ދިވެހިރާއްޖެއާއި ސައުދީ އަރަބިއްޔާއާ ދެ ޤައުމުގެ ދެމެދު ވިޔަފާރީގެ ދާއިރާއިން ގުޅުން ބަދަހިކުރުމާއި ރާއްޖޭގައި ސަޢޫދީ އިންވެސްޓްމަންޓްތައް އިތުރުކުރުމަށް ކުރެވިދާނޭ ކަންކަމާ ގުޅޭގޮތުން ފޮރިން މިނިސްޓަރު ޑރ. އަބްދުﷲ ޚަލީލާއި، ސައުދީގެ މިނިސްޓާ އޮފް ކޮމާސް ޑރ. މާޖިދު ބިން ޢަބްދުﷲ އަލް ޤަސާބީއާއެކު މަޝްވަރާ ކުރައްވައިފިއެވެ.
މި ބައްދަލު ކުރެއްވުން ބޭއްވީ މިނިސްޓަރު ޚަލީލް މިހާރު ސައުދީއަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
މި މަޝްވަރާގައި، ސައުދީ އަރަބިއްޔާއާއެކު އޮންނަ ގާތް ގުޅުން އިތުރަށް ވަރުގަދަކުރުމަށާއި މުހިންމު ދާއިރާތަކުން ގުޅިގެން މަސައްކަތްކުރުމަށް ދެ ވަޒީރުން އެއްބަސްވެވަޑައިގަތެވެ.
އިއްޔެ ކުރިއަށްދިޔަ މި މަޝްވަރާ ފެއްޓެވުމުގެ ކުރިން މިނިސްޓަރު ޚަލީލު ވަނީ ސައުދީ އަރަބިއްޔާގެ ޝާހީ އާއިލާއަށް ނިސްބަތްވެވަޑައިގަންނަވާ، އަލްއަމީރު މުޙައްމަދު ބިން ފަހުދު އަލް ސަޢޫދު އަވަހާރަވުމާގުޅިގެން ސައުދީ ޝާހީ އާއިލާގެ މެންބަރުންނަށް ތައުޒިޔާ ވިދާޅުވެފައެވެ.
މި ދަތުރުފުޅުގެ ތެރެއިން ޚަލީލް ވަނީ ސައުދީގެ ފޮރިން މިނިސްޓަރު ފައިސަލް ބިން ފަރްހާން އަލް ސައޫދާ ވެސް މިއަދު ބައްދަލު ކުރައްވައިފައެވެ.
މި ބައްދަލުކުރެއްވުމުގައި، އިސްލާމްދީނުގެ މަތިވެރި އަސާސްތަކުގެ މައްޗަށް ބިނާވެފައިވާ، ދެ ޤައުމުގެ ގާތް ގުޅުން އިތުރަށް ބަދަހިކުރުމަށާއި މި ގުޅުން ދަމަހައްޓައި އިތުރަށް ކުރިއެރުވުމަށް ގުޅިގެން މަސައްކަތްކުރުމުގެ މުހިއްމުކަމާ ބެހޭގޮތުން ދެ މިނިސްޓަރުން މަޝްވަރާ ކުރެއްވިއެވެ.
މީގެ އިތުރުން މިނިސްޓަރު ޚަލީލް ވަނީ ސައުދީ އަރަބިއްޔާއިން ރާއްޖެއަށް ދެމުންގެންދާ އަހައްމިއްޔަތުކަމާއި ރާއްޖެއަށް ފޯރުކޮށްދޭ އެހީތެރިކަމަށް ޝުކުރު އަދާކުރައްވައި، މި ދަތުރުފުޅަށްފަހު ދެ ޤައުމުގެ ގުޅުން އިތުރަށް ބަދަހިވެގެންދާނޭކަމަށް އުންމީދުކުރައްވާކަމަށް ވިދާޅުވެފައެވެ. އަދި ދެ ގައުމަށް ވެސް މުހިއްމު ކަންކަމުގައި ގުޅިގެން މަސައްކަތް ކުރުމަށާއި ބައިނަލްއަގުވާމީ މަސްރަހުގައި އެއްބާރުލުން އިތުރުކުރުމަށް ވެސް މަޝްވަރާކުރެއްވިއެވެ.
މިނިސްޓަރު ޚަލީލާއި ސައުދީގެ ފޮރިން މިނިސްޓަރު ފައިސަލް ބިން ފަރްހާން އަލް ސައޫދު --
މި ދަތުރުފުޅުގައި މިނިސްޓަރު ޚަލީލްގެ އަރިހުގައި ސެކްރެޓަރީ، ބައިލެޓަރަލް ޑރ. ހާލާ ހަމީދާއި ފޮރިން މިނިސްޓްރީގެ ޖޮއިންޓް ސެކްރެޓަރީ ޚަދީޖާ ނަޖީހާ ބައިވެރިވެވަޑައިގަންނަވައެވެ.
ރާއްޖެއަށް ސައުދީގެ އިންވެސްޓްމަންޓްތައް ގެނައުމަށްޓަކައި މަޝްވަރާ ކުރެއްވުމަށް, ހައުސިން މިނިސްޓަރު ޑރ. އަބްދުﷲ މުއްތަލިބު ވެސް މި ވަގުތު ހުންނެވީ އެ ގައުމުގައެވެ.