ޓެލްއަވީވު (28 އޮކްޓޯބަރު 2024): ހަމާސް ޖަމާއަތުގެ އަތްދަށުގައިވާ އިސްރާއީލުގެ އަސީރުން މިނިވަންކުރުމަށްޓަކައި ބާރުގެ ބޭނުން އިންތިހާއަށް ކުރި ނަމަވެސް އަސީރުން މިނިވަންކުރުމުގައި އެކަމުން ފައިދާ ނުކުރި ކަމަށާއި ބާރުގެ ބޭނުންކޮށްގެން ނުކުރެވޭނެ ކަންކަން ހުންނާނެކަން އިސްރާއީލުން މިހާރު ގަބޫލުކުރަންޖެހޭ ކަމަށް އެ ގައުމުގެ ހަރުކަށި މަސްއޫލުވެރިއެއް ކަމަށްވާ ދިފާއީ ވަޒީރު ޔޯވް ގަލަންޓް ބުނެފިއެވެ.
ޓެލްއަވީވުގައި އިއްޔެ ދިން ބަޔާނެއްގައި ގަލަންޓް ބުނީ، ކިތަންމެ ވަރަކަށް ބޮންއަޅައި ބާރުގެ ބޭނުންކުރި ނަމަވެސް އެއްބަސްވުމަކަށް ނުގޮސް ހަމާސްގެ އަތްދަށުގައިވާ އިސްރާއީލުގެ އަސީރުން (ރަހީނުން) މިނިވަންނުރެވޭނެކަން މިހާރު އޭނާއަށް ގަބޫލުކުރެވެއެވެ. ގަލަންޓް ބުނި ގޮތުގައި ހަމާސް ގެ އަތްދަށުގައިވާ އިސްރާއީލުގެ ރަހީނުން މިނިވަންކުރުމަށްޓަކައި ވޭންދެނިވި އަދި ހިތްދަތި ދޫތަކެއް ދިނުން ނޫންގޮތެއް އިސްރާއީލަށް މިހާރު އޮތްކަމަަކަށް ގަބޫލެއްނުކުރެއެވެ.
"ހަމައެކަނި އަސްކަރީ ބާރުން މަގުސަދު ހާސިލުވާނެ ކަމަކަށް މިހާރު ނުބެލެވޭ، ރަހީނުން އަނބުރައި ގައުމަށް ގެނައުމަށްޓަކައި އިސްރާއީލުން ހިތްދަތި އަދި ވޭންދެނިވި ދޫތަކެއް ދޭން އެބަޖެހޭ،" ގަލަންޓް ބުންޏެވެ.
ގަލަންޓް މިހެން ބުނިއިރު އިސްރާއީލު ގެންދަނީ އަސީރުން މިނިވަންކުރުމަށްޓަކައި ހަމާސްއާ އެކު ޑީލްއަކަށް ދިޔުމަށް ތަކުރާރުކޮށް ދެކޮޅު ހަދަމުންނެވެ.
އިސްރާއީލުން ރަހީނުކޮށް އަދި އަސީރުކޮށްފައިވާ ފަލަސްތީނުގެ އަސީރުން ވެސް މިނިވަންކުރާގޮތަށް ޑީލަކަށް ދިޔުމަށް ދެކޮޅު ހެދުމަށް ފަހު ތިމާމެންވަރުގެ ބާރުހުރި ބަޔަކު ނެތިގެން އިސްރާއީލު ގެންދަނީ ޣައްޒާގެ އާންމުންގެ ބޮލަށް ބޮންއަޅައި ފުޅާ ދާއިރާއެއްގައި ގަތުލުއާންމު ހިންގަމުންނެވެ.
މިހާ އަނިޔާވެރި ލާއިންސާނީ ޖަރީމާތައް ޣައްޒާގެ އާންމުންނާ ދެކޮޅަށް ހިންގަން އިސްރާއީލަށް ކެރެނީ އިސްރާއީލު ކިތަންމެ ބޮޑު ޖަރީމާތަކެއް ހިންގި ނަމަވެސް އެމެރިކާއާއި ޔޫރަޕުން އިސްރާއީލު ހިމާޔަތްކޮށްދޭނެތީއެވެ. އެއީ، ކަމަކަށް ނުހަދަައި އިސްރާއީލު ދިފާއުކޮށްދޭނެކަމުގެ ޔަގީންކަން އޮންނާތީއެވެ. މި ޔަގީންކަން އޮންނަނީ އެމެރިކާއާއި ޔޫރަޕްގައި ޔަހޫދީ ޒަޔަނިސްޓުންގެ ބާރާއި ނުފޫޒު އިންތިހާއަށް ބޮޑުކަމުން ކަމަށް މުހައްލިލުން ދެކެއެވެ.
އިސްރާއީލު ޝަހީދުކޮށްލާފައިވާ ފަލަސްތީނުގެ އާންމުން
ޣައްޒާގެ އާންމުންނާ ދެކޮޅަށް އިސްރާއީލު ހިންގާ މި ގަތުލުއާންމުތަކުގައި ޣައްޒާއިން 42،000 އަށްވުރެ ގިނަ އާންމުން މިހާތަނަށް ވަނީ ޝަހީދުކޮށްލާފައެވެ. މީގެ ތެރޭގައި ގިނައީ ކުޑަކުދިންނާ އަންހެނުންނާ މުސްކުޅިންނެވެ. ޣައްޒާގެ އާންމުންގެ ގެދޮރާއި ރެފިއުޖީ ފޭލިގެތަކާއި ސްކޫލުތަކާއި މިސްކިތްތަކާއި ހޮސްޕިޓަލްތަކާއި އިންޖީނުގެތަކާއި އެ ނޫން ވެސް މަދަނީ ހުރިހާތަނަކަށް ބޮންއަޅާ މުޅި ޣައްޒާވަނީ ސުންނާފަތިކޮށް، ބިމާހަމަކޮށްލައި އިސްރާއީލުގެ ގަދަފަދަކަން މުޅި ދުނިޔެއަށް ދައްކާލާފައެވެ. ނަމަވެސް، އަސީރުން މިނިވަންކުރުމުގައި އިސްރާއީލުގެ ނިކަމެތިކަން ވެސް ވަނީ ފެނިގެން ގޮސްފައެވެ.
މީގެ އިތުރުން، އިސްރާއީލުން ވަނީ ކާބޯތަކެއްޗާއި ފެނާއި ބޭހާއި ސިއްހީ ސާމާނުން ވެސް ޣައްޒާގެ އާންމުން މަހުރޫމްކޮށް ޣައްޒާގެ އާންމުން ބަނޑަށް ޖައްސައި ހައިހޫނުކަން މަތީގައި ބައިތިއްބާފައެވެ.
އިސްރާއީލުން ޣައްޒާގައި ހިންގި މި ލާއިންސާނީ ޖަރީމާތަކަކީ ދެވަނަ ބޮޑުހަނގުރާމައިގެ ދުވަސްވަރު ހިޓްލަރުގެ ސިފައިން ހިންގިވަރުގެ އަނިޔާވެރި ގަތުލުއާންމުތަކެއް ކަމަށް ޔަހޫދީންގެ ދަލުގައި ނުޖެހޭ މުސްތަގިއްލު މުހައްލިލުން ދެކެއެވެ. މީގެ ތެރޭގައި ޒަޔަނިސްޓުންގެ ދަލުގައި ނުޖެހޭ ހުޅަނގުގެ މުހައްލިލުންނާއި ޔަހޫދީ މުހައްލިލުން ވެސް ހިމެނެއެެވެ.
އިސްރާއީލުން ވަނީ އެއްވެސް ހައްގަކާނުލައި ޣައްޒާގެ ހޮސްޕިޓަލްތަކުން 800 އަށް ވުރެގިނަ ޑޮކްޓަރުންނާއި ނަރުހުން ޝަހީދުކޮށްލާފައެވެ. ލެބޯޓްރީތަކާއި އޮޕަރޭޝަން ތިއޭޓަރުތަކާއި ބޭސްގުދަންތައްވަނީ އަންދާލާފައެވެ. ހައިހޫނުކަމުގައި ކާބޯއެއްޗެއް ހޯދުމަށް ކިޔޫގައި އާންމުން ތިއްބައި އެ މީހުންގެ ބޮލަށް ވެސް ބޮންއަޅައި އިސްރާއީލުންވަނީ އެތައް ނިކަމެތި އަދި ހައިހޫނުކަމުގައި ތިބި އެތައް ހާސް ބަޔަކު ޝަހީދުކޮށްލާފައެވެ. ޢާއިލާތައް ހުރިގޮތަށް ވުޖޫދުން ފުލެލާފައެވެ.
އިސްރާއީލުގެ މި ޖަރީމާތަކަކީ އެމެރިކާއާއި ޔޫރަޕްގެ ތާއީދާއި އެ މީހުންގެ އެހީތެރިކަމާ އެކު ހިންގާ ހިޓްލަރު ވެސް ލަދުގަންނަ ފަދަ ބާބޭރިޔަން ޖަރީމާތަކެއްކަން ދުނިޔެއަށް ހާމަވެފައިވީ ނަމަވެސް އެމެރިކާއި ޔޫރަޕްގެ ބާރުތަކުން އަދިވެސް ގެންދަނީ އިސްރާއީލު ދިފާއުކުރަމުންނެވެ. އިސްރާއީލުގެ މި ލާއިންސާނީ ޖަރީމާތައް ސްޕޮންސާކޮށް އެ ކަމަށް ވާގިވެރިވަމުންނެވެ.