އެމެރިކާގެ ރިޔާސީ އިންތިޚާބަށް ގާތްގަޑަކަށް ދެ ހަފްތާއަށް ވެފައިވާއިރު، އިންތިޚާބު ކާމިޔާބު ކުރައްވާނެ ބޭފުޅަކު ބެލުމަށް ގިނަ ޕޯލްތަކެއް ނަގާފައިވެއެވެ.
ފޯބްސްއިން ރިޕޯޓުކޮށްފައިވާ ގޮތުގައި އެންމެ ފަހުން ނެގި ދެ ޕޯލްގައި ކުރީގައި އުޅުއްވަނީ ވެރިކަންކުރާ ޑިމެކޮރެޓިކް ޕާޓީން ރިޔާސީ އިންޓީޚާބުގައި ވާދަކުރައްވާ، ނާއިބު ރައީސް ކަމަލާ ހެރިސްއެވެ.
އެ ދެ ޕޯލުން ހެރިސް ކުރި ހޯއްދެވި ނަމަވެސް ގިނަ ސާވޭތަކުން ދައްކާ ގޮތުގައި ހެރިސްއާއި އިދިކޮޅު ރިޕަބްލިކަން ޕާޓީން ވާދަކުރައްވާ ކެންޑިޑޭޓް އަދި ކުރީގެ ރައީސް ޑޮނާލްޑް ޓްރަމްޕްގެ ވާދަވެރިކަން ބޮޑެވެ.
ހެރިސް ކުރި ހޯއްދަވާފައި ވަނީ އިއްޔެ އާންމުކޮށްފައިވާ އޭބީސީ/އިޕްސޯސްއިން ނަގާފައިވާ ޕޯލެއްގައެވެ. އިންތިޚާބު ކާމިޔާބު ކުރައްވާނީ ޓްރަމްޕް ކަމަށް 47 އިންސައްތަ މީހުން ބުނެފައިވާއިރު، 51 އިންސައްތަ މީހުން ބުނެފައި ވަނީ ހެރިސް އިންތިޚާބު ކާމިޔާބު ކުރައްވާނެ ކަމަށެވެ. މިއީ މި މަހުގެ ކުރީކޮޅު ނެގި ޕޯލާއި އަޅާބަލާއިރު، ހެރިސް އަށް ލިބުނު ކުރިއެރުމެކެވެ. އޭރު ނެގި ޕޯލުން ހެރިސް ލިބިފައި ވަނީ 50 އިންސައްތައެވެ.
ހެރިސް ކުރި ހޯއްދެވި އަނެއް ޕޯލަކީ ސީބީއެސް/ޔޫގަވް އިން އިއްޔެ އާންމުކުރި ޕޯލެކެވެ. އެ ޕޯލުން ދައްކާ ގޮތުގައި ހެރިސް އިންތިޚާބު ކާމިޔާބު ކުރައްވާނެ ކަމަށް 50 އިންސައްތަ މީހުން ބުނެފައިވެއެވެ. ޓްރަމްޕް އިންތިޚާބު ކާމިޔާބު ކުރައްވާނެ ކަމަށް ބުނެފައި ވަނީ 49 އިންސައްތަ މީހުންނެވެ.
މި މަހުގެ 23 ން 24 އަށް ނަގާފައިވާ ޕޯލަކުން ދައްކާފައިވާ ގޮތުގައި ދެ ކެންޑިޑޭޓުން އެއްވަރުވެފައި ވަނީ 49 އިންސައްތަ ވޯޓުންނެވެ.
ހުކުރު ދުވަހު ނެރުނު ޓައިމްސް/ސިއެނާ ޕޯލްގައިވެސް ޓްރަމްޕާއި ހެރިސް 48 އިންސައްތަ ވޯޓުން އެއްވަރުވެފައިވާއިރު، މިއީ ހެރިސްއަށް ނާކާމިޔާބު ލިބިދާނެ ކަމުގެ ނިޝާނެއް ކަމަށް ދަ ޓައިމްސް އިން ރިޕޯޓުކޮށްފައިވެއެވެ.
އޭގެކުރިން މި މަހުގެ ކުރީކޮޅު ޓައިމްސްއިން ނެގި ޕޯލުން ޓްރަމްޕަށް ވުރެ ކުރީގައި އުޅުއްވީ ހެރިސްއެވެ. ފާއިތުވެދިޔަ ހަފްތާތަކުގައި ނެގި ތިން ޕޯލަކުން ޓްރަމްޕް ކުރި ހޯއްދަވާފައިވާއިރު، ހަ ޕޯލަކުން ހެރިސް ހަނިގޮތަކަށް ކުރި ހޯއްދަވާފައިވާ ކަމަށް ފޯބްސްއިން ބުނެއެވެ.
ހުކުރު ދުވަހު އާންމުކުރި ސީއެންއެން/އެސްއެސްއާރުއެސް ޕޯލްގައިވެސް ދެ ބޭފުޅުން އެއްވަރުވެފައިވާއިރު، ސީއެންއެން އިން ސެޕްޓެމްބަރު މަހު ނެގި ޕޯލުން ކުރީގައި އުޅުއްވީ ހެރިސްއެވެ.
ހަމައެކަނި ޑިމޮކްރެޓިކް އާއި ރިޕަބްލިކް ޕާޓީއަށް ވޯޓު ލިބޭނެ ކަމަށް ބަލާފައިވާ 'ސްވިންގް' ސްޓޭޓްތަކަށް ބަލާއިރު، މިޝިގަން އާއި ނެވާޑާގައި ހެރިސް ލީޑް ކުރައްވާއިރު، ވިސްކޮންސިން، ޕެންސިލްވޭނިއާ އަދި ނޯތު ކެރޮލައިނާގައި ޓްރަމްޕް އަންނަނީ ލީޑް ކުރައްވަމުންނެވެ. ޖޯޖިއާ އާއި އެރިޒޯނާ ދެ ކެންޑިޑޭޓުން ވެސް ވަނީ އެއްވަރަކަށް ވޯޓު ހޯއްދަވާފައެވެ.
އަންނަ މަހު ފަސް ވަނަ ދުވަހު ބާއްވާ އެމެރިކާގެ ރިޔާސީ އިންތިޚާބަށް ހެރިސް އަދި ޓްރަމްޕް ވެސް އަންނަނީ ކެމްޕޭނު ކުރައްވަމުންނެވެ.
ކެމްޕޭނުގެ އެންމެފަހުގެ އަޕްޑޭޓްތަކަށް ބަލާއިރު، ޓްރަމްޕްގެ ކެމްޕޭނު ހަރަކާތްތައް އޭނާގެ އުފަން ރަށް ނިއު ޔޯކުގައި މެޑިސަން ސްކެއާ ގާޑަންގައި ބާއްވާފައިވާއިރު، ހެރިސް ވަނީ ސްވިންގް ސްޓޭޓް ޕެންސިލްވޭނިއާގައި ކެމްޕޭން ކުރައްވާފައެވެ.