ޣައްޒާ (30 ޑިސެންބަރު 2024): އިސްރާއީލުން ލާއިންސާނީ ހަމަލާތައްދީ ތަޅައި ސުންނާފަތިކޮށްފައިވާ ފަލަސްތީނުގެ ޣައްޒާގެ, ތުއްތު ކުދިން ފިނިން ސަލާމަތްވާނެ ގޮތެއްނެތި ގަދަ ފިނީގެ ސަބަބުން މަރުވަމުން އެބަދެއެވެ.
ޣައްޒާގެ ސިއްހަތާބެހޭ މަސްއޫލުވެރިން ވިދާޅުވިގޮތުގައި ގަދަ ފިނީގެ ސަބަބުން ގިނައިން މަރުވަމުންދަނީ އަހަރުނުވާ ކުދިންނެވެ. މިހާތަނަށް އަށް ކުއްޖަކުވަނީ ގަދަފިނީގެ ސަބަބުން ހަށިގަނޑުގެ ހަރަކާތްތައް ހުއްޓިގެން މަރުވެފައެވެ.
ޣައްޒާގެ މަސްއޫލުވެރިއަކު ވިދާޅުވިގޮތުގައި މިއަދު ފިނީގެ ސަބަބުން މަރުވެފައިވަނީ އެއް މަސްވީ ފިރިހެން ކުއްޖެކެވެ. އެއީ އެއްމާބަނޑު ދެކުދިންގެ ތެރެއިން ކުއްޖެކެވެ. އޭގެ ތެރެއިން ފުރަތަމަ ކުއްޖާ ވަނީ ފިނީގެ ސަބަބުން މިދިޔަ ހުކުރު ދުވަހު މަރުވެފައެވެ.
ޣައްޒާގައި ބޮޑެތި މީހުންވެސް ގަދަ ފިނީގެ ސަބަބުން މަރުވަމުންދާކަމަށް އަލްޖަޒީރާ ބުނެއެވެ. އިއްޔެވަނީ ޣައްޒާގެ ދެކުނުގެ ފޭލިގެއެއްގައި ފިރިހެން ޑޮކްޓަރަކުވެސް ފިނީގެ ސަބަބުން މަރުވެފައެވެ.
ޣައްޒާގައި ފިނީގެ ސަބަބުން މަރުވި ދެކުއްޖެއްގެ މައްޗަށް ކަށުނަމާދު ކުރަނީ
މިދުވަސްވަރަކީ ދުނިޔޭގެ އުތުރު ފަޅިއަށް ފނި މޫސުންކަމުން ޣައްޒާއަށްވެސް މިއީ ފިނި މޫސުމެވެ. ނަމަވެސް ޣައްޒާއަށް ކުރިމަތިވެފައިވާ މައްސަލައަކީ އިސްރާއީލުން ބޮންއަޅައި ޣައްޒާގެ ގެތަކާއި ސްކޫލްތަކާއި ހޮސްޕިޓަލްތަކާއި އެނޫންވެސް ބިންމަތީގައިވާ ހުރިހާ ތަނެއް ތަޅައި ބިމާހަމަކޮށްފައިވާ މައްސަލައެވެ. ޣައްޒާގެ ގެތަކާއި ސްކޫލްތަކާއި ހޮސްޕިޓަލްތަކާއި އެނޫންވެސް ބިންމަތީގައިވާ ހުރިހާ ތަނެއް ތަޅައި ބިމާހަމަކޮށްލައި، އިސްރާއީލުގެ ހަމަލާތައް ސީދާގޮތެއްގައި އާންމުންނަށް އަމާޒުކޮށް އާންމުން މެރުމުގައި އިސްރާއީލުގެ ބޭނުމަކީ ޣައްޒާގެ އާންމުންގެ ނަސްލު ނައްތާލުންކަމަށްވަނީ ބެލެވިފައެވެ.
ޣައްޒާގެ އާންމުން ދިރިއުޅެން ޖެހިފައިވަނީ ވާރެއިން ހިޔާނުވާ، ފިނިން ސަލާމަތްނުވާ އަދި އަވިންވެސް ހިމާޔަތެއް ނުލިބޭ އާދައިގެ ފޮތި ފޭލިގެތަކެއްގައެވެ. އެތަންތަނުގައި އިންސާނުން ދިރިއުޅުމަށް ބޭނުންވާ އެއްވެސް ވަސީލަތެއްނެތެވެ. ކަރަންޓެއް ފެނެއްނެތެވެ. ކާބޯ އެއްޗެއް ނެތެވެ. ޣައްޒާގެ އާންމުންނަށް ބޭނުންވާ ކާބޯތަކެތި ވެއްދުންވެސް ވަރަށް ބޮޑަށް އިސްރާއީލުވަނީ މަނާކޮށްފައެވެ. ޣައްޒާއަށް ވެއްދުމުގެ ހުއްދަދެނީ ވަރަށް މަދު މިންވަރެއްގެ ކާބޯތަކެއްޗެވެ. އެހެންކަމުން ހައިހޫނު ކަންވެސް ޣައްޒާގައި ވަރަށް ބޮޑެވެ. މިއީވެސް ނަސްލު ނައްތާލުމުގެ ބޭނުމުގައި އިސްރާއީލު ހިންގާ ޖަރީމާތަކެއްކަމަށްވަނީ ބެލެވިފައެވެ.
ޣައްޒާގައިވާ ބޭސްފަރުވާކުރާ ތަންތަންވެސް އިސްރާއީލުވަނީ ބޮންއަޅައިގެންނާއި ހުޅުޖަހައިގެން އެތަންތަން އަންދާލާފައެވެ. މިހާލުގައި ޣައްޒާގެ ރައްޔިތުން ތިބިއިރު އިސްރާއީލުން ގެންދަނީ ކޮންމެ ދުވަހަކު ބޮންއަޅައި 70 މީހުންނާއި 60 މީހުންނާ ދެމެދު އަދަދަކަށް ޣައްޒާއިން މީހުން މަރަމުންނެވެ. އިއްޔެވެސް އިސްރާއީލުވަނީ ޣައްޒާގެ ފޭލިގެތަކަށް ހަމަލާދީ 58 މީހަކު ޝަހީދުކޮށްލާފައެވެ. މިއަދުވެސް މިހާތަނަށް 30 މީހަކު ވަނީ ޝަހީދުކޮށްލާފައެވެ.
ޣައްޒާގެ އާންމުން ދިރިއުޅޭ ފޮތި އަދި ރަބަރު ފޭލިގެތައް
އިސްރާއީލުގެ ހަމަލާތަކުގައި ޒަޚަމްކޮށްލާ މީހުންވެސް ފަރުވާނުލިބި ދަނީ މަރުވަމުންނެވެ. ޣައްޒާގެ ފޮތި ފޭލިގެތަކުގައި ދިރުއުޅޭ ބޮޑެތި މީހުންވެސް ތަހައްމަލް ކުރަންޖެހިފައިވަނީ ގަދަ ފިނީގެ ވޭނެވެ.
މުރާސިލުން ބުނާގޮތުގައި ޣައްޒާގެ ފޭލިގެތަކުން އިވެނީ ބޮޑެތި މީހުންނާއި ކުޑަކުދިންގެ ވޭނީ ރުއިމާއި ކެކުޅުމުގެ އަޑުތަކެވެ. ޣައްޒާގެ ޖަބާލިޔާގައި ހުރި ހަމައެކަނި ހޮސްޕިޓަލްވެސް އިސްރާއީލުން މިދިޔަ ހުކުރު ދުވަހުވަނީ އެތަނުގައި ތިބި ބައެއް މީހުންނާއެކު ހުޅުޖަހައި އަންދާލާފައެވެ.
އިސްރާއީލުވަނީ މިޖަރީމާގައި ފަސް މީހަކު ދިރިތިއްބައި އަންދާލާފައެވެ. އަދި އެހޮސްޕިޓަލްގައި ބާކީ ތިބި ޑޮކްޓަރުންނާއި ނަރުހުންނާއި ބަލި މީހުން ވެސްވަނީ ހައްޔަރުކޮށްފައެވެ. ޣައްޒާގެ ފިނި ހޫނިމިން ރޭގަނޑު އެކެއް، ސުމެއް އަދި ބައެއްފަހަރު މައިނަސް ފަހަކަށް ދާކަމަށް ވެއެވެ.
ޣައްޒާގެ ރައްޔިތުންނަށް އިސްރާއީލު ދެމުން ގެންދާ ޓެރަރިސްޓް ހަމަލާތަކާއި ޣައްޒާގެ އާންމުންގެ ނަސްލު ނައްތާލުމަށް އިސްރާއީލު ހިންގާ ގަތުލުއާންމުތަކުގެ ފަހަތުގައި ތިބެ އިސްރާއީލަށް ވާގިވެރިވަނީ އެމެރިކާއާއި އިނގިރޭސިވިލާތް، ފަރަންސޭސިވިލާތް އަދި ޖަރުމަނުފަދަ ހުޅަނގުގެ ނުރައްކާތެރި އިސްތިއުމާރީ ބާރުތަކެވެ. މިއިން ކޮންމެ ގައުމަކީވެސް މިލިޔަނުން އިންސާނުން މަރާފައިވާ ގައުމުތަކެވެ.