ލާޒިގިއްޔާ (18 ޑިސެންބަރު 2024: ހަނގުރާމަވެރި ޖަމާއަތްތަކާއި ހަތިޔާރުއެޅި ޖަމާއަތްތަކަށް ސޫރިޔާގައި މިހާރު ޖާގަނެތްކަމަށާއި ބައްޝާރުގެ ވެރިކަން ވައްޓާލަން މަސައްކަތްކުރި ހުރިހާ ޖަމާއަތްތަކެއް ރޫޅާލާނެކަމަށް އެގައުމުގައި މިހާރު ވެރިކަންކުރާ "ހައިއަތު ތަހްރީރް އައްޝާމް" ކުރީގެ ޖަބްހަތުއްނުސްރާ އިން ބުނެފިއެވެ.
ސޫރިޔާގެ ހުޅަނގުގެ އައްލާޒިގިއްޔާ ޕްރޮވިންސްގައި ވާހަކަ ދައްކަވަމުން އެޖަމާއަތުގެ އަސްކަރީ ކޮމާންޑަރު އަދި ސޫރިޔާގެ މިހާރުގެ ސަރުކާރުގެ ބާރުގަދަ ބޭފުޅެއް ކަމަށްވާ އަބޫހަސަން އަލްހަމަވީ ވިދާޅުވިގޮތުގައި ޚުދު "ހައިއަތު ތަހްރީރް އައްޝާމް" ކުރީގެ ޖަބްހަތުއްނުސްރާ ޖަމާއަތުގެ އަސްކަރީ ގޮފިވެސް އުވާލާނެއެވެ. އެޖަމާތް ދެމި އޮތަސް ބަދަލުވާނީ މަދަނީ ޖަމްއިއްޔާއަކަށެވެ. ނޫނީ ސިޔާސީ ޕާޓީއަކަށެވެ.
އަބޫހަސަން އަލްހަމަވީ ވިދާޅުވިގޮތުގައި ބައްޝާރުގެ ވެރިކަން ވައްޓާލުމުގެ ކަންތައް މިހާރު ވަނީ ނިމިފައެވެ. މިއާއެކު އެކަމަށް މަސައްކަތްކުރި ޖަމާއަތްތަކުގެ ދައުރުވެސް މިހާރުވަނީ ނިމިފައެވެ. ދެން ސޫރިޔާގައި އޮންނާނީ ސަރުކާރާ ޕާލަމެންޓާއި ގާނޫނީ ގޮތުން އުފައްދާ މުއައްސަސާތައް އެކަންޏެވެ. އެއީ ސޫރިޔާގެ ދައުލަތެވެ.
ދައުލަތުގައި ހަނގުރާމަ ވެރި ޖަމާއަތްތަކާއި ހަތިޔާރު އެޅި ޖަމާއަތްތައް ނުހިމެނޭނެކަމަށާއި އެޖަމާއަތްތައް ރޫޅާލައި އެޖަމާއަތްތަކުގައި ހިމެނޭ ސޫރިޔާގެ ރައްޔިތުން ބޭނުންނަމަ ސިފައިންނާއި ފުލުހުންފަދަ ދައުލަތުގެ އަމަނާބެހޭ މުއައްސަސާތަކަށް ވަދެވޭނެކަމަށް އޭނާ ވިދާޅުވިއެވެ. އަދި އެޖަމާއަތްތަކުގައި އުޅުނު ބޭރުގައުމުތަކުގެ މީހުން ޖެހޭނީ އެމީހުންގެ ގައުމުތަކަށް އެނބުރި ދާންކަމަށާއި އެކަމަށް މުއްދަތެއް ދޭނެކަމަށް އަބޫހަސަން އަލްހަމަވީ ވިދާޅުވިއެވެ.
ޖަބްހަތުއްނުސްރާ ނުވަތަ ހައިއަތު ތަހްރީރް އައްޝާމް ޖަމާއަތުގެ އިސްވެރިޔާ، އަބޫމުހައްމަދުލް ޖޫލާނީ އޭނާގެ އަސްލު ނަމަކީ އަހްމަދުއްޝަރުޢު، އޭނާއަކީ މިހާރު ސޫރިޔާގެ އައު ޒަޢީމް
ބައްޝާރުގެ ވެރިކަން ވައްޓާލުމަށް ސޫރިޔާގެ ރައްޔިތުން ކުރި ހަނގުރާމައިގައި ބައިވެރިވެ އެހީތެރިވެދިން ބޭރު ގައުމުތަކުގެ މީހުންނަށް ޝުކުރުވެރިވާކަމަށްވެސް އަބޫހަސަން އަލްހަމަވީ ވިދާޅުވިއެވެ.
އެމީހުން އެމީހުންގެ ގައުމުތަކަށް ފޮނުވާލުމުގެ ކުރިން ވަގުތީގޮތުން ކުރުމުއްދަތަކަށް ސޫރިޔާގައި ތިބުމުގެ ފުރުސަތު ދޭނެކަމަށް އެމީހުންނާމެދު މުއާމަލާތްކުރާނީ ވަގުތީ މެހުމާނުންގެ ގޮތުގައި ކަމަށްވެސް ކުރީގެ ޖަބްހަތުއްނުސްރާ އަދި މިހާރު ސޫރިޔާގައި ވެރިކަންކުރާ "ހައިއަތު ތަހްރީރް އައްޝާމް" ޖަމާއަތުގެ އަސްކަރީ ކޮމާންޑަރު ވިދާޅުވިއެވެ.
އަބޫހަސަން އަލްހަމަވީގެ އަސްލު ނަމަކީ މުރްހަފު އަބޫގަސްރާ އެވެ. އަބޫހަސަން އަލްހަމަވީގެ ލަގަބުން އޭނާ މަޝްހޫރުވެފައިވަނީ ހަނގުރާމަވެރިއެއްގެ ގޮތުގައި ބައްޝާރުގެ ސަރުކާރު ވައްޓާލުމަށް ސަލަފީ ތަކްފީރީ ޖަމާއަތްތައް އެއްކޮށްގެން އޭނާ އުޅުނުއިރުއެވެ. "ހައިއަތު ތަހްރީރް އައްޝާމް" ޖަމާއަތަކީވެސް މިގޮތުން ސަލަފީ ތަކްފީރީ ޓެރަރިސްޓް ޖަމާއަތެއްގެ ގޮތުގައި މިހާރުވެސް ދުނިޔޭގެ ގައުމުތަކާއި އދ.ގެ މުއައްސަސާތަކުގައި ލިސްޓް ކޮށްފައިވާ ޖަމާއަތެކެވެ.
ބައްޝާރުގެ ވެރިކަން ވައްޓާލުމަށްޓަކައި ސޫރިޔާގައި ކުރި ދާޚިލީ ހަނގުރާމައިގައި ބައިވެރިވި ސަލަފީ ތަކްފީރީ ހަނގުރާމަވެރި ޖަމާއަތްތަކުގެ ގިނަ ބަޔަކަށް އެކި ނަންނަމުން ލަގަބުދީފައިވެއެވެ.
މިގޮތުން މިހާރު ސޫރިޔާގެ ލީޑަރު އަދި "ހައިއަތު ތަހްރީރް އައްޝާމް"ގެ އިސްވެރިޔާ އަހްމަދުއްޝަރްޢުއަށް ދީފައިވަނީ އަބޫމުހައްމަދުލް ޖޫލާނީގެ ލަގަބެވެ. ނަމަވެސް އޭނާ މިހާރުވަނީ އެލަގަބު ދޫކޮށްލައި އަހްމަދުއްޝަރްޢުގެ ނަން ބޭނުންކުރުމަށް ސޫރިޔާގެ ކަމާބެހޭ ފަރާތްތަކަށް އަންގާފައެވެ. ސޫރިޔާގެ ޚަބަރު ފަތުރާ ވަސީލަތްތަކުންވެސް މިހާރު އޭނާއަށް ކިޔަނީ އަހްމަދުއްޝަރްޢުގެ ނަމުންނެވެ.
އަބޫހަސަން އަލްހަމަވީ ވިދާޅުވިގޮތުގައި "ހައިއަތު ތަހްރީރް އައްޝާމް" ޖަމާއަތްވެސް އުވާލާނެއެވެ. އެޖަމާއަތުގެ އަސްކަރީ ގޮފިވެސް ރޫޅާލާނެއެވެ.
ސޫރިޔާގެ މިހާރުގެ ޒައީމް އަހްމަދުއްޝަރުއު، އިއްޔެ އިނގިރޭސިވިލާތުގެ މަސްއޫލުވެރިއަކާ ބައްދަލުކުރައްވަނީ، އިނގިރޭސިވިލާތުގައި ޝަރުއުގެ ނަން އަދިވެސް އޮންނަނީ ޓެރަރިސްޓުންގެ ލިސްޓުގައި
ސޫރިޔާގެ މިހާރުގެ ލީޑަރު އަހްމަދުއްޝަރްޢު ވެސް ވަނީ ހަނގުރާމަވެރި ޖަމާއަތްތަކާއި ހަތިޔާރުއެޅި ޖަމާއަތްތަކަށް ސޫރިޔާގައި މިހާރު ޖާގަނެތްކަމަށް ވިދާޅުވެ ބައްޝާރުގެ ވެރިކަން ވައްޓާލަން މަސައްކަތްކުރި ހުރިހާ ޖަމާއަތްތައް ރޫޅާލާނެކަމަށާއި ސޫރިޔާގައި ހަތިޔާރު އެޅި ބަޔަކަށް ދެން ތިބޭނީ އެގައުމުގެ ސަލާމަތީ ބާރުތައްކަމަށްވާ ސިފައިންނާއި ފުލުހުންކަމަށް ވިދާޅުވެފައެވެ.
އަހްމަދުއްޝަރްޢު ވިދާޅުވިގޮތުގައި ސޫރިޔާގެ ސިފައިންނާއި ފުލުހުންގެ ތެރެއަށް ވަންނަންބޭނުންވާ ސޫރިޔާގެ ހުރިހާ ދީންތަކާއި މަޒުހަބުތަކާއި ފިކުރުތަކާ އަދި ނަސްލުތަކުގެ މީހުންނަށް އެފުރުސަތު އޮންނާނެއެވެ. ސޫރިޔާގެ އެއްވެސް ރައްޔިތެއްގެ ދީނާއި މަޒުހަބާއި ފިކުރާއި ނަސްލުގެ ސަބަބުން އެމީހަކު ބާކީ ނުކުރާނެއެވެ.
ޝަރުއު ވިދާޅުވި ގޮތުގައި މައްސަލަ ބަލައި ޝަރީއަތަށް ހުށަހަޅައިގެން އަދަބު ދޭނީ ބައްޝާރުގެ ވެރިކަމުގައި ރައްޔިތުންނާ ދެކޮޅަށް ބޮޑެތި ޖަރީމާތައް ހިންގާފައިވާ އަދި ޖަލުގައި މީހުން މެރުން ފަދަ ޖަރީމާތައް ހިންގާފައިވާ ފަރާތްތަކަށް އެކަންޏެވެ. ބައްޝާރުގެ ވެރިކަމުގެ ނިޒާމުގައި ބައިވެރިވި ސޫރިޔާގެ ރައްޔިތުން ބާކީ ނުކުރާނެކަމަށާއި އެމީހުންނަށް ސަރުކާރުގެ ވަޒީފާތަކަށް ވަނުމުގެ ފުރުސަތު އޮންނާނެ ކަން އޭނާވަނީ ހާމަކުރައްވާފައެވެ. ސޫރިޔާގައި މިހާރުވަނީ ޝަރުއުގެ ބެލުމުގެ ދަށުން ވަގުތީ ބޮޑުވަޒީރެއް އައްޔަންކޮށްފައެވެ. ނަމަވެސް ސޫރިޔާގެ ދައުލަތުގެ ގިނަ މުއައްސަސާތަކުގައި މިހާރު ވެސް ތިބީ ބައްޝާރުގެ ވެރިކަމުގެ ދުވަސްވަރުގައި ވެސް ތިބި މީހުންނެވެ.
ޝަރުއު ވިދާޅުވިގޮތުގައި ސޫރިޔާގެ ސިވިލް ސާވިސް އާއި ސިފައިންނާއި ފުލުހުންގެ ތެރޭގައި ތިބި ބަޔަކަށް އެގޮތުގައި ދެމިތިބެވޭނެއެވެ. ޝަރުއު ވިދާޅުވިގޮތުގައި ދާޚިލީ ހަނގުރާމައާއި ވެރިކަން ވައްޓާލުމަށް މަސައްކަތްކުރުމުގެ އިންގިލާބީ މަރުހަލާ މިހާރު ނިމުނީއެވެ. ދެން އޮތީ ދައުލަތް ބިނާކުރުމުގެ މަރުހަލާއެވެ. މި މަރުހަލާގައި ހަނގުރާމަވެރި ޖަމާއަތްތަކާއި ހަނގުރާމަ ވެރިންނަށް ފުރުސަތެއް ނޯންނާނެއެވެ.
މިޖަމާއަތްތަކުގައި ތިބި ސޫރިޔާ ރައްޔިތުން ޖެހޭނީ ދައުލަތުގެ ނިޒާމުގެ ތެރެއަށް ވަންނާށެވެ. އެކްޓިވިޒަމް އާއި ދައުލަތުގެ ނިޒާމަކީ މުޅިން ތަފާތު ދެ އެއްޗެއްކަމަށް އޭނާ ވިދާޅުވިއެވެ.
އަހްމަދުއްޝަރުއު ވިދާޅުވިގޮތުގައި ސޫރިޔާގެ ރައްޔިތުންނަކީ އެކި ދީންތަކާއި މަޒުހަބުތަކާއި އެކި ނަސްލުތަކަށް ނިސްބަތްވާ ބައެކެވެ. މިއިން އެއްވެސް ދީނަކަށް ނަސްލަކަށް ނުވަތަ މަޒުހަބަކަށް ނިސްބަތްވާ ބަޔަކު ބާކީ ކޮށްފިނަމަ އަނެއްކާވެސް ގައުމުގައި އިންސާފު ގާއިމް ނުކުރެވި ގައުމު ހަމަނުޖެހުމެއްގެ ތެރެއަށްދާނެއެވެ.
ޝަރުއު ވަނީ ފަލަސްތީނުގެ މިނިވަންކަމަށް ޖިހާދު ކުރާ ހަމާސް އާއި އިސްލާމިކް ޖިހާދު ފަދަ ޖަމާއަތްތަކަށްވެސް ސޫރިޔާގައި ތިބެގެން ހަތިޔާރުގެ ޖިހާދު ދެން އިސްރާއީލާ ދެކޮޅަށް ނުކުރެވޭނެ ކަމަށް ވިދާޅުވެފައެވެ. އޭނާ ވިދާޅުވިގޮތުގައި ހަމާސް ޖަމާއަތާ އަދި އެޖަމާއަތުގެ އިތުރުން ބައްޝާރުގެ ސަރުކާރާ ގުޅިގެން އުޅުނު ފަލަސްތީނުގެ މިނިވަންކަމަށް މަސައްކަތްކުރާ ޖަމާއަތްތަކަށްވެސް މަދަނީ ގޮތުގައި ސޫރިޔާގައި ތިބެވޭނެ އެވެ. ނަމަވެސް އަސްކަރީ ހަރަކާތްތަކަށް ޖާގައެއް ނޯންނާނެއެވެ.
ބައްޝާރުގެ ސަރުކާރާ ގުޅިގެން އުޅުނު ފަލަސްތީނުގެ ޖަމާއަތްތަކުގެ ތެރޭގައި އިސްލާމިކް ޖިހާދު ޖަމާއަތާއި ޖަބްހާ އައްޝަޢަބިއްޔާ ފަދަ ޖަމާއަތްތައް ހިމެނެއެވެ. ފަލަސްތީނުގެ އެއްވެސް ޖަމާއަތަކަށް ސޫރިޔާގައި ތިބެގެން އިސްރާއީލާ ދެކޮޅަށް ހަތިޔާރުގެ ޖިހާދު ނުކުރެވޭނެ ކަމަށާ ކުރެވޭނީ ދުލާއި ގަލަމުގެ ޖިހާދާއި އަދި މީޑިއާ މެދުވެރިކޮށް ކުރާ ޖިހާދުގެ ކަންކަމަށް ޝަރުއު ވިދާޅުވިއެވެ.
ސޫރިޔާ މެދުވެރިކޮށް އީރާނުން ހިޒްބުﷲ އަށް ފޯރުކޮށްދޭ ހަތިޔާރުގެ ސަޕްލައިވެސް ބައްޝާރުގެ ވެރިކަން ވެއްޓުމަށްފަހުވަނީ މުޅިން ހުއްޓުމަކަށް އައިސްފައެވެ. މިއާއެކު ހިޒްބުﷲ ގެ މިސްރާބު ހުރީ އަމިއްލައަށް ހަތިޔާރު އުފެއްދުމާ ދިމާއަށްކަމަށް ޚަބަރު ލިބެއެވެ. ކުރިންވެސް ހިޒްބުﷲ އަކީ އަމިއްލައަށްވެސް ބައެއް ބާވަތުގެ ހަތިޔާރު ޒަމާނީ ފެންވަރަށް އުފައްދާ ޖަމާއަތެެކެވެ.