބާރުލުންދީ އޭނާއަށް އިތުބާރު ކުރަމުންނެވެ. ނަމަވެސް އެޓީމު އެންމެ ފަހުން ކުޅުނު އަށް މެޗުގެ ތެރެއިން ހަތް މެޗުން ބަލިވުމުން ބޯޑަށް މިފިޔަވަޅު އަޅަން މަޖުބޫރުވީއެވެ.