މިދިޔަ ސަރުކާރުގައި އިންޑިއާގެ އިންދިރާ ޕްރޮޖެކްޓްސްއާ ހަވާލުކުރި ރާއްޖޭގައި 61 ޕޮލިސް ސްޓޭޝަން އެޅުމުގެ މަސައްކަތް ކުރިއަށްނުދާ ކަމަށާއި އެ ކުންފުނިން މާލޭގައި ކުރާ ހަމައެކަނި ކަމަކީ މޫނިމާގެ ކިޔައި ގެއެއް ހެދުން ކަމަށް ހޯމްލޭންޑް މިނިސްޓަރު އަލީ އިހުސާން މިއަދު ތުހުމަތު ކުރައްވައިފިއެވެ.
މިދިޔަ ސަރުކާރުގައި އިއުލާނުކުރި 61 ޕޮލިސް ސްޓޭޝަންގެ މަޝްރޫއަކީ އިންޑިއާގެ އެގްޒިމް ބޭންކުން ފައިނޭންސް ކުރާ ގޮތަށް ރޭވި މަޝްރޫއެކެވެ. އެކަމަކު، އެ ކުންފުނިން އެ ފައިސާ ވެސް ނަގާފައި އެ މަސައްކަތްނުކުރާ ކަމަށް އިހުސާން ތުހުމަތުކުރެއްވިއެވެ. އެ ކުންފުނިން ކުރާ ހަމައެކަނި ކަމަކީ 'ބިގް' ނަމަކަށް ކިޔާ ކުންފުންޏެއްގެ ހިއްސާ ގަނެގެން މޫނިމާގެ ކިޔާ ގެއެއް ހެދުން ކަމަށް މިނިސްޓަރު ތުހުމަތުކުރެއްވިއެވެ.
'ބިގް' ކުންފުންޏަކީ އެމްޑީޕީގެ ޗެއާޕާސަން ފައްޔާޒް އިސްމާއިލްގެ އާއިލީ ކުންފުންޏެކެވެ. އެ ކުންފުނިން ކުރިން ވެސް ބޭންކް އޮފް މޯލްޑިވްސް އިން ލޯނެއް ނަގައިގެން މޫނިމާގޭގެ ބައެއް ހެދުމުގެ މަސައްކަތްކުރިއެވެ.
އޭރު ގެ ހަދަންވެގެން ބިގް ކުންފުނިން ނެގި 30 މިލިއަން ރުފިޔާގެ ލޯނެއް ނުދެއްކިގެން އެ ގެ ވިއްކާލަން ވެސް ބީއެމްއެލަށް ސިވިލް ކޯޓުން ހުއްދަ ދިނެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ވަޑައިގެން ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހް ކުރެއްވި ސުވާލަކަށް ޖަވާބުދެއްވަމުން މިނިސްޓަރު އިހުސާން ވިދާޅުވީ، ޕޮލިސް ސްޓޭޝަންތަކުގެ މަސައްކަތަކީ ގާތްގަނޑަކަށް 60 މިލިއަން ޑޮލަރުގެ މަޝްރޫއެއް ކަމަށެވެ. އެ މަސައްކަތް އޭރުގެ އިކޮނަމިކް މިނިސްޓްރީގެ ތެރޭގައި ދެ އަހަރެއްހައި ދުވަހު އޮވެފައި ފުލުހުންނާ ހަމައަށް މަޝްރޫއު ގެންދިޔައީ 2021 ވަނަ އަހަރު ކަމަށް އޭނާ ވިދާޅުވިއެވެ.
"އެހެންނަމަވެސް، މި މަސައްކަތުގެ އަމަލީ އެއްވެސް މަސައްކަތެއް ހިނގާފައެއް ނެތް،" އޭނާ ވިދާޅުވިއެވެ.
"އިންދިރާ ޕްރޮޖެކްޓްސްއިން އެންމެ ފުރަތަމަ ކޮށްފައި އޮތް ކަމަކީ ދިވެހި ސަރުކާރުގައި މި އެދެނީ އެއްކަލަ ލޯނުގެ 15 ޕަސެންޓު އެންމެ ފުރަތަމަ ދިވެހި ސަރުކާރުން ތިމަންނަމެންނަށް ދޭށޭ. އެ ހިސާބުން ލިޔެކިޔުންތަކުން ފެންނަން އޮތް ގޮތުގައި އެ ކުންފުންޏަށް އޭރުގެ ސަރުކާރުންވޭ 3.6 މިލިއަން ޑޮލަރު ދީފައި،"
އެ 3.6 މިލިއަން ޑޮލަރު އިންދިރާ ޕްރޮޖެކްޓްސްއަށް ދިނުމުން ވީނުވީއެއް ނޭނގޭ ކަމަށް މިނިސްޓަރު އިހުސާން މީގެ ކުރިން ވެސް ވިދާޅުވެފައިވެއެވެ.
އޭނާ ވިދާޅުވި ގޮތުގައި އެ މަސައްކަތްކުރަން 3.6 މިލިއަން ޑޮލަރު އެ ކުންފުންޏަށް ދިން ނަމަވެސް އެއަށް ކުރި އެއްވެސް ކަމެއް އިންދިރާ ޕްރޮޖެކްޓްސްއިން ނުބުނެދެއެވެ. އެކަމަކު، އެ ފައިސާ ކުންފުނީގައި ހުރި ކަމަށް މީގެ ކުރިން އިންދިރާ ޕްރޮޖެކްޓްސްއިން ބުނި ކަމަށް އޭނާ ވިދާޅުވިއެވެ.
ހޯމް މިނިސްޓަރު އަލީ އިހުސާން: އޭނާ ވަނީ އިންދިރާ ޕްރޮޖެކްޓްސްއިން ބިގް ކުންފުންޏާ ގުޅިގެން ގެއެއް ހަދައި ނިންމާ ކަމަށް ވިދާޅުވެފައި -- ސަން ފޮޓޯ/ އިބްރާހިމް ނާއިޝް
އިހުސާން ތުހުމަތުކުރެއްވި ގޮތުގައި އިންދިރާ ޕްރޮޖެކްޓްސްއިން ކުރަނީ އެންމެ މަސައްކަތެކެވެ. އެއީ، ބިގް ކުންފުނީގެ ހިއްސާ ގަނެގެން މޫނިމާގެ ހެދުމުގެ މަސައްކަތެވެ.
"ބިގް ނަމަކަށް ކިޔާ ކުންފުނީގެ ޝެއާ އެ ކުންފުނިން ގަނެގެން، މިހާރު މޫނިމާގެ ކިޔާ ގެއެއްގެ އިމާރާތް ވަރަށް ބާރަށް ގޮސް ނިމެމުންދާކަން އަޅުގަނޑުމެންނަށް މައުލޫމާތު ލިބިފައިވޭ،"
އިހުސާން މަޖިލީހުގައި އެ ފަދައިން ތުހުމަތުކުރެއްވި ނަމަވެސް ފައްޔާޒްގެ ނަމެއް ވިދާޅެއް ނުވެއެވެ. އެކަމަކު، ބިގް ކުންފުންޏަކީ ފައްޔާޒްގެ އާއިލީ ކުންފުންޏެވެ. އެ ކުންފުނީގައި ތިއްބަވަނީ ފައްޔާޒްގެ ބޭބޭފުޅު ހ. ބޯގަންވިލާ ހަސަން އިސްމާއިލާއި ރައީސް އޮފީހުގެ ކުރީގެ ފޮޓޯގްރާފަރު މއ. ފަށުއި، މުހައްމަދު މުންޝިދެވެ.
އިހުސާންގެ އެ ތުހުމަތުތަކާ ގުޅޭގޮތުން ބިގް ކުންފުނީގެ ބަހެއް ހޯދާލުމަށް ގުޅާލުމުން ބިގް ކުންފުނީގެ ވެރިޔާ ހަސަން އިސްމާއިލް ވަނީ އެ ތުހުމަތުތައް ދޮގު ކުރައްވައިފައެވެ.
ފާހަގަކޮށްލެވޭ ގޮތުގައި މީގެ ކުރިން އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި މި މައްސަލައާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބުދެއްވަމުން ފައްޔާޒް ވަނީ އެ ތުހުމަތުތަކަށް އިންކާރުކުރައްވާފައެވެ.