ޣައްޒާ (27 އޮކްޓޯބަރު 2024): ޣައްޒާގެ އުތުރުގެ ހޮސްޕިޓަލްތަކަށް އިސްރާއީލުން ހަމަލާދިނުމުގެ އިތުރުން އެތަންތަނުގައި މަސައްކަތްކުރާ ޑޮކްޓަރުންނާއި ނަރުހުން ހައްޔަރުކޮށް ހޮސްޕިޓަލްތަކުގެ ސަޕްލައިއަށްވެސް އިސްރާއީލު ހުރަސް އަޅަމުން ގެންދާކަމަށް ދުނިޔޭގެ ސިއްހަތާބެހޭ ޖަމްއިއްޔާ (ޑަބްލިޔުއެޗްއޯ)އިން ބުނެފިއެވެ.
އެޖަމްއިއްޔާއިން ބުނީ ޣައްޒާގެ އުތުރުގެ ހޮސްޕިޓަލްތަކަކީ ކުރިން އިސްރާއީލު ދީފައިވާ ހަމަލާތަކުގައި ވެސް ހަލާކުވެފައިވާ ހޮސްޕިޓަލްތަކެއް ކަމަށާއި މިހާރު އެތަންތަން ބޭނުންކުރަނީ އާދައިގެ ގޮތަކަށް މަރާމާތު ކޮށްގެން ކަމުގައެވެ. އެހާލަތުގައި އަނެއްކާވެސް އެތަންތަނަށް އިސްރާއީލު ސިފައިން ހަމަލާތައް ދެމުން ގެންދާކަމަށާއި ބޭހާއި ސިއްހީ ސާމާނަށް ވެސް އިސްރާއީލު ހުރަސްއަޅަމުން ގެންދާކަމުގައެވެ.
ޑަބްލިޔުއެޗްއޯގެ ޑައިރެކްޓަރު ޖެނެރަލް ޓެޑްރޮސް އަދަނޮމް ގެބްރިޔޭސުސް ވަނީ ޣައްޒާގެ އުތުރުގެ ސިއްހީ ހާލަތުގެ އިތުރުން މުޅި ޣައްޒާގެ ސިއްހީ ހާލަތުވެސް އޮތީ އިސްރާއީލުގެ ހަމަލާތަކުގެ ސަބަބުން ވަރަށް ނުރައްކާ ހިސާބަކަށް ގޮސްފައިކަމަށް ވިދާޅުވެ ކަންބޮޑުވެ ވަޑައިގެން ވާހަކަ ދައްކަވާފައެވެ.
އޭނާ ވިދާޅުވީ ޣައްޒާގެ އުތުރުގެ ކަމާލް އަދަވާން ހޮސްޕިޓަލްއާ ގުޅުންވެސް ކެނޑިފައިވާކަމަށާއި އެތަނުގައި ބޭހާއި އެނޫންވެސް ސާމާނު އެއްވެސް ވަރަކަށް ނެތްކަމުގެ ޚަބަރުތަކާއެކު ޑަބްލިޔުއެޗްއޯ އިންތިހާއަށް ކަންބޮޑުވެފައިވާ ކަމުގައެވެ.
ކަމާލް އަދަވާން ހޮސްޕިޓަލް އާ ގުޅުންކެނޑުނީ އެތަނަށް އިސްރާއީލު ސިފައިންގެ ބަޔަކު ވަދެ ޑޮކްޓަރުންނާއި ނަރުހުން ހައްޔަރުކުރުމަށްފަހު ޒަޚަމްވެފައިވާ މީހުންގެ ބަޔަކުވެސް ބަލި އެނދުގައި ތިއްބައި ހައްޔަރުކުރުމަށްފަހުގައި ކަމަށް ޑަބްލިޔުއެޗްއޯގެ އެހެން މަސްއޫލުވެރިއަކު ވަނީ ވިދާޅުވެފައެވެ.
އަލްޖަޒީރާ ބުނާގޮތުން އިސްރާއީލު ސިފައިންގެ ބައިގަނޑެއް ޣައްޒާގެ އުތުރުގައިވާ ކަމާލް އަދަވާން ހޮސްޕިޓަލަށް ވަދެގަނެ އެތަނުގެ އިސްވެރިޔާ އާއި އެހޮސްޕިޓަލްގެ ބައެއް ޑޮކްޓަރުންނާއި ބައެއް ނަރުހުން އިއްޔެވަނީ ހައްޔަރުކޮށްފައެވެ. އަދި ބައެއް ބަލިމީހުންގެ އައިވީތައް ނައްޓާލުމަށްފަހު ބަލިމީހުންވެސްވަނީ ހައްޔަރުކޮށްފައެވެ.
އަނެއްކޮޅުން އިސްރާއީލު ސިފައިން ޣައްޒާ އުތުރުގެ ސަރަހައްދުތަކަށް ކާބޯތަކެތި ފޯރުކޮށްދިނުމަށްވެސް ގެންދަނީ ހުރަސްއަޅަމުންނެވެ. ކާބޯތަކެތީގެ ޝިޕްމަންޓްތަކަށް އިސްރާއީލުން ހުރަސްއަޅަމުން ގެންދާތާވަނީ ދެހަފުތާއަށްވުރެ ގިނަ ދުވަސްވެފައެވެ. މިކަމުގެ ސަބަބުން ޣައްޒާގެ ދެކުނުގައި މިލިޔަނަކަށް ވުރެގިނަމީހުން ގެންދަނީ ހައިހޫނުކަން ތަހައްމަލު ކުރަމުން ކަމަށް އދ.ގެ އޮންރުވާ އެޖެންސީ އާއި ވޯލްޑް ފުޑް ޕްރޮގްރާމް ބުނެއެވެ.
މިހާލަތުގައި ޣައްޒާގެ އުތުރު އޮއްވައި އިސްރާއީލުގެ އަސްކަރީ ޖެޓްތަކުން ގެންދަނީ ޣައްޒާގެ އުތުރަށް ކޮންމެ ދުވަހަކު ބޮންއަޅައި 30 ން 40 ން މީހުން ޝަހީދުކޮށް ގަތުލުއާންމުތައްވެސް ހިންގަމުންނެވެ. އިއްޔެވެސް ޣައްޒާގެ އުތުރުގެ ފޭލިގެތަކަށް އިސްރާއީލުން ހަމަލާދީ 32 މީހަކުވަނީ ޝަހީދުކޮށްލާފައެވެ.
އިސްރާއީލުވަނީ ޣައްޒާގެ އުތުރުގެ ސަރަހައްދުތަކުން މީހުން ފައިބަންޖެހޭ ކަމަށްބުނެ މީގެ ދެހަފްތާކުރިން އިންޒާރު ދީފައެވެ. އެއީ ޣައްޒާގެ އުތުރުގެ ސަރަހައްދުތަކާ ޖެހިގެން ޣައިރު ގާނޫނީ ގޮތުން އިސްރާއީލު ބިނާކޮށްފައިވާ ޔަހޫދީ އަވަށްތަކަށް އަލުން ޔަހޫދީން ގެނައުމަށްޓަކައި ޣައްޒާގެ އުތުރުގެ ސަރަހައްދު ހުސްކުރުމަށްޓަކައެވެ.
ޣައްޒާގެ އުތުރުގެ ސަރަހައްދުތަކާ ޖެހިގެން އޮންނަ ސަރަހައްދަކީވެސް އިސްތިއުމާރީ އުސޫލުން ޣައިރު ގާނޫނީ ގޮތުން އިސްރާއީލު ވެރިވެގެންފައިވާ ސަރަހައްދެކެވެ. ޣައްޒާގެ އުތުރުގައި ދޮޅު މިލިޔަނެއްހާ މީހުން ދިރިއުޅޭއިރު އެމީހުންގެ ބިމުން އެމީހުން ނުކުތުމަށް އިސްރާއީލަށް އަމުރު ނުކުރެވޭނެ ކަމަށް އދ. ބުނެއެވެ. ޣައްޒާގެ އުތުރުން މީހުން ހުސްކުރުމަށްޓަކައި އިސްރާއީލު ކުރާކަމަކީ އެސަރަހައްދުގެ މީހުން ބަނޑަށް ޖެއްސުމާއި ހޮސްޕިޓަލްތައް ހަލާކުކުުރުމާއި ބޮން އަޅައިގެން މީހުން މެރުމެވެ.