އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޕްރޮސްޓޭޓް ނެގުމަށް އޮޕަރޭޝަނެއް ކުރަން ނިންމާފައިވާ ކަމަށް އެމަނިކުފާނުގެ އޮފީހުން ބުނެފިއެވެ.
އެ އޮޕަރޭޝަން ކުރަން ތާވަލުކޮށްފައި ވަނީ މިއަދެވެ. އޮޕަރޭޝަން ކުރަން ޖެހުނީ ކުޑަކަމުދާ ނިޒާމުގައި އިންފެކްޝަން ހެދޭތީ ކަމަށްވެސް ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައިވެއެވެ.
އެ ބަޔާނުގައި ބުނެފައި ވަނީ ބުދަ ދުވަހު ހަދާސާ ހޮސްޕިޓަލުގައި ނަތަންޔާހޫ ހެއްދެވި ޓެސްޓަކުން ކުޑަކަމުދާ ނިޒާމުގައި އިންފެކްޝަން ހެދިފައިވާކަން އެނގުނު ކަމަށެވެ. އަދި އެކަމުގެ ސަބަބުން ޕްރޮސްޓޭޓް ދުޅަވެ، ނަގަން ޖެހޭ ކަމަށް އެ ބަޔާނުގައި ބުނެއެވެ.
މިދިޔަ މާޗު މަހު ނަތަންޔާހޫ ހާނިއާ އޮޕަރޭޝަނެއް ވެސް ކުރައްވާފައިވާއިރު، ޖުލައި މަހު ވަނީ ޕޭސްމޭކާއެއް ވެސް ލައްވަން ޖެހިފައެވެ.
ނަތަންޔާހޫގެ ސިއްހީ ހާލަތާ ގުޅޭ ގޮތުން އިސްރާއީލުގެ ބައެއް ރައްޔިތުން އަންނަނީ ކަންބޮޑުވުން ފާޅުކުރަމުންނެވެ.
އިސްރާއީލުގެ ބޮޑުވަޒީރުގެ އޮފީހުގެ ގަވައިދުތަކުގެ ތެރޭގައި، ބޮޑުވަޒީރު ކޮންމެ އަހަރަކު ސިއްހީ ހާލަތާ ގުޅޭ ރިޕޯޓެއް އާންމުކުރަން ޖެހޭނެ ކަމަށް ބަޔާންކޮށްފައިވެއެވެ. ނަމަވެސް 2016އިން މިދިޔަ އަހަރުގެ ފަހުކޮޅާ ހަމައަށް ވެސް ނަތަންޔާހޫ އެފަދަ ރިޕޯޓެއް އާންމުނުކުރައްވައެވެ.
ނަތަންޔާހޫ ގެންދަވަނީ 2009އިން ފެށިގެން ބޮޑުވަޒީރުކަން ކުރައްވަމުންނެވެ.